¹ Orusiku rumwi, Yesu yaringa yemiriri ku murambo gwa eyenja ga Genesareti, arehigirya omuganda gwa abhantu, amang'ana okurwa ku Waryubha abhantu bhayo bhakabha bharamwikumirira, mpaka bhakamuhiga, naho bhamwitegerera. ² Yesu akarora amahato gabhiri, ku murambo gwa enyanja iyo. Abhategi bheekiri mo kwa okubha bhoogyanga emitego gyabho. ³ Akariina mubhwato obhumwi, bhwa Simoni, akamukeerya ega, obhusuuntarye hake munyanja mbe akekara muyo akagendererya okwihigirya abhantu. ⁴ Hanu yamara okubhehigirya, akakerya Simoni, "Ruga obhwato, tugende gati wa enyanja mwikye emitego gyenyu, mutege naho muranyoore eginswi. ⁵ Simoni akamukyukya ega, uuwe omusu kwa wetu twakoreri emirimu kwa ekintu! Nawe kwa okubha nuuwe agambiri ndagitumya emitego mumanji. ⁶ Mbe Simoni na abharikyaye bhaketumye emitego gyabho mumanji bhakatega bhakagwatya eginswi njaru bhukongu mpaka emitego gyabho gikamba okutaamuka. ⁷ Bhakanungira amabhoko bharikyabho bha obhwato obhundi bhaaje kubhasakirya. Hanu bhaaja bhakeejura amato gonsego gabhiri eginswi mpaka gakeenda okusika. ⁸ Simoni Petro hanu yarora ego akatema hansi ebhiru embere ya Yesu akamukeerya ega omukuru ntakwenderwa okubha hamwi na uuwe ogenda kwa okubha oni mumuntu wa obhusarya. ⁹ Simoni yagamba amang'ana gayo kwa okubha weeki hamwi na abharikyaye bhanu yaringa nabho bhaaringa bharuguriri eguru ya obhwaru bhwa eginswi ginu bhaaringa bhagwatirye. ¹⁰ Mubhwato obhundi bhaaringa mo Yakobo na Yohana abhana bha Zebedayo bhanu bharinga bhagwatenye na Simoni okukora ebhyasara. Bhoonse bhakarugura kuganu gatuuka. Yesu akamukeerya Simoni Tiga okwobhoha ego waringa orarega eginswi. ¹¹ Mbe Simoni na abharikyaye bhakahindya amato kumurambo bhakatiga obhwami bhwabho bhonsego bhakamuseeta Yesu. ¹² Yesu hanu yaringa mumugi gumwi rumwi ego akahanja ho omuntu umwi, omuntu huyo yaringa na obhugenge omubhiri omugima. Hanu yarora Yesu atakema hansi ebhiru embere. Yaaye akahinya obhusu mpaka hansi akamukomererya ega uuwe omukuru mmanyiri oratura okundaama ndakusabha undaame. ¹³ Yesu akeenuta okubhoko akamukunya akamukerya ega Ndeenda okukuraama hayo hayo obhugenge bhwaye bhuka hwena. ¹⁴ Yesu akamukaanya ega otakakeerya omuntu huyu wonsego amang'ana ganu Nawe ogende wiyorokye kumusyengeri kya ego omurooti Musa yaaragirya kibhe ekimanyiriryo ega waraami rwe. ¹⁵ Kora ego eringaana rya Yesu rya okuraama omugeenge rikagendererya kunyaragana bhukongu. Abhantu abharu bhakabha bharekumanya naho bhetegerere amehigiro gaaye na okuhwenibhwa arweeri gaabho. ¹⁶ Nawe Yesu yaringa arabhatoroka aragya ahasi hanu abhantu bhatari akabha arasabha Waryubha. ¹⁷ Orusiku rumwi hanu yaringa arehigirya abhantu munyumba. Abhafarisayo hamwi na abhehigirya bha amaragiriryo ga Waryubha bhaaringamo bheekeri. Bhaaringa bhaajiri okurwa kira kijiji kya mubhyaro bhya Galilaya na Yudea na kora mumugi gwa Yerusalemu. Yesu yaringa na obhuturo okurwa kumukuru Waryubha naho ahwenye abhantu. ¹⁸ Mbe bhakaja ho abhasaja bhagegeri kukirago omurweeri wa omujimu. Bhakasakya okumusohya munyumba bhamutuure embere ya Yesu. Nawe bhatanagya kwaokubha omuganda gwa abhantu gwaaringa gwi hundiriri mukiseku bhukongu. ¹⁹ Hanu omweya gwabhabhura gwa okumusohya nho bhakariina engaji okugya eguru kurusara rwa enyumba bhamugegeri omurweeri uyo kukirago kyaye Bhakahanyura ahasi hake ego kurusara bhamwikirya embere ya Yesu enu areeri kukirago kyaye gati ya omuganda gwa abhantu. ²⁰ Hanu Yesu yarora kya ego abhantu bhayo bhaaringa na eimani bhakamukeerya omurweeri huyo ega musaani wabhirwe obhusarya bhwaho. ²¹ Mbe abhehigirya bha amaragiriryo ga Waryubha na abhafarisayo bhayo bhakaamba okubhurari ya ega Niwi unu? ndeegwa aragamba amang'ana ga okumujeera Waryubha? atariho unu aratura okwabhira obhusarya nawe Waryubha omwene ego! ²² Yesu akamanya ganu bharinga bharega nirirya akabhabhuurya ega kwaki mureganirirya ego mumitima gyeenyu. ²³ Erinyoohu ndiha? okumukeerya omurweeri ega. Wabhirwe obhusarya bhwabho ka okumukerya ega. Imuka ogende? ku abhantu ganu gonsego gatakuturikana. ²⁴ Nawe ndeenda mumanye ega omwana wa Adamu yaana obhuturo bhwa okwambira obhusarya mukyaro hanu. Hanu yamara okugamba gayo akamukeerya omuntu uyo Ndakukerya ega imuka witike ekirago kyaho ogende iika owaho. ²⁵ Hayo hayo omuntu uyo akemirira embere ya abhantu aketiika ekirago kyaaye akagya iika enu aramutogonya Waryubha. ²⁶ Abhantu bhonsego bhakaruugura bhukongu na okugwatwa na obhoobha. Hamwi na gayo bhakamutonganya Waryubha bharagamba ega. Bhamure reero turuuji ekika." ²⁷ Hanu gayo gaahwa, Yesu akarwa munyumba akarora omutobhya umwi wa erigooti. Hayo Yesu akamukeerya uuwe Lawi unsoraane. ²⁸ Rumwi ega, Lawi akeemuka akatiga kira ekintu akabha aramusoorana Yesu. ²⁹ Eribhaga erindi, Lawi akakoorera Yesu enyangi enene iika owaye. Munyumba munu bhaaringa bhakeekumanya mo abhatobhya bha erigooti abhaaru na abhantu abhandi bhakabha bhararya hamwi kumeja. ³⁰ Ekarora abhafarisayo na abhehigirya bhaabho bha amaragiriryo ga Waryubha bhagye okwing'ehererya kubhehigira bha Yesu ega. Ndegwa murarya na okunywa hamwi na abhatobhya bha erigooti na abha obhusarya abhandi? ³¹ Yesu akabhakyukya ega abhantu abhahoru bhatakwenda omuraguri. Abhantu abharweri mbo bharamwenda. ³² Ego ego oninonse ntajiri okubhirikira abhantu bhanu bharerora mbhahene nawe nijiri okubhirikira abhasarya bhehunjurire Waryubha. ³³ Abhantu bhayo bhakamukerya Yesu ega Abhehigira bha yaana bhareeyima ebhyakurya kaaru, eribhaga oranyoora bharamusabha. Waryubha kora abhehigira bha Abhafarisayo bhoonse bharakoranga ego, ego. Nawe abhaho ndegwa bhatakwiyima bharagendererya okurya na okunywa; ³⁴ Yesu akabhakyukya ega. Hanu oranyora omuteti akyari hamwi na abhageni bhaaye mubhwenga muratura egaki okubhakora abhageni bhayo bheeyime ebhyakurya na ebhya okunywa? ³⁵ Nawe kuginsiku ginu giriija abhantu bharimurusya ho omuteti atige abhageni bhaaye. Kuginsiku giyo nho bharibha bhareyima ebhyakurya. ³⁶ Yesu akabhakerya ekirengyo ekindi, ega, Atari ho omuntu unu oratura okubhutura ekiraka okurwa kungibho engotu. Kwa okubha arakore ego arabha ataamwiri engibho yaaye enyha. Hamwi n gayo ekiraka kiyo kya engibho enhyo. Kitahunkane na engibho engotu. ³⁷ Na atariho omuntu unu aratura okutuura edivai enhya muginsabho gya amaseera amagotu. Kwaokubha arakore ego edivai ehya eragibhimbye mpaka gihobhoke edivai itike na eginsaho giyo ngira sarike. ³⁸ Nawe edivai ehya erenderwa otuurwe mu ginsaho gya amaseero amahya! ³⁹ Na omuntu unu amariri ebhintu bhya kare aranyora atakwenda ebhintu ebhihya. Aragamba ega, Ebhyakare mbyo ebhijomu."