¹ Yahwe nyalemfumia Abraham ipo Mialoni ya Mamre, avekeri adamije mongo o hema kigheri kya mbari. ² Kalambwa uye na, lambwa, kaona ghomi varadu vaimukanie mbele yake. Evaona, nyaledicha idiya moongo o hema ivaadija(ivapokea) na irama guanda mpaka maifunyi. ³ Nacho kadeda, "Mndumii, chakire ngapata upendeleo mesonyi vapo, ulangiide ngakutereva naingitija mundu apo. ⁴ Ngatereva muringa kinina uendua, musanje madende vanu, mupumusike guanda ya kidi kyo. ⁵ Nainyi ngapeende kando kinina, ili mujiburudishe muvenyi. Nyiho andu mpekure mdambuke ko kitevi mocha ko mutumishi wanu." Navo vakadeda, "Uta chakundu odeda." ⁶ Nacho Abraham kadambuka hemenyi ko Sara, nacho kadeda, "Vika movinyi, iria shipimo shiradu sha unga mcha, uukande, na ukore iboflo." ⁷ Nacho Abraham kakambia indikinyi, kairia ngache ya ng'umbe ighelekiye na njicha, nacho kamuningia mdumwa ko haraka ili naiandaye. ⁸ Kairia siagi na maruva na ngache iya yemaandaliwa, nacho kadera kando mbele yavo, nacho kaimukana kufui navo aja guanda ya kidi kigheri vakenaja kando. ⁹ Vakambia, "Mukaapo Sara nguku akeri?" Nacho kajibu. "akeri hemenyi." ¹⁰ navo vakadeda, "Loi ngapeuya kwapo kigheri kya machipuko, na lambua Sara mkaapo apeva na mwana o ghomi." Sara nyavekeri akeeadanya moongo o hema ivekeri numa yake. ¹¹ Abraham na Sara vavekeri vasuri, umri wavo uvekeri umedambuka munu, na Sara nyavekeri ameida umri uja o mundumuka apedima ifee vana. ¹² Ko ikyo Sara kakuseka amonyi, kakudeda amonyi, "am ngamekuwa na miakwa nyi msuri, ale nangapepata ighorokiwa jo?" ¹³ Yahwe kambia Abraham, "Angiki Sara aseka na ideda, ale naloi ngapefee mwana, ngakeri msuri? ¹⁴ Ale kuode kindo kiki kyo kyose kiomie munu ko Yahwe? Ko kigheri kija ngaledera inyi kigheri kya machipuko, ngapeuya kwapo. Kigheri ikyo mwakenyi Sara apeva na mwana o ghomi." ¹⁵ Nacho Sara kalegha na ideda, "Ulaseke," Ko kitevi nyaleoguwa. Yahwe kadeda, "guai uleseka." ¹⁶ Navo ghomi vaja valeimukana na idambuka valaambuje guanda ielekea Sodoma. Abraham kadambuka navo ili naone njia yavo. ¹⁷ Kake Yahwe kadeda, Ale ngimrike Abraham kija ngakena kusara ikiuta, ¹⁸ Kikeri kee loi Abraham apeva mudue na orika luode oruu, na idiya icho njiorika sose sa dunia vapeningua mbora? ¹⁹ Ko kitevi ngalemsambura ili navaelekese vana vake na numba ake ili vaiade njia ya Yahwe, vaute utakatifu na haki, ili kee Yahwe namninge Abraham shija aleshideda kwake." ²⁰ Nacho Yahwe kadeda, "Ko kitevi kilio kya Sodoma na Gomora nyi kidue ko kitevi kya sambi yavo nyi ndue, ²¹ Luaha ngapeshika aja ngione kilio kija kilengishikiya ko kitevi kyake, kikava kee nyi loi valeuta ana valaleuta, ngapemanya." ²² Ko ikiyo ghomi vaja vakaghaluka ifuma aja na vakadambuka Sodoma, nacho Abraham kabaki aja aimukiye mbele ya Yahwe. ²³ Nacho Abraham nyaleshika na ideda, "Ale nyupevakumba kwacha vatakatifu anduam na vanyamari? ²⁴ Nakipedima vave vakeri vaode haki makumi vatanu murinyi. Ale nyupevakumba kwacha na ulautije muri ko kitevi kya ivo makumi vatanu vatakatifu vakeri iho? ²⁵ Ulaute kudo guani, ivaagha vatakatifu anduam na vanyamari, kurakee vatakatifu valautiwa sava sava na vanyamari. Guai! Ale muhukumu o orika lose apeuta hakipo?" ²⁶ Yahwe kadeda, "Ngaidiya Sodoma ngapata vatakatifu makumi vatanu murinyi, ngapeutija muri wose ko kitevi kyavo." ²⁷ Abraham kamtalua kadeda, "Lambwa, ngameada ideda na Mndumi okwa, hata chakira inyi nyi maifu na majivu! ²⁸ Kuda kipeva chakire kuode vatanu vapungukie ko vatakatifu voo makumi vatanu? Ale nopeangamisa muri wose ko ipungua ivo ve vatanu?" Kadeda, 'Ngapeangamisa, chakire ngapata vandu makumi vaana na vatanu aja." ²⁹ Kadeda nacho kavi, na iamba, "Kipeva kuda chakira vapatikana makumi vaana aja?" Kajiu, "Ngapeutapo ko kitevi kya ivo makumi vaana." ³⁰ Kadeda, Lambuwa ulailushie, Mndumi, ngadeda. Navakava makumi varadu vakapatikana aja." Kajibu, 'Ngapeutapo, chakire ngapata makumi varaadu aja." ³¹ Kadeda, Lambuwa, ngaada ideda na Mundumi okwa! Nakire vapatikana makumi vavi aja." Kajibu, "Ngapenyamarapo ko kitevi kya ivo makumi vavi." ³² Kadeda, "Lambue ulailushie, Mndumi, na ngapededa kindo kii ko mara ya mwisho. Na kire vapatika ikumi kuja." Nacho kadeda, ngapeangamisapo ko kitevi kya ivo ikumi." ³³ Yahwe kaendelea na njia ake mara tu imarija ideda na Abraham, na Abraham kauya kanyi.