¹ Kake Sauli, nyaleetolewa deda shekangisa na sha kipu ko vaja veloshwa vaja va Mndumi, nyaledambuka ko vaitori. ² na itereva shireghwa ko ipo makanisenyi na ipo Dameski, kinesa kee kampata mndja akeri mwido uja, nave mndmi ana mndumka navapunge navaende Yerusalemu. ³ Naandu akineenda kiaro, imefumya kee kufui na Dameski, turukya kirangaro kwose kwose ifuma ruveu,' ⁴ nacho kagwa wanda kaichwa iru ikambia, ''Sauli, Sauli, ngiki ukegivinisa inyi?'' ⁵ Sauli katalwa, nyigwe Mndumi? Mndumi kaamba, ''Nyinyi Yesu icho unangilushira; ⁶ Kake teshuka, ingia mrinyi, naigwepeviwa kiurwa uute. ⁷ Vandu vaja valenda kiaro anduamu na Sauli vakadaya sauti, vakadamya iru, valaone mndu. ⁸ Sauli kateshuka ko orikenyi epungwa meso vake, aledima ona kundopa, vaka mwanda koko vaka mwende Dameski. ⁹ Ko mfuri iradu akereonapo, akejapo, nama akenywapo. ¹⁰ Koveode veledhwa Dameski irinajake Anania, Mndumi nyalededa nacho ndoswenyi, ''Anania.'' Kaamba, ''Lambwa, ngakeriha, Mndumi. ¹¹ ''Mndumi kaambia, ''Teshuka udambuke kundu kupe laghwa nyofu, na numba ya Yuda naundevesera mndu apefuma Tarso aperaghwa Sauli; amu nyakeri tereva; ¹² nyalemwona ndoswenyi mndu Anania kaingia na mvikya moko uye yake kinesa kee nadime ona. ¹³ Kake Anania ktalwa, ''Mndumi, ngameichwa shidedo sha mndu chu, ko vandu va foje chakundu alevautya uvichwa vaele vaipo Yerusalam; ¹⁴ Iha aode uitori ifuma ko mlisi mdwe imwada kila mudumu anajisenda irina japo. ¹⁵ Kake Mndumi kaambia, ''Dambuka, amu icho nyikyombo ngasamburiye kokwa, najirie irina jakwa, o shangunyi lo valaichi na vaitori na vana va Israeli. ¹⁶ Amu ngapevalora shusha shiofoje shisho shipemuninga shimwitana ko kitevi kya irina jakwa.'' ¹⁷ Anania kadambuka, kaingia kyanumbenyi; Kambikya moko kaamba, mndodu Sauli, Mndumi Yesu, ujalekufumya ko mwidenyi anduokenecha, nyangiduma uchime iyona alafu uuhurishwa Ngoo Mwele. ¹⁸ Turukya shikagwa mesonyi vake shindo chamakoko, kadima ona, kaimukana, kabatiswa; kaja kando, ne pata pinya. ¹⁹ Kadamya anduamu na veloswa ipo Dameska ko furi sifoje. ²⁰ Muda icho icho kamwongwa Yesu ko kanisenyi, eamba kee icho nyu Mwana o Makilunga. ²¹ Nawose ivovaleichwa valerijwa naideda, ''Chii mnduchupo alevanyamara vose valedikira irina iji ipo Yerusalamu? Naiko nyalecha kokitevi kyerapunga nevadamana ko vaitori.'' ²² Kake Sauli nyaleengerijwa ideda kidedo nevata Vayahudi vasavedamije Dameski vaukwa nemlora kee ichunyuho Kristo. ²³ Mekoje furi sifoje, Wayahudi vakauta mapatano anduamu ili vavaghe. ²⁴ Kake maandalio vavo ukamanyika Sauli. Vakamrorovya mengonyi msanyanyi na kio vadime mwagha. ²⁵ Kake veloshwa vake vakamwirya kio vakamsosa iidya ukutenyi, vakamsosa wanda ko kikapu. ²⁶ Amu Sauli kashika Yerusalemu, nyalegheresha iungama navo na velosha kake vekeri vake mbuogwa, valamwidikije kee icho nji mloshwa. ²⁷ Kake Barnaba kamwirya nemadamada ko vedumwa, naivavia chakundu Sauli alemuona Mundumi mwidonyi na Mndumi chakundu alededa nacho, chakundu sauli alevavia kidedo ko ijiamini ko irian ja Yesu ipo Dameski. ²⁸ Nyale kojana navo andueleingia nafuma Yerusalemu. Kadeda ko ijiamini ko irina ja Mndumi Yesu, ²⁹ veleserana na Vayahudi va Kiyunani kake kaendelea ivagheresha kichindi chindi imuagha. ³⁰ Amu vandodu anduvalemanya kindoiki, vakamorya vakamsisa Kaisaria, vakamdamada na dambuke Tarso. ³¹ Naikanisenyi jose ko Uyahudi, Galilaya na Samaria, ko vekeri na ucha, jikafumbwa na idambuka ko mghasha oo Mndumi nemteterya ko Ngoo Mwele, kanisenyi jikaleha, na iongerijika vafoje. ³² Kitevi kilemfumya Petro andu enetengeta tengeta wando sose sa mkoa, kavasokya vaja vaichi vechedamya ipo mrinyi o Lida. ³³ Kamwonaipo mndumuirina jake Ainea, mndchu nyekeri ulinyi makanane; amu nyekeri aolajye. ³⁴ Petro kambia, ''Ainea, Yesu Kristo nakuchire; tukwa na uala uliwapo,''Kinina katwakwa. ³⁵ Na vandu vose vedamije Lida na Sharoni andu valemuona mnducho, valemghalukya Mndumi. ³⁶ Koveode veloshwa Yafa anelaghwa Tabitha, kisa kileghalswa ke ''Dorcas'' Mnchimkachu nyaleichuri swa uya mchana tabia jicha shisha aleshiuta ko vandu valaode. ³⁷ Kilefumya fulicho nyaleluwa naipo; vemdamada, vemdosirya kichumbenyi kya uye vakamlara.. ³⁸ Kokitevi Lida kyekeri kufui na Yafa, na veloswa veleichwa kee Petro nyekeri ipo valevaduma vandu vavi kwake, vakamtereva, ''Ucha kodu nama ulakelejwe gwayi.'' ³⁹ Petro katukwa kaamuwa dambukanavo eshika, valemwende ko chumba kya uye. Na vaja valaode vose valeimukana kufui nacho vakefugha, velora ikoti na nguvo sisa Dorcas alevapmya mndacho andu ekeri andamu navo. ⁴⁰ Petro kavafuna vose nnja ya chumba, kailika nneli katereva, alatu kaghalukya osese, kaamba, ''Tabitha, tukwa.'' Kure rugwa meso vapo andu valemuona Petro vakadamya wanda. ⁴¹ Na Petro kamuinga koko kwake kamteshwa na evalikira vaja vaichi na vaja valaode, kavanengia kwavo akeri arukye. ⁴² Kundoki kikamanyika Yafa yose, na vandu vose vakamwidikija Mndumi. ⁴³ kilefumya Petro kadamya furi sifoje Yafa anduamu na mndu eche laghwa Simioni, nyeche tobira njonyi.