¹ Orusiku orumwi rwa Esabhato Yesu yaringa arahita mmumigunda ga egingana hamwi na abhehigira bhaaye. Bhayo bhaabhunanga ebhigara bhya egingano bhakabhunga na amabhoko bhakarya egi nheke. ² Mbe abhafarisayo abhandi bhakabhabhurya ega. Ndegwa murasarya amaragiriryo ga Waryubha muragesa ebhigara bhya egingano orusiku rwa Esabhato? ³ Yesu akabhakyukya ega. Bheenyu mutarasoma mumang'ore amarabhu kya ego omukama Daudi yaakora na abharikyaye? Hanu bheegwa omweko. ⁴ Weeki yasoha murirema ra Waryubha akagega emikate ginu gaaringa giteerwe embere ya Waryubha akarya na akahana ko abharikyaye. Kora ego yang'oorwa mumaragiriryo ganu Musa yahanwa okurya emikate gya ekabhira inu mumbasyengeri abhenego. ⁵ Yesu akongerya okugamba ega omwana wa Adamu ng'o omukuru kurusiku rwa Esabhato. ⁶ Orusiku orundi rwa Esabhato Yesu akasoha murisinagogi akamba okwihigirya abhantu munyumba muyo yaringa mo omuntu oumwi unu okubhoko kwaye kwa obhuryo kwaaringa na omujimu. ⁷ Kweki bharingamo abhehigirya bha amaragi riryo ga Waryubha na abhafarisayo bhaatunanga ekisigo kinu kirakore bhamujongere Yesu kwa ego bhakaganya bharore nyoore aramu hwenye omuntu orusiku rwa Esabhato. ⁸ Nawe Yesu akamanya ganu bharinga bhare ganirirya. kwaego, Yesu akamukerya omuntu wa okubhoko kwa omujimu Njo imirirya gati hanu omuntu huyo akaja akemirira gati yabho. ⁹ Nho, Yesu akabhabhurya abhantu bhayo ndabhabhurya bheenyu orusiku rwa Esabhato, amaragiriryo ga Waryubha garatura girirya okukora egaki? Amang'ana amajomu kasi amabhibhi? okuturya obhuhoru kasi okusikya?" ¹⁰ Aakamahirira abhantu bhonsego mbaragyonsego, bhanu bharinga barya. Hanu yamara akamukerya omuntu uyo ega, imya okubhoko kwaho omuntu uyo anu yeemya okubhoko kwaye rumwi ego kubhahwenya. ¹¹ Abhafarisayo bhayo bhakajima bhukong'u bhakabhuranya kya ego bharamukorera Yesu ambhibhi. ¹² Kuginsiku giyo, Yesu akariina munkuku okusabha, Waryubha akasabha obhutiku kukya. ¹³ Nahanu bhwakya akabhirikira abhehigira bhaaye. Gati yabho akasoramo ekumi na bhabhiri akabhatoga "Abhatumwa na abhatumwa mbo bhanu. ¹⁴ Simoni unu Yesu yaatoga Petro, Andrea omumura wabho Simoni, Yakobo, Yohana, Filipo, Bhatoromayo. ¹⁵ Mathayo, Tomaso, Yakobo, omumura wa Alfayo, Simoni oumwi wa ekyama kya Zelote. ¹⁶ Yuda omumura wa Yakobo, na Yuda Iskariote unu yamara okumokore ra eniku. ¹⁷ Yesu akeeka okurwa munkuru, hamwi na abhehigira bhaaye. Nahanu yahika ahasi na orwanjare akeemiirira ahasi hayo bharinga bhekumeriye ho abhehigira bhaaye abhaaru na omuganda gwa abhantu abhandi okurwa egimbara gyonsego gya ekyaro kya Yudea na mumugi gwa Yerusalemu na okureka kumurambo gwa kumigi gya Tiro na Sidoni. ¹⁸ Abhantu bhayo bhaaja hayo okumwitegerera Yesu na okuhweni bhwa amarweri gabho kora bhanu bharinga bharanyankibhwa na ebhihwi ebhibhibhi akabha arabhahwenya. ¹⁹ Abhantu bhayo bhonsego bharinga bharenda okumukunya kwaokubha yaringa na eginguru gya okubha hwenya. ²⁰ Yesu akabhamarira abhehigira bhaaye bhayo akabha kerya ega. Bheenyu abhataka munonkwe kwaokubha bheenyu mbo abhantu bha obhukama bhwa Waryubha. ²¹ Mwanonkwa bheenyu bhanu mureegwa omweko bhoono ego kwa okubha murigutibhwa Mwanonkwa bheenyu bhanu murakuura bhoono ego kwaokubha muriseka. ²² Mwanonkwa bheenyu nyoore abhantu bharibhajimira na okubhaahura bharibhatuka na okubhakerya ega bheenyu mumbasarya ku orusumo rwa omwana wa Adamu. ²³ Hanu gayo garikoreka orusiku ruya mujome rwe kya ego muratema eng'oma okubina mumanye ega muribha muratuurirwa omutuho omunene murwire. Kweeki bhajaaji bha abhantu bhayo bharinga bharabhanya nkya abharooti bha Waryubha ego ego. ²⁴ Nawe kubheenyu abhaani murikirara ko kwaokubha mumariri okunyoora obhwami bhweenyu. ²⁵ Murikirora ko bheenyu bhanu mureguta bhoono ego kwaokubha muribhanga mureegwa omweeko. Murikiroora ko bheenyu bhanu muraseka kwa okujomerwa bhoono ego kwaokubha murikuura na okuraama. ²⁶ Murikirora ko bheenyu nyoore abhantu bharabhakumya kwaokubha kora bhajaaji weenyu ni ego bhariinga bharakorera abharooti bha obhubheehi. ²⁷ Ndabhakeerya bheenyu bhanu muranyitegerera ega muhanje abhasigu beenyu. Na abhantu bhanu bharabhajimira bheenyu mubhasereriye. ²⁸ Na bhanu bharabehima bheenyu mubhanonke. Na bhanu bharabhanyankya bheenyu mubhasabhire ku Waryubha. ²⁹ Hanu omuntu arakujeera akuteme kumboto imosi omukyuki rye na eindi. Na hanu arakurusye ekibhuuti yaho omutigire egege na esyati. ³⁰ Wowonse hunu arakusabhe ekintu omuhaane. Na hanu omuntu arakurusye ebhuntu bhaho otamusaba akuhunjukirye. ³¹ Mukorere bharikyenyu kya ego bheenyu murenda bhabhakorere. ³² Hanu mura hanje bhanu bhabhahanjiri bheenyu oranyoora munyooreri mkuma ki? Kora abhasarya bharahanja bhanu bhabhahanjiri! ³³ Kweeki nyoore murasereriya bhanu bharabha sereriya abhene go oranyoora munyooreri nkumaki? Kora abhasarya bharakora ego! ³⁴ Kweeki anu murabhahane esiiri bhanu bha retegerera ega bharibhahindirya abhene go oranyora monyoreri nkumaki? Kora abhasarya bharahana esiiri abharikyaabho. Oranyoora bhareetegerera ega bhayo bharibhahindi rya ebhintu bhyabho bhyonsego. ³⁵ Nawe bheenyu muhanje abhasigu bheenyu na mubhaserenye. Mubhahane esiiri mutige okwitegerera okuhindiribhwa. Waryubha aribhahana omutuho omunene na muribha abhana bha heene ku weeki Omukuru wa bhonsego. Kwaokubha Waryubha arasereriya kora bhanu bhatakumukumya na abhakori bha obhusarya. ³⁶ Mubhe abhantu bhanu bharabhira abhandi kya ego esewenyu arabhira abhantu. ³⁷ Mutige okutong'ana abhandi na bheenyu mutari tong'anibhwa. Mutagamba ega abhandi bhajibhibhwe na bheenyu mutarijibhibhwa. Mwabhire abhantu bhanu bhabhasarirye nho na bheenyu muryabhirwa. ³⁸ Muhane abhantu kinu bhareenda nho murihanwa omutuho omunene kya omuntu hunu arahanwa endengo ijwiri na okwigatirwa esingisibhwe eretikirira. Kwa okubha endego irya irya murarengera abhandi ng'yo na bheenyu murirengerwa. ³⁹ Yesu akabhakeerya ekirengyo ega, omuhoku ara okorokererya omuhoku omurikyaye? Ndamanya bhonsego bhabhiri bharagwe muriiko! ⁴⁰ Omwihigira atakubha omumanyi okukira omwihigirya waaye. Nawe omwihigira hanu arimara okwihigiribhwa nho arihunkana omwihigirya waaye. ⁴¹ Orarora abhusarya bhwa omuhiri waaho kya eking'eni ng'eni kinu kiringi muriiso ryaaye nawe atakurora obhusarya bhwaho kya ensonko inu eringi muriiso ryaho? ⁴² Kasi, oratura egaki okumukeerya omuhiiri waaho ega muhiiri wani tiga nkurusye eking'ening'eni kinu kiringi muriiso ryaho enu uwe omwene otakurora ensonko inu eringi muriiso ryaho. Nho orarare bhwahene oture okuruusya eking'eni ng'eni kinu kiringi muriiso rya muhiiri waaho. ⁴³ Gutariho omuti omujomu gunu guraama emisumo emibhibhi. Gutariho omuti omubhibhi gunu gurama emisumo emijomu. ⁴⁴ Mubhuheene ega, abhantu bhatakutwa emisumo emijomu kumahwa na bhatakutwa egijabhibhu kumiti gya emichongoma. Nawe kira omuti guramanyikana kwa okwama kwago. ⁴⁵ Ego ego omuntu wahene aranyora arakora amang'ana amajomu, ganu garareka mukibhumbiko ekijomu kya mumutima gwaye. Nawe omuntu omusarya arakora amang'ana amabhibhi ganu garareka mukibhumbiko ekibhibhi kya mumutima gwaye. Tumanyiri ega amang'ana ganu omuntu aragamba gararwa mumetegerero amaru ganu garinga mumutima gwaye. ⁴⁶ Kwaki murambirikira omukuru omukuru nawe amang'ana ganu ndabhakeerya mutaku gakara? ⁴⁷ Omuntu wowonse unu araaja kuoni aretegerera amang'ana gani na okugakora arahunkana ekirengyo kinu. ⁴⁸ Arahunkana na omuhagaji wa enyumba unu yaasimba hansi mpaka akahika kwitaye akahagaja obhurusa eguru ya eritare mbe oruuji hanu rwejura amanji gakai tematema enyumba. Kora ego gakaisingisya kwaokubha yaringa ehagijirwe bhujomu. ⁴⁹ Nawe wowonse unu areegwa amang'ana gaani enu atakugagwata uyo arahunkana na omuntu unu yahagaja enyumba yaaye eguru ya obhutoto obhwenego bira obhurusa mbe oruuji hanu rweejura amanji gakatema tema enyumba iyu eribhaga ekego ekabhaaru ka yonsego ekagwa hansi.