¹ Kigheri ikyo mfalme Herode kalora kughoko kwake ko waitale wafumie indiki ja waitania. ² Kamwagha Yakobo mnwavwo na Yohana ko ipanga. ³ Iho wakaona Wayahudi wapeghorokwa wakandemwada na Petro kawi. Iki nyi kigheri kija kya mikate iya iladodorikye. ⁴ Emwada, kandera geresani na idera maaskari wamringe, avwedeje apendamaja ko wandu Pasaka imeiida. ⁵ Petro kaderwa geresani, kake kiterevwo kikantwa ko pinya sose na indiki ko kitevwi kyake ko Makilunga. ⁶ Mkono Herode alamemfuna, kiyo kyo Petro alee makidi ya maaskari wawi, apungwa mnyororo iwi, na vwaringi mbele ya mongo vwekenaringa geresa. ⁷ Lambwa, malaika wa Mndumi wakamfumia turukija na kilangaro mmbenyi. Kamvwa Petro mbari na imtukura kambia, ''Tukwa movwinyi.'' Iho mnyororo epungwa ikapunguka mawokonyi kwake. ⁸ Malaika kambia, ''Rara seri sapo na shadu shapo.'' Petro kauta kudo. Malaika kambia, ''Rara seri yapo ungiwadie.'' ⁹ Nakudo Petro kambandia Malaika na ifuma nja. Aleona mwidikije kindo kyo Malaika alekiuta ke na kya loi nyaleona cha ndoswa. ¹⁰ Andu wameida iringo ja kuvwoka na ja kawi, wakashikya mongo o menya ofuma ienda sangenyi, jikapunguka jiwenyi ko kitevi kyavwo. Wakafuma nja wakasoka nganasenyi, Malaika kanda. ¹¹ Petro kakumanya, kaamba, ''Lwaha ngaidikija ke Mndumi Malaika aoke na chengifuna mawokonyi wa Herode, nawo vweode msigha o wand wose wa Uyahudi.'' ¹² Iho imanya ikyo kacha numba ya Mariamu mae o Yohana amu nyicho Marko; Wakristo wafoje vwalekusang'irya wetevwa. ¹³ Iho ekawa tasinyi mongo ushingwa, mrundi umu mpu edudikirwa Roda kacherughwa. ¹⁴ Emanya ke nyi Petro, ko sia ilemwada kalemwa rughwa mongo; kakambia na numbenyi inendeongwa ke Petro acho amkie mongo. ¹⁵ Koikyo, wakambia, ''Iwe nyowukwa sui kake kaamba nyiloi nacho. Wakaamba ''Icho nyi malaika oake.'' ¹⁶ Kake Petro naikawa tasinyi, na werughwa mongo, vwakamwona, vwakaingasio. Petro kawawia wavwe sau ko kughoko na ivwawia chandu Mundumi alemfuna Geresani. Kaamba, ¹⁷ ''Muvwawie shindo shi ko Yakobo na wana vwa mae.'' Ade kakure kaenda kivwari kingi. ¹⁸ Kukawa msanyanyi, maaskari, waktafunyika chakundu kindo kilefumia ko Petro. ¹⁹ Iho Herode kamshigha na alemwona po, kawawesera waringi katanawa waghwa kaenda ifuma Uyahudi mpaka Kaisaria na indedamia po. ²⁰ Herode nyewewode na wanda wa Tiro na Sidoni. Wakaenda andwamu kwake. Wakaenda umong'o na Blasto mtarami o mfalme, nawatarame. Ade wakaterevwa maucha, kitevi orika lwavwo lukinewadija kando kikenafuma orika lo mfalme. ²¹ Kuwewode mkono uweteng'eserwa Herode naraweseri yake ya kimangi na idamia kitirinyi kya kimangi nachile. ²² Wandu wakakawa olodo, ''Iki nyikidedo kya Makilunga chi kidedo kya mwanadam!'' ²³ Turu kya malaika kamkawa, kitevi alemnenga Makilunga uele po; kajua na chango kapa. ²⁴ Kake kidedo kya Makilunga kikaleha na itaghanyika. ²⁵ Iho Barnaba na Sauli wakamarija urundi wavwo wakafuma wakawuya Yerusalemu, wamwiriya na Yohana amu nyiho rina jake jakuwoneka nyicho Marko.