¹ Mapema mfiri we voka wa juma, mma urathia, Mariamu Magdalena alichie mbirenyi akavona ighwe liya livutirwe mbirenyi. ² Hena ikyo akaricha fia ighenda kwa mgheloshwa ungi ngewe Yesu alemfirie, kangi akavavia, "Vandemu ondoa Mndumi mbirenyi, naifwe fuichifwe handu vamrere." ³ Niho Petro na uya mgheloshwa ungi vakafuma, ighenda mbirenyi. ⁴ Voshe vakaricha fia handu hamwi; uya mgheloshwa ungi alerichie fia mnu ikela Petro naifika mbirenyi we voka. ⁵ Akamka na niho akalolea mbirerinyi; akaivona iya thanda ya kitani ilee, mira aingiriewe voshi. ⁶ Niho Simon Petro nawe akacha akaingia voshi ya mbira. Akaivona thanda ya kitani ilee haya, ⁷ na iya leso igheke mrwenyi haya ileleeyo hamwi na iya thanda ya kitani mira ilelee pembenyi yoka. ⁸ Niho uya mgheloshwa ungi nawe akaingia voshi ya mbira; akavona na iirikilia. ⁹ Kwa ku hata igheri iyo valekevo vakighamanya maandiko iku ilemvaie Yesu akie he hena vapfwie. ¹⁰ Niho vagheloshwa vakaghenda vakaghenda he kenyi kwavo. ¹¹ Hena kwiyo Mariamu alemki mbirenyi akifugha, akiva akyaendelea ifugha igheri amki niho akalambua mbirenyi. ¹² Akavona malaika vavi vaghire kyamu kya njewa vaikee umwi mrwenyi na ungi marendenyi handu ngeho Yesu avelee. ¹³ Navo vakamvia,"Mndu wakika haniki kufugha? Nawe akavavia, "Ni kwa liya vandemuondoa Mndumi wa kwa, na inyi siichinyi handu vamvikie." ¹⁴ Ekinamalie irera kwiyo, akaghaluka na imvona Yesu akiva amki. Mira ammanyirewe iku itho ni Yesu. ¹⁵ Nawe Yesu akamvia, "Mama, haniki kuafugha? kuamkasha ii? "Nawe kunuakighamba iku ni mgheria bustani akamvia, "Mndumi kole ni iwe kumuondorie, njivia handu kumvikie, na inyi namuondoa." ¹⁶ Yesu akamvia, "Mariamu." Nawe akaghaluka weka na imvia hena kiaramu, "Raboni," ii ikiva niirera ("Mwalimu.")Mghelosha. ¹⁷ Yesu akamvia, kunanjibalia, ang'u thinakweanyi kwa papa; mira ughende kwa veru ughevavia iku niavuka ighenda kwa Papa wakwa ngewe kangi Papa wenyu. Ruva wakwa na Ruva wenyu." ¹⁸ Mariamu Magdalena akacha ivavia vagheloshwa, "Ni mvanire Mndumi," na iku anjivirie findo ifi. ¹⁹ Na ikinave kyavukwau, mfiri itho, mfiiri wevoka wa juma, na milango ikiva ipfunngiwe handu vagheloshwa vaghekeho kwa ivaovoha Vayahudi, Yesu akacha na imka maghari yavo na ivavia, "Mborere iwe kwenyu." ²⁰ Akinamalie irera ifi akavarora mavoko ghakwe na mbaritakwe. Navo vagheloshwa vakinamvone Mndumi vakanuliwa. ²¹ Niho Yesu akavavia he, "Mborere iikae na imwe. Thafundu Papa anjirumie inyi, kwiyo kwiyo nainyi niavaruma imwe." ²² Yesu akinamalie irera navo ifyo, avanika akavavia, Ghuhienyi Mbeho mcha. ²³ Wowoshe mwamreghea thambi, areghewa nawe; na vaya mwavapfungia vapfungiwa." ²⁴ Thomaso, umwi wa vaya ikumi na vavi, achilaghwa Didimas, aghekehowe na vagheloshwa varwee Yesu ekinache. ²⁵ Vaya vageloshwa vengi kamtungo vakamvia, "Fundemvona Mndumi." Nawe akavavia, "Kole thiravonine ngori ta misumari hena mavoko ghakwe na ivika minywi ya kwa hena ngori to na ivika kuvoko kwakwa hena mbari yakwe thikairikilienyi. ²⁶ Hena mfiri wa mnane vagheloshwa valeke ghari kangi, nawe Thomaso aleke hamivi navo. Igheri fyoti fipfungiwe Yesu akamka maghari yavo na akarera, "Mborere naive na imwe." ²⁷ Niho akamvia Thomaso, ende mnyu wapfo na uvone mavoko hakwa; ende iha mavoko ghapfo; na uvike hena mbari yakwa nanga kunava arairikilie mira airikilie. ²⁸ Nawe Thomaso akaghalua na imvia, "Mndumi wakwa na Ruva wakwa. ²⁹ Yesu akamvia, ku kundevona, ukairikilia. Vabarikiriwe vo vairikilie, varavonire." ³⁰ Niho Yesu alehirire ishara nyingi mothia ya vaghelosha, ngeto aranatiandika hena kitabu iki; ³¹ Mira iti tiandikiwe netha ku muirime iirikilia iku Yesu niwe Kristo, mwana wa Ruva, na iku muirikilie muve na ikia hena irina yakwe.