¹ Yesu akarwa ahasi ha oruuji rwa Yordani enu yeejwiri omutima omurabhu gwa Waryubha omutima guyo gukabha gura mwinarya kukibhara, eginsiku mirongo ena. ² Nho erisambwa rikabha riramusakya eyo na eribhaga riyo ryonsego ataaryaga ekintu kiyo kyonse. Hanu yaamara eginsiku giyo akagwa amweko. ³ Nho erisambwa rikamkeerya ega, "Nyoore mahene uuwe mwana wa Waryubha hunjura erigina rinu ribhe omukaate. ⁴ Yesu akamukyukya ega yaang'orwa mu maragiriryo ga Waryubha ega omuntu atakubha na obhuhoru kwa okurwa ebhyakurya ebhyenego" ⁵ Mbe, Erisambwa rikamurinya kunkuku entambi bhukong'u rikamworokya obhutungi bhwa ebhyora bhyonsego kwa eribhaga erimwi. ⁶ Rikamukyerya ega "Ndakuhaana obhutungi bhwa bhinu bhyonsego, hamwi na eginkuma gyuye eginjomu, kwa okubha giringi mumabhoko gaani, noni naahaa nwa na Waryubha, na ndatura okuhaana omuntu wowonse unu ndeenda. ⁷ Kwa ego uuwe hanu oraansyengere, nakuhaana obhutungi bhwa gayo gonsego. ⁸ Yesu akamukyukya ega, "yaang'orwa ega omusyengere omukuru Waryubha waaho, na omukorere emirimu weeki omwene. ⁹ Mbe erisambwa rikamuhira mumugi gwa Yerusalemu, rikamwimirirya eguru kukinono kya kundigi ya erisyengerero erikuru rya Waryubha, rikamukeerya ega nyoore maheene uuwe mwana wa Waryubha, iirekera hansi. ¹⁰ Kwa okubha yaang'orwa muktabho kya egijabhuri ega, Waryubha arikutumira bha malaika bhaaye, naho bhakwangarire. ¹¹ Kweki ega, bharakutumira otaaja okwikujura kuringina oyaharike amaguru gaaho. ¹² Yesu akamukyukya ega yaang'orwa ega otakamusakya omukuru Waryubha waaho. ¹³ Erisambwa hanu ryaamara okumusakya Yesu, rikamutiga rikagya gyaye mpaka eribhaga erindi. ¹⁴ Mbe Yesu akahunjuka ku kyaro Galilaya, enu yeejwiri eginguru gya omutima omurabhu gwa Waryubha. Amang'ana eguru ya Yesu, gakanyaranga bhukongu mukyaro kiyo kyonsego. ¹⁵ Akabha areehigirya abhantu kira ahasi mumasinagogi gaabho abhantu bhonsego bhakabha bharamukumya. ¹⁶ Eriibhaga erindi akahunjuka Nazareti mumugi gunu yaareerwa mo orusiku rwa esabhato akasoha murisinagogi kya ego yaringa anariri, akeemirira naho okusoma ering'ana rya Waryubha. ¹⁷ Akahaana ekitabho kyamurooti Isaya akamburuura, akasikana ahasi ang'orwerwe ega, ¹⁸ Omutima gwa omukuru Waryubha, guringi hamwi na oni yansoreri okubhararika abhataka amang'ana amajomu na okubhakeerya abhakuru ega, bhariribhurwa ameeso, na bhanu bharanyankibhwa mbatuurye. ¹⁹ Yantumiri okubhararika abhantu omwaka gwa obhutuurya gunu, omukuru Waryubha aryorokya enonkwe yaaye. ²⁰ Mbe, Yesu hanu yaamara okusoma amang'ana gayo akakundikirya ekitabho, akamuhunju kirya omukangatya wa obhusyengeri, akeekara naho yeehigire. Abhantu bhonsego bhanu bhaaringa murisinagogi, bhakamumaahirira bharaganyirira kinu areehigirye. ²¹ Akaamba okubha keerya ega "Ering'ore" rinu mwigwiri rero oni ndimariri mu matwi genyu. ²² Anu yamara okwihigirya bhonsego bhakagamba ega agambiri bhugambi bhujomu!" Bhakarugura amang'ana gaaye ganu yagamba eguru ya enonkwe, kimwi bhakabhuranyega unu tuu omwana wa Ysufu? ²³ Yesu akabha keerya ega, mmanyiri muraankeerye engamba inu "omukumu iwehwenya omwene, ganu twigwiri okoreri mumugi gwa Kapernaumu, ogakore na mumugi gwaho hanu! ²⁴ Yesu akagendererya okugamba ega, "Ndabhakeerys obhuhene ega atariho omurooti unu arekiriribhwa mumugi gwabho. ²⁵ Nawe, Mwitegerere! Kuribhaga rya omurooti eriya, bharingaho abhasino abhaaru mukyaro kya kyonsego kya Israeli. ²⁶ Kora ego, Eliya ataatumwa kora ku oumwi wabho naho yaatumwa kumusino umwi wa mumugi gwa Serepta mukyaro kya Sidoni. ²⁷ Na kuribhaga rya omurooti Elisha, bhaaringaho abhagenge abhaaru mukyaro kya Israeli: Kora ego ataahweriya kora umwi wabho, nawe akahwenya naamini omumtu okurwa mu kyaro kya Siria. ²⁸ Abhantu bhonsego bhanu bhaaringa bheekumenye murisinagogi riyo anu bheegwa amang'ana gayo ga Yesu bhakajima bhukongu. ²⁹ Bhakamirira kwa enkoko, bhakagya bhakamuruusya kumugi gwabho gunu gwaringa munkuku, bhakamuhira ahasi na omuhiringito omuhari naho bhamurekere hansi. ³⁰ Nawe akeekyuka akahita gati yabho akagya gyaye. ³¹ Eribhag erindi Yesu akagya mumugi gwa Kapernaumu, mukyaro kya Galilaya orusiku rwa esabhato akasoha murisinagogi, akaamba okwihigirya abhantu ering'ana rya Waryubha. ³² Obhuturo bhwaye bhwa okwihigirya bhukarugurya abhantu bhayo bhukongu. ³³ Na murisinagogi muyo yaringa mo omuntu umwi unu ajuuribhwe na ekihwi ekibhihi, ekihwi kiyo kikakura na okujirira kwa erisi rya okuribhya amatwi. ³⁴ Eee, Yesu wa Nazareti otige okutunyakya bheetu! Ujiri okutusi kya? nkumanyiri uwe murabhu kureka ku Waryubha. ³⁵ Yesu akaikemera ekihwi kiyo ega kira! orwe kumuntu unu! Rumwi ego, ekihwi kiyo kikamugwisya hansi embere ya abhantu bhayo bhonsego. Hanu kyamara okumugwisya hansi embere ya bhantu bhonsego kikamurwako bira okumunyahara kora hake. ³⁶ Abhantu bhonsego bhakarugura bhukongu, bhakabhuranyega," Mmanganaki ganu? Kwa okubha kwa obhutungi na obhuturo, arakenya ebhihwi ebhibhibhi bhirwe kubhantu na bhira rwako. ³⁷ Kwa ego, amang'ana ga Yesu gakabha garanyaragana bhukong'u, mukyaro kyonsego. ³⁸ Mbe Yesu akareka murisinagogi akasoha munyumba ya omuntu umwi unu yabhirikirwa nga Simoni abhantu bhanu bhabhanga munyumbha muyo bhakasabha abhawhenye. ³⁹ Yesu akasuntara akeemirira hangi nawe, akaikanya ehoma iyo rumwi ego omukari uyo akawhena ngo akeemuka akamba okubhakorera emiriimu. ⁴⁰ Erribhaga eryubha ryaringa rirasikira, abhaantu bhakaretera Yesu abharweeri bhaabho bhonsego bha amarweri maanga maru Yesu akabhaturira amabhoko gaye kira oumwi akabhahwenya. ⁴¹ Hamwi nagayo Yesu akakenya ebhiwi ebhibhibhi okurwa kubhantu abhandi abhaaru bhyajiraranga bhiraga mba ega "Uuwe, mwana wa Waryubha! " Nawe Yesu akabhikanya na ataabhikirirya okugendererya okugamba ego, kwa okubha bhyaringa bhimanyiri ega ng'o Kristu. ⁴² Hanu kwakya Yesu akeemuka akgya ahasi hanu hataana abhantu omuganda gwa ebhantu gukabha guramutuna. Hanu bhamunyoora bhakeenda okumukanya atabhatiga. ⁴³ Nawe Yesu akabhakeerya ega "Ndenderwa ngye mumigi egindi kweki, mbenga ndararika amang'ana emajomu eguru ya obhukama bhwa Waryubha kwa okubha gayo ngo natumwa. ⁴⁴ Nho, Yesu akagendererya arararika abhantu amang'ana amajomu gayo mumasinagogi gaabho.