¹ Bazalwane bami, nine lenikholwa yiNkosi yetfu yenkhatimulo, Jesu Khristu, ningabobakhetsa bantfu. ² Nangabe emhlanganweni wenukungena umuntfu lofake indandatho yegolide, agcoke kahle, kuphindze kungene nalomunye lophuyile, agcoke kabi, ³ bese-ke nine ninaka lona logcoke lokucwebetelako nitsi: ''Hlala lapha, kunasi situlo,'' kulona lophuyile nitsi: ''mani lapho,'' nome: ''Hlala lapha etinyaweni tami,'' ⁴ ngekwenta njalo anikhetsi yini ngekutsi nibe behluleli ngemicabango lemibi? ⁵ Ase nilalele, bazalwane bami labatsandzekako! Nkulunkulu akabakhetsanga yini labaphuyile lapha emhlabeni kutsi babe ngulaba cebile ekukholweni, netindlalifa embusweni lawetsembisa labo labamtsandzako? ⁶ Kepha nine nimdvumatile lona lophuyile. ⁷ Akusibo yini labacebile lanicindzetelako? Akusibo yini laba labahlambalata libito laKhristulelihloniphekile labanibita ngalo? ⁸ Kepha nani gcina umtsetfo ngekwembalo lotsi: ''Tsandza makhelwane wakho njengoba utitsandza wena, '' nenta kahle. ⁹ Kodvwa nani khetsa bantfu, nenta sono, nemtsetfo uyanilahla ngekutsi nitephulamtsetfo. ¹⁰ Ngobe loyo logcina yonkhe imitsetfo, kodvwa uphule munye, unelicala layo yonkhe. ¹¹ Ngobe lona lowatsi: ''Ungaphingi,'' waphindze watsi: ''Ungabulali,'' Nangabe ungaphingi ubulale, usephulamtsetfo. ¹² Ngako khulumani, nente njengalabo labayowuhlulelwa ngemtsetfo wenkhululeko. ¹³ Ngobe kwehlulelwa akunabo bubele kulowo longenabo bubele; kodvwa bubele kuyawucoloshela kwehlulela. ¹⁴ Bazalwane bami, kusitaphi kutsi umuntfu atsi uyakholwa kodvwa abe angenayo imisebenti? ¹⁵ Nangabe umzalwane nome umzalwanekati bahlubulile baswele nekudla kwemalanga onkhe, ¹⁶ bese-ke lomunye emkhatsini wenu utsi kubo: ''Hambani ngekuthula, nitfutfumale, nesutse,'' ngaphandle kwekubapha loko labakudzingile emtimbeni,kusitani loko? ¹⁷ Ngako-ke nangabe kukholwa, kona ngekwako, kungenayo imisebenti, kufile. ¹⁸ Kepha lomunye angatsi: ''wena unekukholwa, mine nginemisebenti. ngikhombise kukholwa kwakho ngaphandle kwemisebenti, nami ngitakukhombisa kukholwa kwami nemisebenti yami.'' ¹⁹ Uyakholwa kutsi Nkulunkulu munye? wenta kahle; nemadimoni ayakukholwa loko, atfutfumele. ²⁰ Wena silima-ndzini, uyafuna yini kukhonjiswa kutsi kukholwa lokungenamisebenti kulite? ²¹ khokho wetfu Abrahama ngesikhatsi anikela nga-Isaka, umsa wakhe, elatini, akazange yini emukelwe nguNkulunkulu ngekutsi ulungile ngemisebenti yakhe? ²² Uyabona-ke kutsi kukholwa kwasebenta kanye nemisebenti yakhe, nekutsi kukholwa kwakhe kwapheleliswa ngemisebenti yakhe. ²³ Ngako kwagwaliseka umbalo lotsi: ''Abrahama wakholwa Nkulunkulu; ngenca yekukholwa kwakhe Nkulunkulu wamemukela njengemuntfu lolungile,'' wase ubitwa ngekutsi: ''Ungumngani waNkulunkulu.'' ²⁴ Niyabona-ke kutsi umuntfu wemukeleka kuNkulunkulu ngekutsi ulungile ngisho nangemisebenti yakhe, hhayi ngekukholwa kuphela. ²⁵ Kanjalo-ke naRahabi, ingwadla, akazange yini emukelwe nguNkulunkulu ngekutsi ulungile ngemisebenti yekwemukela titfunywa wabuye watiphipha ngalenye indlela? ²⁶ Njengobe umtimba ufile nakuta umoya, ngalokufanana nekukholwa nakuta imisebenti kufile.