¹ Yahwe kambia Abram, "Dambuka ufume orikenyi luapo, fuma ko vanduanu, na ko vandu va ndiyo, udambuke orikenyi luja ngapekulora. ² Ngapekuvikia uve taifa jidue, na ngapekuninga mbora na ijidura rina japo jive jidue, na nyupe utika mbora. ³ Ngapevaninga mbora vaja vapekuninga mbora igue, kake uja alekuheshimu ngapemdeja mbiagho. Idiya kwapo vandu vose va orika vapeningua mbora. ⁴ Ko ikyo Abram kakure chakundu Yahwe ammbia naute, na Lutu kadambuka anduam nacho. Abram nyaveode miaka makumi saba na itanu kigheri afuma Harani. ⁵ Abram kamwiria Sarai mkaake, Lutu, mwana o munduavo, na shose vashiode nasho valeshisang'iria, na vandu vaja valevapata vakeri Harani. Vakafuma idambuka orika lo Kanaani. ⁶ Abram kaidia gholosi ya orika hadi Shekemu, hadi mwaloni o More. Kigheri kyo Wakanaani valedamia orikenyi loo. ⁷ Yahwe kamufumia Abram, naideda, "Ngapemningenyi ushao wapo orika luu." Ko ikyo Abram kamshumbia madhabahu, Yahwe uja alemfumia. ⁸ Ifuma aja kadambuka orikenyi luja lo mafumbu nyi mashariki o Betheli, ino nyalekavia hema yake, magaribi kuvode Betheli na mashariki kuvode na muri o Ai. Kashumba madhabahu ya Yahwe aja naidikiria rina ja Yahwe. ⁹ Nacho Abram kaendelea idambuka, akeelekea ngaliko ya Negebu. ¹⁰ Kuvode njaa orikenyi, ko ikyo Abram kadambuka kandedamia Misri, ko kitevi kya njaa ivekeri orikenyi. ¹¹ Kigheri kufui nashike Misri, kambia Sarai mkaake, "Lambwa, umanye kee iguwe nyi mundumuka uorokiye. ¹² Vamisri vakakuona vapeamba, iuu nyi mkaake, na vapengiagha inyii, kake vapekutija igue urukie. ¹³ Ko ikyo igue ambaa kee inyi msacha okuwa, ili inyi ngive salama ko kitevi kyapo, na kee maisha vakwa vapebaki mboha ko kitevi kyapo." ¹⁴ Ikava kee Abram aingia Misri, Vamisri vakaona kee Sarai nyaorokie munu. ¹⁵ Vadue va Farao vakamuona, na imsifia ko Farao, na mkaacho vakamwiria vakamdamada kanyi ko Farao. ¹⁶ Farao kamuutia ucha Abram ko kitevi kyake, na kamninga imondo, ing'umbe ndue, punda vaghomi vatumisgi va ghomi, vatumishi va vaka, punda vake, na ngamia. ¹⁷ Nacho Yahwe kamkava Farao na numba yake ko shikavo shidue ko kitevi kya Sarai, mkaa o Abram. ¹⁸ Farao kamudikira Abram na imbia, "Ngikiyo iki ongiutia? Angiki ulangivia kee iuu nyi mkaapo? ¹⁹ Angiki uleamba, kee iuu nyi msacha apo; na inyi ngamuiria iva mkaa okuwa? Luaha ko ikiyo ichu ihaa nyi mukaapo. Mwiriena udambuke." ²⁰ Nacho Farao kafuna kidedo ko vandu vake kiyehusiana nacho, na vakamsembera, icho anduam na mkaake na shija shose aveshiode.