¹ Letimphi nalokulwa kuphumaphi emkhatsini wenu? akuchamuki yini etinkhanukweni tenu letilwa etitfweni nenu? ² Niyafisa, noko anitfoli lutfo; niyabulala, nibe nemona, kodvwa niyehluleka kutfola lenikufunako. Niyalwa, nente timphi. Aninalutfo ngobe aniceli. ³ Niyacela ningaphiwa, ngobe nicela kabi, nicelela kutsi nikucitse etinkhanukweni tenu. ⁴ Aniketsembeki, ninjenge timphingi. Anati yini kutsi kutsandzana nelive kubutsa kuNkulunkulu? Lofisa kuba ngumngani welive utenta sitsa kuNkulunkulu. ⁵ Nome-ke nicabanga kutsi kulite loku lokushiwo ngumbhalo utsi: ''Lomoya, lawubeka kitsi Nkulunkulu uyafutselana, kantsi futsi unesishwele ngatsi'''? ⁶ Kodvwa Nkulunkulu wephana ngemusa lomkhulu, ngako umbhalo utsi: ''Nkulunkulu umelana nalabatigcabhako, kepha labatfobekile ubapha umusa.'' ⁷ Ngako-ke tfobelani Nkulunkulu, kodvwa nimelane nasatsane,uyawunibalekela. ⁸ Sondzelani kuNkulunkulu, naye utawusondzela kini. Gezani tandla tenu, nine toni,nihlambulule tinhlitiyo tenu, nine bantfu labanetinhlitiyo letimbi. ⁹ Khatsatekani, nidzabuke, nilile; kuhleka kwenu akugucuke kube kulila, nekujabula kwenu akugucuke kubekujabha. ¹⁰ Titfobeni embhikweNkhosi, yona-ke iyoniphakamisa. ¹¹ Bazalwane, ningahlebani. Lowo lohleba umzalwane nome ahlulele umzalwane wakhe, uhleba umtsetfo ahlulele umtsetfo. Nangabe uhlulela umtsetfo, awusiye umenti wemtsetfo, kodvwa ungumehluleli wawo. ¹² Munye loshaya umtsetfo, nguye futsi longumhluleli nalonemandla ekusindzisa nekubhubhisa. Kodvwa wena ungubani kutsi ungahlulela makhelwane wakho? ¹³ Labanye benu banemkhuba wekutsi: ''Lamuhla nakusasa sitawuya kulela dolobha, sihlale umnyaka, sitsenge sitsengise, bese sitfola inzuzo.'' ¹⁴ Ningakusho kanjani loko, njengoba ningalati likusasa lenu kutsi litawube yini? Ngobe kuphila kwenu kunjengenkhungu, lechamuka ibonakale sikhashane, iphindze inyamalale. ¹⁵ Esikhundleni saloko ngabe nitsi: ''iNkhosi nayivuma, sitawenta loku nalokwa.'' ¹⁶ Kepha nyalo niyatibonga ngekuti gabatisa kwenu. Konkhe kutigabatisa lokunjalo kubi. ¹⁷ Ngako-ke lokwatiko kwenu lokuhle kodvwa angakwenti, uyona.