¹ Ko ikyo Abram kakure Misri na idambuka Negebu, icho, na mkaake, na shose shija aveshiode. Lutu nacho kadambuka anduam nacho. ² Na iho Abram nyavekeri tajiri o nyamandu sepu nga, hela na dhahabu. ³ Nyaleendelea na kiaro kyake ifuma Negebu mpaka Betheli, andu napo hema yake ivekeri tangu kuvoka, kati ya Betheli na muri o Ai. ⁴ Kadambuka andu napo madhabahu ivekeri ishumbiwa ipo kuvoka. Naho kadikiria rina ja Yahwe. ⁵ Avekeri kiaro na Abram, nyeveode na ng'umbe, na mandiki va nyamandu se punga, na mahema. ⁶ Orika lulevashika vose idamia anduampo ko kitevi mali savo sivekeri sifoje munu, kura kee valedima idamia anduampo. ⁷ Naho kuveode unangua kati ya vaombia va nyamandu sa Abram na vaombia va nyamandu sa Lutu. Wakanaani anduam na Waperizi vavekeri vakeedamia orika lo kigheri ikyo. ⁸ Ko ikyo Abram kambia Lutu, "Kulave na unangua kati yapo na inyi, na kati ya vaombia va nyamandu sapo na vaombia v nyamandu sakwa; tia ikyo ise nyi vandu vamu. ⁹ Ale orika lu loose lukeri mbele yapopo? Dambuka udamie kuwacha nainyi. Chakire upedambuka kumoso, nainyi ngapedambuka kujo ana chakire upedambuka kujo, inyi ngapedambuka kumoso." ¹⁰ Ko ikiyo Lutu kalambuwa, na kaona kee orika luose lukeri tambarare ya Yorodani nyivekeri na muringa kila andu mpaka Zoari, chaa mbele bostani ya Yahwe, na cha orika lo Misri. Iii nyivekeri kabla Yahwe alameianga misa Sodoma na Gomora. ¹¹ Ko ikiyo Lutu kasambura icho amonyi orika tambarare lo Yorodani na kadambuka mashariki, na vandu va vakalekana venyi ko venyi. ¹² Abram kadamia orika lo Kanaani, na Lutu kadamia miri ya tambarare. Katandasa hema sake hadi Sodoma. ¹³ Na kigheri ikyo vandu va Sodoma vaveode unyamari na vaode sambi munu ko imkosia Yahwe. ¹⁴ Yahwe kambia Abram baada ya Lutu amekure kwake, "Lamvwa iho andu ukeri vokiaho uimuke mpaka kaskazini, kusini, mashariki, na magharibi. ¹⁵ Orika ilu loose uluonie, ngapekuninga igue anduam na ushao wapo ndarasi. ¹⁶ Ngapevaongerija ushao wapo uve ufoje cha maifu va orika, chakura kee kuode mundu apedima itala maifu va orika, nyiho andu na ushao wapo upeitaluwa. ¹⁷ Kure, udambuke ko ileha na ko uduwe orika luu, am ngapekuningia." ¹⁸ Ko ikyo Abram kairia hema yaake, kacha kachedamia mwaloni o Mamre, nacho ukeri Hebroni, na aja kashumba madhabahu ya Yahwe.