¹ Gwaringa omwaka gwa ekumi na etaanu, gunu omungi omukuru, Tiberia yaaringa aratunga ekyaro kyonsego kya abhuruumi. Pontio Pilato yaaringa omwanangwa wa ekyaro kya Yudea Herode yaaringa omukama wa ekayo kya Galilaya, Filipo, omumura wabho Herode, yaaringa omukama wa ebhyaro bhya iturea na Tarakoniti. Risania weeki yaaringa omukumu wa ekyaro kya Abhireene. ² Eribhaga riyo, Anasi na Kayafa mbo bhaaringa abhakuru bha abhasyengeri. Mbe kuribhaga riyo, Yohana omwana wa Zakaria, yaaringa ku bhara. Hanu yaaringa eyo akakeeribhwa ering'ana okurwaku Waryubha. ³ Akagya kukyaro kyonsego kinu kiringi mbarika ya oruuji rwa Yordani, akabha arararikira abhantu ering'ana riyo ega, "Mwihunjurure Waryubha, mubhatiijure naho abhaabhire. ⁴ Amang'ana gayo gahikiibhwe kya ego yaang'orwa mukitabho kya omurooti Isaya ega, omuntu aribha kukibhara aragamba kwa eriisi enene ega, museeme rye omukuru Waryubha enjira mwimye kira ahasi hanu arihita. ⁵ Amaruma gonsego garibhwe, eginkuku na ebhiswa bhinyaraganibhwe, eginjira ginu giikonyeri giimibhwe na hanu huana amaruuma amake amake hanyaraganibhwe. ⁶ Hani nho, abhantu bhonsego bharirora kya ego Waryuba arituurya abhantu. ⁷ Mbe emiganda gya abhantu gyaamujiranga Yohana abhabhatije. Akabha arabhakeerya ega, "Bheenyu orwibhuro kwa eginjoka! mumanyiri ega obhujibhu bhwa Waryubha bhuriija. Miwi yaabhake erya ega muriheenerya obhujibhu bhuyo kwa okubhohijwa okwenego. ⁸ Mbe mworokye kweginteemo gyeyu ega mwehunjuriri Waryubha muteng'ena ega muryabhirwa kwa kubha bheenyu mubheebhurwa bha oruganda rwa Abrahamu. Ndabhakeerya ega, Waryubha aratura okubhunjura amagina ganu, okubha abhaana bha Abrahamu. ⁹ Bhoono, obhujibhu bhwa Waryubha bhuringi eguru yeenyu kya ekisiri kiringi kumiri gya amuti kireenda okugugeeja! Na bhanu bhatakukora amang'ana ga obhuheene bharijibhibhwa okweswa mumururo. ¹⁰ Omuganda gwa abhantu bhakabha bharamubhuury ega, "Bhoono, tukore egaki. ¹¹ Akabhakyukya ega "Unu yaana emyenda ebhiri ogumwi agabhire unu ataanago. Unu yaana ebhyakurya, agabhire unu yaana omweko. ¹² Abhato bhya bha erigooti bhonse bhakaaja, naho abhabhatiije. Bhakamubhuurya ega, "omwihigirya, na bheetu tukore egaki. ¹³ Wonse akabhakyukya ega, "Hanu murato bhenga erigooti, mutoongerya okukira kya ego mwaaragiriribhwa. ¹⁴ Abhasirikare bhonse bhakamubhuurya ega "Na bheetu tokore egaki?" Wonse akabha kyuky ega, "Mutaruusya omuntu ebhintu bhyaye kwa amang'ana, kweki mutajongera omuntu kwa okumuhamirirya amang'ana ga obhubheehi. Amariho ganu murahaanwa, mwiswe nago" ¹⁵ Mbe abhantu hanu bhaaringa bharaganyirira kinu kirakoreke, bhakabha bhareebhurya ega, hamwi Yohana ng'o Kristu. ¹⁶ Nawe Yohana, akabhakeerya bhonsego ega, "oni ndabhabhatiija kwa amanji ageene, nawe oundi ariija, omukuru okukira oni. Ntakutura kora okubha omugaya waaye, wa okusibhura agingoye gya eginkeeto gyaye! Weeki aribheejurya omutima omurabha gwaye, na arisikya obhusarya bhwenyu kya ego omururo gurasikya ebhintu. ¹⁷ Yohana obhuturo bhwa okwahura bhanu bharamwikirirya na bhanu bharamwanga kya omuntu unu araahura egingano aratuura mukitara, na arisamba ekinkuunyu mumururo gunu gutakusimu. ¹⁸ Mbe kwa amang'ana amaaru gayo, na agandi, Yohana yaaringa arabhakanya abhantu bhayo, henu arabharaarikira amang'ana amajomu okurwa ku Waryubha. ¹⁹ Eribhaga erindi, Yohana akamutong'anya omukama Herode ega, "Kwaki ogegeri Herodia, omukari wa omumura weenyu omukoreri mukaaho?" Kweki, Yohana akamukaanya na obhusarya bhwaye obhundi. ²⁰ Nawe Herode akaogerya obhusarya obhundi kweki, kwa okumubhoha Yohana murigereja. ²¹ Eribhaga rinu Yohana yaabhatiija ga abhantu bhonsego, Yesu wonse akabhatiijwa Na hanu Yesu yaaringa arasabha. ²² Orwire rukasikuka, omutima omurabhu gwa Waryubha gukeeka kya ekiguti gukeetuura kumwene. Rumwi ego bhakeegwa eriisi okureka murwire ega, "Uuwe nuuwe omwana waani omuhanje! Nuuwe oranjomera. ²³ Eribhaga rinu Yesu yaamba emirimi gyaye gya okurarika ering'ana rya Waryubha, yaaringa na emyaka muna mirongo esatu abhantu bhakanyanga ega, yaaringa omwana wa Yusufu, ²⁴ Yusufu uyo, yeebhurwa na Heri, Heri yeebhurwa na matati, matati yeebhurwa na Lawi yeebhurwa na Melki, Melki yeebhurwa na Yona, Yona yeebhurwa na Yusufu. ²⁵ Yusufu yeebhurwa na Matathia, Matathia yeebhurwa na Amosi, Amosi yeebhurwa na Nahumu, Nahumu yeebhurwa na Erisi, Erisi yeebhurwa na Nagai, ²⁶ Nagai yeebhurwa na Mati, Mati yeebhurwa na Matathia, Mathatia yeebhurwa na Semeini, Semeini yeebhurwa na Yoseki, Yoseki yeebhurwa na Yuda. ²⁷ Yuda yeebhurwa na Yoana, Yoana yeebhurwa na Resa, Resa yeebhurwa na Zerubabeli, Zarubabeli yeebhurwa na Shealtieli, Shealtieli yeebhurwa na Neri, ²⁸ Neri yeebhurwa na Melki, Melki yeebhurwa na Adi, Adi yeebhurwa na Kosamu, Kosamu yeebhurwa na Erimadamu, Erimadamu yeebhurwa na Eri, ²⁹ Eri yeebhurwa na Yoshua, Yoshua yeebhurwa na Eliezeri, Eliezeri yeebhurwa na Yorimu, Yorimu yeebhurwa na Matathi, Matathi yeebhurwa na Lawi, ³⁰ Lawi yeebhurwa na Simeoni, Simeoni yeebhurwa na Yuda, Yuda yeebhurwa na Yusufu, Yusufu yeebhurwa na Yonamu, Yonamu yeebhurwa na Eriakimu, ³¹ Eriakimu yeebhurwa na Melea, Melea yeebhurwa na Mena, Mena yeebhurwa na Matatha, Matatha yeeburwa na Nathani, Nathani yeebhurwa na ³² Daudi, Daudi yeebhurwa na Yese, Yese yeebhurwa na Obedi, Obedi yeebhurwa na Boazi, Boazi yeebhurwa na Salmoni, Salmoni yeebhurwa na Nashoni, ³³ Nashoni yeebhurwa na Aminadabu, Aminadabu yeebhurwa na Aramu, Aramu yeebhurwa na Hesroni, Hesroni yeebhurwa na Peresi, Peresi yeebhurwa na ³⁴ Yuda, Yuda yeebhurwa na Yakobo, Yakobo yeebhurwa na Isaka, Isaka yeebhurwa na Ibrahimu, Ibrahimu yeebhurwa na Tera, Tera yeebhurwa na Nahori, ³⁵ Nahori yeebhurwa na Serugi, Serugi yeebhurwa na Rehu, Rehu yeebhurwa na Pelegi, Pelegi yeebhurwa na Eberi, Eberi yeebhurwa na Shera, ³⁶ Shera yeebhurwa na Kenani, Kenani yeebhurwa na Arfaksadi, Arfaksadi yeebhurwa na Shemu, Shemu yeebhurwa na Nuhu, Nuhu yeebhurwa Lameki, ³⁷ Lameki yeebhurwa na Methusela, Methusela yeebhurwa na Henoko, Henoko yeebhurwa na Yaredi, Yaredi yeebhurwa na Mahalaleli, Mahalaleli yeebhurwa na Kenani, ³⁸ Kenani yeebhurwa na Enosi, Enosi yeebhurwa na Sethi, Sethi yeebhurwa na Adamu, Adamu yeebhurwa na yaabhumbwa na Waryubha.