¹ Kigheri jivekeri jineleka navo, na jikenadambuka balibalinyi jikashika umu ko umu ko muri kosa, na ngama ingi jika shika mri o Rodo, naifuma ipo jikashika mri o Patara. ² Jepata meli inauruka idambuka Fainike, jiledoja jikadambuka. ³ Jeshika oshangunyi o kisiwa kya Kipro, jikatia upande o Kumoso, jikadambuka mpaka Siria, jikavikya kitiri mri o Tiro, kokitevi ipo nyipo meli ivekeri yefunwa shehena yake. ⁴ Baada yeveona valosho, jikadamya mfuri saba. Valosho vakambia Paulo iidyo Ngoo ke icho alavade Yerusalemu. ⁵ Hta jatimisa mfuri sija, ise jikakure jikadambuka sedu. Vose anduamu na vaka vavo na vana vavo, valejisimdikisa katika njia sedu mpaka jefumya njia ya mri. Kisha jikailika nndi pwani jikatereva, jikalekana kila umu. ⁶ Jikadoja meli, ipo navo vakauya kanyi kwavo kavi. ⁷ Hata jemarija kyaro kyedu efuma Tiro, na idamya ko mfuri jimu. ⁸ Ngama ingi jikakure jidambuka Kaisaria. Ise ikaingya numbenyi ko Filipo, muhubiri o onjili, nya vekeri umu o vaja saba, naise jikadamya anduamu nacho. ⁹ Mundu ichu nyavekeri na vepu vaana mabikira vasa valetabiri. ¹⁰ Baadamya ipo ko mfuri kadha, akasoka efuma Uyahudi nabii umu achedikirwa Agabo. ¹¹ Icho nyalecha kodu na kaufuna mkanda o Paulo. Koicho nyaleekupunga madende na moko vake amona iyamba, ''Ngoo Mwele ambakudi, ''Vayahudi va Yerusalemu vapempunga mundu anemiliki mkanda icho, navo vapenengwa mokonyi mo vandu va mataifa.'' ¹² Jeichwa shindo ishi, ise na vandu vavekeri vanedamya andu aja jilemtereva Paulo aladoje eenda Yerusalemu. ¹³ Nyiho Paulo katalwa, ''Mneuta kiki, mnafugha na ingifunja ngoo yakwa? Amu ngakeri tayari, na ipia ipo Yerusalemu kokitevi kya rina ja Mndumi Yesu.'' ¹⁴ Ko kija Paulo aleveuri elembwe, jiledana iyamba, ''Kake mapenzi va Mndumi vautike.'' ¹⁵ Baada ya mfuri isi, jireirya mifuko yedu na idoja Yerusalemu. ¹⁶ Vaitale va vakulosha efuma Kaisaria valevadianana ise. Vakamwende mundu umu achedikirwa Mnasoni, mundu o Kipro, mkulosho o kala usajiledamya nacho. ¹⁷ Jeshika Yerusalemu, vandodu valeji karibishako sia. ¹⁸ Ngama ingi Paulo kasambuka anduamu na ise ko Yakobo na vasuri vose vavekeriiho. ¹⁹ Baada yedikira, alevanenga taarifa imu baada ya ingi ya shindo shisa Makilunga aleuta makidi va mataifa kalidya huduma yake. ²⁰ Kigheri vaichwa isho, vakamsifu Makilunga, na vakammbia, ''Uneona, munduamu, kode maelfu vanga vaamini makidi mo Vayahudi ivo vose vaode nia yeada sheria. ²¹ Valeviwa kuhusu icho ke unalosha Vayahudi vanedamya kati ya mataifa ilekana na Musa, na ivavia valavadine vana vavo, na valavadye desturi sa kala. ²² Nyuinyarye jiuta kiki? Bila shaka vapeichwa ke igwe umecha. ²³ Kudo uta kiasi ise jinekuvia lwaha: jione vandu vaana vasa valevikya nadhiri. ²⁴ Vairye vandu iva na ukusanje kumonyi anduamu navo, na uvalihe gharama savo, ili vadime auta mido yavo. Kudo kila umu namanye ke shindo valeviwa kuhusu icho nyivongo. Vapekulosha ke icho anevadya sheria. ²⁵ Kake ko habari sa mataifa vasa vavekeri vaamini, jileregha na ifuna maagizo ke vainyarye ikufuna na shindo shilefunwa dhabihu ko sanamu, na ndakame, efuma na kija kileaghwa, na vakufune na usharati.'' ²⁶ Nyiho, Paulo alevafuna ghomi, na mfuri o kavi kakusanja amonyi anduamu navo, kangya Hekalunyi, aneamba kipineti kya mfuri se kusanja, mpaka sadaka ifunwa kokitevi kila umu wavo. ²⁷ Mfuri isi saba seshikya emarijika, vaitale va Vayahudi efuma Asia vakamwona Paulo Hekalunyi, na makutano vakalushana vakamgholoja moko. ²⁸ Vavekeri vanekavo olodo, ''Vandu va Israeli, jitaramenyi ichu nyi mundu achelosha vandu kila andu shindo shisa numa na vandu, sheria, na andu iha. Kake nyaleende Wayunani katika hekalu na kupanajisi andu iha kuele.'' ²⁹ Kokire kuvoka vavekeri valemwona Trofimo Muefeso akeri anduamu nacho mjili navo vakaita ke Paulo alemwende Hekaluni. ³⁰ Mri wose uvekeri kanga na vandu vakadicha anduamu na imwada Paulo. Vale amfuna nnja ya Hekalu, na mongo sikashingwa. ³¹ Vegheresha imuagha, habari silemshikya mdue o jeshi jauringi ke Yerusalemu yose iveichurye ghasia. ³² Mda icho akavarya askari na jemedari vakadicha orenda. Kigheri vandu vemwona mdue o jeshi na askari, vakatia imkava Paulo. ³³ Kake mdue o jeshi alemshikya na imwende Paulo, na iyamua napungwa minyororo ivi. Akamvesera icho nyunga nyauta kiki. ³⁴ Vaitale va vandu va orenda vavekeri vanepayuka kindo iki na kingi. Kokiteri jemeddari aledima ivavia kyokyose kokitevi kya olodo, akaamuru Paulo naendwa ndani ya ngome. ³⁵ Basi eshikya ngazi, akairwa na askari kokitevi kya ghasi sa orenda. ³⁶ Amu orenda ovandu valemvadya vakaendelea ikava olodo, ''Mfunenyi ichu!'' ³⁷ Paulo nyavekeri aneendwa ndani ya ngome alemmbia mdue o jeshi, ''Ngapedima ekuvia kindo?'' Uja mdue o jeshi akammbia ke nyunededa Kiyunani? ³⁸ Ke, nyunededaKiyunani? Ke, igwe nyiuja Mmisri usa alewahi ivaongoza uasi akairya magaidi elu inya nyikani?'' ³⁹ Paulo akaamba, ''Inyi nyi Myahudi, efuma mri o Tarso ya Kilikia. Inyi raiya o muri maarufu. Ngatereva, munguruhusu ngidede na vandu.'' ⁴⁰ KIgheri jemedari amemunenga ruhusa, Paulo kaimuka ngazinyi akafuna ishara ko vandu ko koko kwake. Kigheri avekeri na usau sana kadeda navo ko Kihebrania. Akaamba,