¹ Yesu aghererie findo ifi, niho akavutira mitho ghakwe akalolea kaghu kwa Ruva na akarera, Papa, thaa indefika; mtumbishe mwana nawe akutumbishe iwe. ² Thafundu kughemnikie mamlaka kaghu ya fyoshe fihire mwiri netha avanike ngalamo telele vayavoshe kulemnikie. ³ Ii niyo ngalamo telele: iku vakumanye iwe, Ruva wakeni na weka, na uya kumruwe, Yesu Kristo. ⁴ Nighekutumbishire iha ithangenyi na imalia ndima ngeyo kughenjinikie niihire. ⁵ Luvaha, Papa, anjitumbishe inyi hamwi na iwe kweka hena nigheke natho hamwi na iwe ithanga linararumbwa. ⁶ Nilerughulie irina yapfo hena vandu kunjinikie iha ithangenyi. Nile vandu vapfo; mira ukanjinika inyi. vavwere kirero chapfo. ⁷ Luvaha vaichi iku kindo kyokyoshe kunjinikie inyi kifumie kwapfo, ⁸ hena virero fiya kunjinikie inyi-Nindemivanika vo virero ifyo.Vaghaghuhirie na keni vakayamanya ku inyi nifumie kwapfo, na vakairilia iku iwe niwe kunjirumie. ⁹ Niavalombea vo. Thialombeanyi ithanga mira vaya kunjinikie kwa ku vo ni vapfo. ¹⁰ Findo fyoshe ngefyo fyakwa; na inyi niatumbishwa hena fyo. ¹¹ Inyi thikenyi ithangenyi; mira vo vake ithangenyi, na inyi luvaha niacha kwapfo Papa Mtakatifu, vatundhe hena irina yapfo liya kufunikie ifwe netha vo navo vave na vumwi thafundu inyi na iwe fukehe na vumwi. ¹² Igherinike navo, nighevarilie hena irina kunjinikie; Nivarilie, nahaghireho hata umwi wavo arekie there mwana uya we teka, netha ku virero fikoloke. ¹³ Luvaha niacha kwapfo; mira niarera ifi ithangenyi netha ku inuliwa yakwa koloshwe voshi yavo voka. ¹⁴ Nikivanikie kirero chapfo; ithanga lindevadaha kwa liya vo thi va ithangenyi; thafundu inyi there wa ithangenyi. ¹⁵ Thiavalombenyio iku uvavute ithangenyi mira uvarie na uya mvichwa. ¹⁶ Vothi va ithangenyi vo thafundu inyi thiravie wa ithangenyi. ¹⁷ Vave vaelesherwe kwapfo kweka hena keni; Kirero chapfo niyo keni. ¹⁸ Kulenirumie ithangenyi, na inyi ni nindevaruma ithangenyi. ¹⁹ Hena ikyo fundu fwavo inyi njeka niakufunya kwapfo netha ku na vo wakufunye kwapfo hena iya keni ²⁰ Thi ivadu niavalombea, mira na vaya vanjiirikilia iiria kirero chavo. ²¹ Netha ku vo navo vave hena umwi, thafundu iwe Papa, kuke voshi yakwa na inyi voshi yapfo. Niavalombea netha ku vo kangi vairime iva voshi yeru netha ithanga liirime iirikilia ku iwe niwe kunjirumie. ²² Utukufu uya kunjinikie inyi- nindenika vo netha ku vairime iva vamwi, thafundu, ifwe fuke na vumwi. ²³ Inyi voshi yavo, na iwe voshi yakwa, netha vairime ikoloshwa hena vumwi; netha ithanga limanye ku kididi iwe ni we kunjirumie, na ivafura,thafundu iwe kughenjifurie, inyi. ²⁴ Papa, kiya kunjinikie inyi Nighiremacha ku navo kangi vairime iva hamwi na inyi handu nikei netha vairime ivona utukufu wapfwo, uya kunjinikie; hena ku iwe kughenjifurie inyi iogheri mithingi ya ithanga iranarumbwa. ²⁵ Papa aghire kitea, ithanga likumanyireyo iwe, mira inyi nikuichi iwe; navaichi iku kulenjirumie. ²⁶ Nilevikie irina yapfo limanyike kwavo, nahira kwii limanyike netha ku liya ifura ngeyo kwayo kughejifurie inyi liirime iva voshi yavo , na inyi liirime iva voshi yavo.