¹ Bazalwane bami, akukuhle kutsi linyenti lenu libe bafundzisi, nati kutsi tsine lesifundzisako siyakwemukeliswa kwehlulela lakumatima. ² Ngobe sonkhe siphosisa ngetindlela letinyenti; nakukhona longaphosisi ngekukhuluma, lowo uphelele ngempela, ngobe uyakwati kuhamba ngisho nemtimba wakhe wonkhe shengatsi ngematomu. ³ Nasifaka ematomu emilonyeni yemahhashi kutsi atosilalela, sisuke siwacondzisa umtimba wonkhe. ⁴ Asenibuke nemikhumbi, noma imikhulu kangaka, yimimoya lenemandla, noko icondziswa ngeliphini lelincane nje, iye lapho bashayeli bayo bafuna iye khona. ⁵ Kanjalo nelulwimi lusitfo lesincane, kantsi litigabatisa ngetintfo letinkhulu. Asenibuke nje umlilo lomncane wokhela lihlathi lelikhulu! ⁶ Lulwimi lungumlilo, lulive lelibi, lulwimi lusitfo lesingcolisa umtimba wonkhe, lokhela yonkhe imphilo nemphilo lokhelwa sihogo. ⁷ Yonkhe indalo yetilwane ayingatsanjiswa: ngisho tinyoni, netilwane letihamba ngesisu, netilwane taselwandle; vele, bantfu batitsambisile letilwane. ⁸ Kodvwa kute longatsambisa lulwimi; lububi lobuyalukako, lugcwele shevu lobulalako. ⁹ Ngalo sibona iNkhosi lengubabe, nangalo sicalekile bantfu baba ngumfanekiso waNkulunkulu. ¹⁰ Emlonyeni munye kuphuma kubusisa nekucalekisa. Bazalwane bami, akufanele kubenjalo. ¹¹ Kuyenteka yini kutsi esicojeni sinye kuphume emanti lamnandzi nalababako? ¹² Bazalwane bami, sihlahla semkhiwa singatitsela yini titselo temncumo, nome umvini temkhiwa? sicobho lesikhipha emanti lababako ngeke sikhiphe nalamnandzi. ¹³ Ngubani lohlakaniphile nalocondzisisako emkhatsini wenu? akakhombise imphilo yakhe lelungile ngemisebenti yakhe ngekutfobeka lokunenhlonipho. ¹⁴ Kepha naninemona lobabako, nembango etinhlitiyweni tenu, ningatigabatisi; ngobe ngaloko liciniso nilenta emanga. ¹⁵ Lokuhlakanipha akuchamuki ngeyulu, kodvwa ngekwemhlaba, nekwemvelo, nekwebusatsane; ¹⁶ ngobe lapho kunemona nembango khona, kunesiphitsiphitsi nayoyonkhe imisebenti lemibi. ¹⁷ Kodvwa lokuchamuka ngetulu kwekucala kumsulwa, bese kuba nekuthula,nekutfobeka, nekulalela, kugcwele bubele netitselo letihle; akunalolubandlululo nekutentisa. ¹⁸ Bantfu labaletsa kuthula, besuke bahlanyele kuthula, bese bavuna kulunga.