¹ Kivekeri unangw isia, Paulo nyelevadikira valoshwa vake na ivavikia ngoo. Iho kalekanavona kadambuka Makedonia. ² Nacho emeida njorika iso na nyekeri akenavavikia ngo vaidikija, kaingia Uyunani. ³ Kivekeri yaicho iva ko mfuri o mieri iradu, njama ziletabira kitevi kiake na Vayahudi anduekenashikia kufui idambuka ko njia ya olubalibalinyi idambuka Shamu, ikio nyeleona nauye idia Makedonia. ⁴ Velesongora nacho mpa Asia vekeri Sopatro, mwana o Priho ifuma Berea; aristariko na Sekundo, vose ifuma vaidikijie vya Vathesalonike, Gayo o Derbe; Timotheo; Tikiko na Trofimo ifuma Asia. ⁵ Kake vandu iva vamesongwa na vakeri vakenadivedeja kuja Troa. ⁶ Ko njia alubalunyi ifuma Filipi ya mfuru ya mikate ilavikiwa mdodorikia, na ko mikono itanu dikavashikia ipo Troa. Diledamia ipo ko mikono itanu na shivi. ⁷ Ata mkono akuoka o im, divekeri dimekusangiria kima kinesa ibenjua mkate, Paulo nyelededa na vakundie nyekeri epanga ikure ngamaingi ikio kawa nededa mpaka kio kio mbango. ⁸ Kuveode shijari shifonje numbenyi iposhi uje andu divekere dikusangirie kimu. ⁹ Ko kilanga nyekeri adamije msoro rina jake Utiko, icho nyerejwa na madiyo vafoje. Ata Paulo ekeri ekarija ko mfuru ufoje, msoro ichu, akeri amelaa, kangwa gwanda ifuma kahika karadu na iho elekonjwa akeri amepa. ¹⁰ Kake Paulo nyelesaka gwanda, nyelekulora, icho amonyi ue yake, kamumanya. Kavi kaamba, ''Mlalemwa, ko mekoje arukie.'' ¹¹ Kavi kadoja kavi kahi na kauberinjwa mkate, kaja. Kivekeri amededa navo kilehie mpa angera, kakure. ¹² Vakamwende msoro akeri arukiye vakaghorokina munu. ¹³ Ise divenyi dilesongwa oshangunyi lo Paulo ko meli na dikadambuka nso, andu ise depangie dimuirie Paulo ipo. Iki nyikio icho amenyi ewri iuta, kokitevi elepanga idambuka idia orika luomia. ¹⁴ Edishikia ipo Aso, dikamudosiria meli nyi dikadambuka Mitilene. ¹⁵ Kavi ise dikafuma ipo na mufuru o kavi dikashika ngaliko ya kavi o kisiwa kiya kio. Mkono ulevadia, dikashika kisiwa kiya samo, na ngamaingi dikashika muri o Mileto. ¹⁶ Ko mekoja Paulo ekeri ameona nadambuka idia Efeso, kinesa kee alairie muda wowose kuja Asia; ko amunyeuri dambuka movinyi Yerusalemu ko kitevi kiya sikukuu ya Pentekoste, cha mbele kiveva icho iruda isho. ¹⁷ Ifuma Mileto kaduma vandu mpaka Efeso na kavadikiravasuri va ikanisa. ¹⁸ Veshika kwake, kavavia, inye muveyi mwichi ifuma mkono o kuoka gelekure iha Asia, chakundu gevekeri kwanu mfuru wose. ¹⁹ Gelemuja Mndumi ko nganyi yose na ko msoru, na valengiada inyi ko kitevi kiya Vayahudi. ²⁰ Namwichi chakundu kivekeri gekusangiriana itangaza kwanu kiokose kisa kiveode na chakundu inyi gelevaloshia bwanga bwanga na kavi idambuka ko numba ko numba. ²¹ Namwichi chakundu inyi geledambuka indevaitanava Vayahudi na Vayunani uye ye dumbuja ko Makilunga na inyi ko Mndumi odu Yesu. ²² Na lwaha, lambwenyi, inyi, gakeri gakena mwadanya mumu o Mwele idambuka Yerusalemu, ngalamanye shindo shisa shipengifumia inyi ipo, ²³ Kake komekoja mumu Mwele yuchingishuuda inyi ko kila muri na kaamba kee minyororo na mateso nyisho shikenanginevedeja. ²⁴ Kake inyi chi kusara kee maisha vakwa nyi konjia yoyo ya nduwe kokwa, kinesa imarija kiaro kikwa na iruda gelewadija ifuma ko Mndumi Yesu, ko ishudia injili ya mbora ya Makilunga. ²⁵ Naluha, lambua, gaichi kee sose, gholasi ya vaja muledambuka idedia Umangi, mupengiona kiamu kavipo. ²⁶ koikio ganavashudia inu iki, kee ngaode uvichwa ko ndakame ya mundu wowose. ²⁷ Amu ngelekutiricha ivachilienyi ifuda chose ja Makilunga. ²⁸ Koikio muve melambwa uye yanu inywe muvenyi, na uye ya indiki chojose jisa mumu Mwele amevavikia inywe iva velambwa. Venyi molambua ijiringa ikusangiria ja Mndumi, jisa jilewra ko ndakame yake amonyi. ²⁹ Ngaichi kee ngakure jakwa, kite masui vakarije vapeingi kwanu, na valapejiona makene indiki. ³⁰ Gaichi kee ata gholosi yanu muvenyi vengi vandu vapecha na eamba shindo shedesa, kinesa ivaburua valashwa vavadia ivo. ³¹ Ko ikio muve meso. Kumbukenyi kee ko miaka iradu geledima ivatiapo ivaloshia kila umu wanu ko musoru kiyo na musanyinyi. ³² Na lwaha inyi ngenigia ko Makilunga, na ko kidedo kiya mbora yake, jisa jipedima ivashumba na ivanigia urisi kimu navo vose velevikiwa wakfu ko Makilunga. ³³ Ngeadwa ndakire hela, dhahabu, ana nguvo. ³⁴ Mwichi inywe muvenyi kee moko iva veleginingia shindo shakwa ngimonyi na shindo na vaja vekeri kimu nainyi. ³⁵ Ko shindo shose gelevaningia mfano o chakundu kiinyariye ivatarama valemujwa ko irunda uya, na chakundu kiinyarie ikumbuka shidedo sha Mundumi Yesu, shidedo shisa icho amonyi eleamba: ''Nyi nafuu ifuma ipo iadija.'' ³⁶ Kingeri amededa kudo, nyeleilika ndikatereva kimu navo. ³⁷ Vose vakafunga munu na imuguja Paulo njingonyi na imuka kisi. ³⁸ Munu ya shose ko kitevi kia kija kisa kija emekiamba, kee too vapeona kiamu kiakepo. Kavi vakamuia merikembunyi.