¹ Malika vavi vakaenda Sodoma kiukuanyi, kigheri Lutu adamije moongo o Sodoma. Lutu kavaona, kakure ivaadija, karama kiamu kyake guanda maifunyi. ² Kadeda, Lanye ghomi vakwa, ngamterevenyi mughaluke mdambuke numbenyi ya mtumishi wanu, mlayee aja kio kimu na msanje madende vanu. Ili mtukuwe kitalang'a aghera mdambuke." Navo vakadeda, "Guai, kioki jipelaa murinyi." ³ Nacho kavatereva munu, mwisho vakakure anduam nacho, na vakaingia numbenyi ake. Nacho kaandaa kando na iokiya boflo jilavi kiwa chachu, vakaaja. ⁴ Kake kabla valamelaa, ghomi va muri, o Sodoma, vasoro vasuri vakaitengeta numba, ghomi vose ifuma kila kona ya muri. ⁵ Vakamudikira Lutu, na imbia, "Ghomi vaja vaingi kuapo nguku vakeri? Vafune iha injaa vache kodu, ili jilaye navo." ⁶ Lutu kafuma injaa nacho kashinga moongo. ⁷ Kavavia, "Ngamlerevenyi, vandodu mlaute shivichua. ⁸ Lambua, ngaode vepu vavi navo valemelai na mundumipo. Ngatereva ngivaende kwanu, na muvautiye kyokyose kija mpekiona kee kicha mesonyi vanu. Mulaule kyokyose ko ghomi va, ko kitevi vacha guanda ya kirinje kya kahi kakwa.'' ⁹ Vakadeda, "Kure iha!" Vakadeda kavi, iuu nyalecha kadamia iha cha mughenu, na luaha nyava nyicho muamusii! Luaha jipekuka va ovichuwa iguwe kuliko ivo." Navo vakamsonga munu mundu cho Lutu, vakashikiya ifunja moongo. ¹⁰ Kake ghomi vaja vakamwada Lutu vakamdera numbenyi na ishinga moongo. ¹¹ Navo vaghenu vaja va Lutu vakavakava ko upofu ghomi vaja vavekeri injaa ya numba, vasoro na vasuri ko anduam, kura kee vakalemwa kigheri vakeushigha moongo. ¹² Navo vandu vaja vakambia Lutu, Ale nyuode mundu ungi oose iha? Vako vapo, vana vapo na vepu vapo, na oose ungi akeri ina murichu, undevafuna iha muriu. ¹³ Ko kitevi jinashigha jiangamisa sehemu hii, ko kitevi mashitaka vake mbele ya Yahwe vafoja mpaka nyajiduma jiangamise." ¹⁴ Lutu kafuma na kadeda na vako vake, ghomi vaja vavekeri aduaje vaka kuavo, kavavia, "Jikurenyi haraka andu ha, ko kuwa Yahwe nyauri nangamise muri iuu.' kake vako vake valeona chambele nyakena vatania. ¹⁵ Kitalang'aaghera, malaika vakamtereva Lutu, vakambia, kure, iria mkaapo na vepu vapo na vevavi iva vakeri iha, ili ulachedeki ya ko ikagua ja muri iuu." ¹⁶ Kake vakachelewa chelewa. Ko ikyo vandu vaja vakamwada kuoko kuwake, na kuoko ko mkaake, na maoko va vepu vake vevaavi, ko kitevi Yahwe nyalevaadia makene. Vakavafuna injaa, na ivadera injaa ya muri. ¹⁷ Ve vafuna injaa umu o vandu vaja kavavia, "Kukire kuonyi ngoo yapo! ulalambue numa nama uladamie andu kokose iha ibotonyi ijii. Toroka udambuke mafumbu nyi ili kee ulache aghiwa kwacha." ¹⁸ Lutu kavavia, "Guai, lanye vomi vakwa! ¹⁹ Mtumishi wanu nyapata kibali mesonyi vapo, na nyongilora ucha mudue munu ko iokoa maisha vakwa, kake ngapedima torokia mafumbunyi po, ko kitevi mavichua vapengishikia na ngapepa. ²⁰ Lambwa, muri uja aja nyukeri kufui ngipie aja, na nyi munina. Ngatereva ngitijenyi ngikambije aja (Ale uja nyi muninapo?), na maisha vakwa vape kiruwa." ²¹ Nacho kambia, "Eee sawa, ngaidikija kiterevo ikiyo kee ngapeuwangamisa muri cho usa ousendapo. ²² Upesi! toroka uende aja, ko kitevi ngapeta kyo kyosepo mpaka ushike aja." Ko ikyo muri uja ukalaghua Soari. ²³ Ruva jivekeri jimefuma kitalang'a orikenyi kigheri Lutu aleshika Soari. ²⁴ Nacho Yahwe kauasa Sodoma na Gomora kibiriti na modo ifuma ko Yahwe ruveu. ²⁵ Kainyamara miri iya, na iboto jose, na shose shivekeri murinyi, na mara vaja valefuma guanda. ²⁶ Kake muka o Lutu uja avekeri numa ake, kalambua numa, kava ngoo ya chumbi. ²⁷ Abraham katukwa kitalang'a aghera kaenda aja andu avekeri aimukie mbele ya Yahwe. ²⁸ Kalambwa guanda ielekea Sodoma na Gomora na ieleke orika luose lo inotonyi. Kaona na lambua, musu nyuvekeri ukeenda uye ifuma guanda cha musu o itanuru. ²⁹ Kigheri Makiluna alenyamara miri ya ibotonyi, Makilunga kamkumbuka Abraham. Kamfuna Lutu ifuma maangamisinyi ajaiandu aleangamisa miri isa Lutu aledamia. ³⁰ Nacho Lutu kadoja uye ifuma Soari na idambuka ndedamia mafunyi akeri anduam na vepu vake vevavi, ko kitevi nyaleogua idamia Soari. Nacho kadamia mbakonyi, icho na vepu vake vevavi. ³¹ Uja o kuvoka kambia uja munina, "Papa oduu luaha nyi musuri, na kuode mundumi andu ko kose olaa na isee ihana na desturi ya orika luosepo. ³² Njo jimuninge papa guari ili jilaye nacho ili kee jiongerije ushao o papa oduu.'' ³³ Ko ikiyo vakamuninga guari kio kija. Nacho uja okuvoka kaingia na kalaa na ndiye; ndiyye alemanya kee kigheri kiki alecha kalaapo, nama kigheri aletukwapo. ³⁴ Mufuri uja okavi uja okuvoka kambia mwanavo, "Adanya, kio kya ivo ngalelaa na papa. Na jimuninge guari kavi kio kya inu, na uingie undelaa nacho, ili jiongerije ushao o papa oduu." ³⁵ Navo vakamuninga guari kavi ndiavo kio kija, na uja munina kaenda kandelaa nacho. Ndiye alemanya kee kigheri kiki alelaapo. Nama kigheri alelukwapo. ³⁶ Navo veepu ivo va Lutu vakapata mimba ya ndiavo. ³⁷ Okuvoka kafee mwana o ghomi, nacho kamulagha rina jake nyicho Moabu. Nacho kava nyicho ndiye o Moabu mpaka inu ijii. ³⁸ Na uja munina nacho kafee mwana o ghomi, nacho kamlagha rina jake nyicho Benami. Iuu nyicho ndiye o vandu va Waamoni mpaka inu ijii.