1 Yaringa nsiku ebhiri egyene enjangi ya epasaka emariri kuhwa na eya emikate ginu gitaturwa obhutunduru. Abhasyengeri abhakuru na abhang'orya bhanga bharatuna omweya gwa okumugwata Yesu kwa orwango na okumwita. 2 Kwa okubha bhagambha, "Gutari omwanya gunu ogwa enyangi, abhantu bhataja bhakore eriihe. 3 Eribhaga rinu Yesu yanga Bethania iika wa Simoni omugenge, na anu yaringa arasuntara kumeja, omukari umwi yaja kuweki yanga na enchupa ya amaguta amarange aga nardo amajomu aga obhughuri obhunene bhukongu, akatya enchupa na okwitira eguru ya omutwe gwaye. 4 Nawe bhanga bhariho abhandi bhanu bhajima. Bhakabhuran'ya abhene kwa abhene bharagambha, "Okubhurya kuru nkwaki?" 5 Amarange ganu garigaratuna okuguribhwa kwa eguru ya dinari magana gasatu, na bhakahanwa abhotobhu." Bhonse bhakamukan'ya. 6 Nawe Yesu akagambha, "Mumutige omwene. Kwaki muramunkya? Akoreri engana enjomu kuoni. 7 Eginsiku gyonsego abhatobhu munabho na omweya gonsego gunu muregombha mwatura mukakora amajomu kubheki nawe mutaribha hamwi na oni kumweya gonsego. 8 Yakora kinu aratura, yahaka omubhiri gwani amaguta kwa orusumo rwa obhubhiki. 9 Kwa obhuhene ndabhakerya, kira ahasi hanu ering'ana rirara rikwa mukyaro kyonsego, kirya yakora omukari uyo kirihahirirwa kwa obhuhitukya bhwaye. 10 Kweki Yuda Iskariote, oumwi wa bharya ekumi na bhabhiri, akagya kubhakuru bha abhasyengeri kumukorera eniku kubheki. 11 Eribhaga abhakuru bha abhasyengeri hanu bhegwa gayo, bhakajomerwa na bharaha okumuhana egimbirya yambha, okutuna omweya ogwa okumerira eniku kubheki. 12 Kurusiku rwa okwambha eya omuka gunu gutaturirwemo ekimera, eribhaga rinu bharusya omwana wa eng'ondi wa pasaka abhahigira bhaye bhakamukerya, "Orenda tugyeha twiseren'ye omanye okurya ebhyakurya bhya epasaka?" 13 Yatuma abhehigirya bhaye bhabhiri na okubhakerya, "Mugende mumugi na omusaja unu agegere ensego atimahana na bhenyu mumusingirire. 14 Enyumba inu arisohamo, mumusingirire na mumukerye omwene enyumba iyo. Omwihigirya yagambha, "Kiringiha ekyumbha ekya abhageni hasi hanu ndarye epasaka na abhehigira bhani?" 15 Aribhorokya ekyumbha kya eguru ekinene ekya obhwera kirosibhwe kubhageni. Mukore obhwera kumweya gwetu gurya. 16 Abhehigira bhemuka bhakegya mumugi, bhanyora kira ekintu kya ego yaringa abhakererye, na bhasemya ebhyakurya bhya epasaka. 17 Eribhaga rinu ryabha mugorobha, yajana bharya ekumi na bhabhiri. 18 Na hanu bhanga bharasuntarira emeja na okurya, Yesu akagambha, "Kwa obuhene ndabhakerya, "Oumwi hagati yenyu unu turarya hamwi nawe arinkorera eniku." 19 Bhonsego bhakasurumbhara na oumwi kwa oumwi bhakamukerya, nawe atari oni? 20 Yesu akabhakyukya na okubhakerya, "Ni oumwi wa erikumi na bhabhiri hagati, yenyu oumwi unu bhono matogya mu kitubho hamwi na oni. 21 Kwa okubha omwana wa Adamu arigenda kya ego amang'orwa kya ego garagambha eguru yaye. Nawe tiga orore omuntu urya kuhitira kuweki omwana wa Adamu arikorerwa eniku! Ekabheri bhujomu bhukong'u kuweki kya ego omuntu urya atakebhwire. 22 Hanu bharinga bhararya, Yesu yagega omukate, akagunoka na okugusunura. Akabhana na okugambha, "Mugege gunu mumubhiri gwani." 23 Yagega ekikombhe, akakumya na okubhana na bhonsego bhakakinywera. 24 Akabhakerya, ganu rumanyinga gani ga erira gano, amanyinga ganu garetike kwa orusumo rwa abharu. 25 Nawe ndabhakerya ntarinywa kweki hagati ya ebhimerya bhinu ebhya omujabhibhu mpaka orusiku rurya ndinywa amahya mubhukama bhwa Waryubha." 26 Hanu bhamara okwimbha okwimbha orwimbho, bhakagya kibhara munkuku gya emijeituni. 27 Yesu akabhakerya. Bhenyu bhonsego muribha hare kurusumo rwani, kwa okubha yang'orwa, "Ndimutema omurisya na amangondi ganyaragane. 28 Nawe kwa obhuyuki bhwani, ndibhakangatira kubhukangati bhwenyu kugya Galilaya. 29 Petro akamukerya, "Kama bhonsego nyore bharikutiga oni ntarikutiga. 30 Yesu akamukerya, "Mbhuhene ndakukerya, obhutiku bhunu ensarigoko etaragura orya akabhiri orinyanga mara kasatu." 31 Nawe Petro akagambha, "Nawe ndesingirirya kukwa na uuwe nawe ntakutige" Bhonsego bharaha irya irya. 32 Bhakaja ahasi hanu harabhirikirwa Gethsemane, na Yesu akabhakerya abhehigiribhwa bhaye, "Mwikare hanu kumweya gunu ndasasama. 33 Yabhagega Petro, Yakobo, na Yohana hamwi nawe, akambha okusuru mbhara na okunyanka bhukong'u. 34 Akabhakerya omutima gwani gusurumbheri bhukong'u hata okukwa, mutigare hanu mpaka kukya. 35 Yesu yaangya kubhukangati hake, akagwa hansi akasabha nyoore ekaturikeni ensa inu ekamurwirwiko. 36 Akagambha, Aba, Taata, amang'ana gonsego kuuwe garaturikana. Ndusi ryaho ekikombhe kinu. Nawe kutari kwa ameega gani hanu kwa amega gaho. 37 Akahunjuka akanyora bhareri na okubha na kerya Petro, "Simoni oreri? Otaturiri okutengeja hata nsaa imwi? 38 Mutengeje musabhe mutaja kusoha mumasakyo. Mbhuhene omutima gurenda nawe omubhiri murosu." 39 Akagya kweki no okusabha na akahahira amang'ana garya garya. 40 Akaja kweki akabhanyora bhareri, kwa okubha ameso gabho ganga marito na niki ekya okumu kerya. 41 Akaja orwa akasatu na okubhakerya, "Kweki mukyareri na okumunya? Gesiri! Ensa ehikirii maha omwana wa Adamu wakorerwa eniku mumabhoko agabhasarya. 42 Mwimuke tugende, Maha, unu arandira eniku arihang'i" 43 Hanu yaringa akyahahira Yuda oumwi wa bharya ekumi na bhabhiri, yahika omuganda omunene okurwa kubhakuru bha abhasyengeri, abhang'orya na abhakoruka abha ebhyogi na egimuga. 44 Eribhaga riyo omuri wa eniku waye, yaringa abhaheri ekimanyiriryo, agambha, urya nu ndamubhuusu ng'o mumugwate na okumuhira insi ya obhurindi. 45 Eribhaga Yuda hanu yahika, rumwi rumwi ego akagya ku Yesu na okugambha, "Omwihigirya" na akamubhusu. 46 Kweki bhakamutura insi ya obhurindi na okumugwata. 47 Nawe oumwi hagati yabho unu yaringa yemiriri hang'i nawe akaruta ekyogi kyaye akamutema omukori wa omusyengeri omukuru na okumugega okutwi. 48 Yesu akabhakerya, mujiri okungwata kwa ebhyogi na egimuga nkya omwibhi? 49 Eribhaga kira orusiku naringa na bhenyu na okwihigirya mwisyengerero mutangwata. Nawe rinu ryakoreka amang'ore gahika. 50 Na bharya bhonsego bhanu bharinga na Yesu bhamutiga na okukenya. 51 Omumura oumwi yamusingirira unu yanga yebho heri esyuka eyene inu yanga yekundikirye okumwinarira, bhamugwata nawe 52 akakurumuka akatiga hayo esyuka akakenya kinabhi. 53 Bhakamukangatya Yesu kumusyengeri omukuru. Harya bhekuman'ya nawe hamwi abhasyengeri abhakuru bhonsego, abhakaruka na abhang'ori. 54 Petro wonse yamuseta Yesu kwa hare, okugya kurubhago rwa omusyengeri omukuru. Yekara hamwi na abharindi bhanu bhanga hang'i na omuroro bharoota bhabhe na eribhirira. 55 Eribhaga riyo abhasyengeri bhonsego na eribharaja ryonsego bhanga bharatuna obhwimiriri eguru ya Yesu bhanyore okumwita. Nawe bhabhunyora. 56 Kwa okubha abhantu abharu bhareta obhwimiriri bhwa orubhehi eguru yaye, nawe obhwimiriri bhwabho bhutahunkana. 57 Abhandi bhakemirira na okureta obhwimiriri bhwa obhubhehi eguru yaye, bharagambha, 58 Twamwiga aragambha, ndarisarya erisyengerero rinu ryahagajwa kwa amabhoko na kumweya gwa eginsiku gisatu ndahagaja erindi rinu ritakukorwa kwa amabhoko. 59 Nawe hata obhwimiriri bhwabho bhutahunkana. 60 Omusyengeri omukuru yemirira hagati yabho na akamurya Yesu, "Bhoono otaana erikyukyo? Abhantu bhanu bharemiriraki eguru yaho? 61 Nawe akekara akiriri na atakyukya kyokyonse. Kweki omusyengeri omukuru akamubhurya, "Uuwe ng'o Kristu, omwa wa omunonkwa?" 62 Yesu yagambha, "Oni noni" Na oramurore omwana wa Adamu yekeeri okubhoko kwa obhuryo kwa eginguru araja na amasaru ga murwire." 63 Omusyengeri omukuru yatamura egingibho gyaye na okugambha, "Kweki mukyatuna abhemiriri?" 65 Mwiguriri enjero. Obhwamuri bhwetu mbhuha?" Na bhonsego bhakamujibhya kya oumwi unu arenderwa oruku. 64 Abhandi bhakamubha okumujira amate na okumundikirya obhushu na okumutema na okumukerya, "Roota" Abhakuru bhakamugega na okumutema. 66 Na Petro hanu yanga akyari hansi murubhago, omukori oumwi owa abhahara bha omusyengeri omukuru akaja kuweki. 67 Akamurora Petro hanu yaringa yemiriri arota omuroro, na akamumahirira na okumusuntarira. Kweki akagambha, "Na uuwe wonse wanga na omunajareti Yesu." 68 Nawe akanga na okugamba, "Ntamanyiri kweki ntakumanya eguru ya kinu oragambha," Kweki akahuruka akagya kibhara kurubhago. Na ensarigoko ekaragura. 69 Nawe omukori wa ekikari hayo, akamurora na okwambha okubhakera kweki bharya bharinga bhemiriri harya, "Omuntu unu ng'umwi wabho." 70 Nawe akanga kweki. Kwa omwanya omuke bhanu bhanga bhemiririi harya bhanga bharamukerya Petro, "Nawe oringi oumwi wabho, kwa okubha wonse oringi Mugalilaya." 71 Nawe akambha okwitura omwene insi ya ekiwi na okutena, "Ntamumanyiri omuntu unu muragambha." 72 Kweki ensarigoko ekaragura orwakabhiri. Kweki Petro yahituka amang'ana ganu Yesu yanga amukererye." Hanu ensarigoko yanga ekyari okuragura orwa akabhiri orinyanga mara kasatu" Na yagwa hansi na okukura.