¹ Kwatsi bo Phetro na Johane basakhuluma kulesicuku, baPristi nebaphatsi belithempeli nebaSadusi beta kubo. ² Bakhatsateka kakhulu ngoba Phetro na Johane bebafundzisa bantfu futsi bamemetela kuJesu lokuvuka ekufeni. ³ Bababopha babafaka ejele kwate kwaba sekuseni, ngalokwekutsi besekuyintsambama. ⁴ Kepha bantfu labanyenti labeva lomlayeto bakholwa; futsi lenombolo yemadvodza lakholwa beyitinkhulungwane letisihlanu. ⁵ Kwefika lilanga lelilandzelako baholi, labadzala, nebabhali bahlangana ndzawonye eJerusalema. ⁶ UmPristi lomkhulu Anasi bekakhona, naKhayafase, naJohane, naAlekzanda, nabobonkhe labebatihlobo tempristi lomkhulu. ⁷ Ngesikhatsi sebabeke Phetro na Johane emkhatsini wabo, bababuta, ''Ngamaphi emandla, noma ngaliphi ligama, lenikwente ngako loku?. ⁸ Ngako Phetro agcwele Moya Longcwele watsi kubo, ''Nine baholi balabantfu nalabadzala, ⁹ uma sibutwa namuhla mayelana nalesento lesenteke kulendvodza legulako, futsi ngatiphi taba lendvodza yaphiliswa, ¹⁰ ngako loku akwatiwe ngini nonkhe kanye nebantfu bonkhe baka Israyeli kutsi lendvodza ime phambikwenu iphile ngeligama laJesu Khristu wase Nazaretha, lenamubetsela, kepha Nkulunkulu wamvusa kulabafile. ¹¹ Jesu Khristu ulitje lelalahlwa bakhi kepha labese lentiwa inhloko yesisekelo. ¹² Kute insindziso kulomunye umuntfu, ngoba kute lelinye ligama ngaphasi kwelizulu lelinikwe kubantfu ngaloku kumele sisindziswe.'' ¹³ Uma babona sibindzi saPhetro na Johane bacondza kutsi babantfu, madvodza langakafundzi, bamangala, bacondza kutsi Phetro na Johane bebasolo bana Jesu. ¹⁴ Ngoba babona lendvodza leyaphiliswa ime nabo, bebete lutfo labangalusho kuko loku. ¹⁵ Emvakwekuba baphocelele ba Phostoli kutsi bawushiye lomhlangano wekweluleka, bakhuluma bodvwa. ¹⁶ Batsi, ''Singentani kulamadvodza? ngoba lomlingo lomangaliso lowenteke ngabo sewutawatiwa nguwonkhe muntfu lohlala eJerusalema; singeke sikuphike. ¹⁷ Kepha kute kutsi kungandzi kadze kulabantfu, asibagweme kutsi bangasaphindzi bakhulume namuntfu kuleligama.'' ¹⁸ Bababitela ngekhatsi babaphocelela kutsi bangakhulumi noma bafundzise sanhlobo egameni laJesu. ¹⁹ Kepha boPhetro na Johane babaphendvula batsi kubo, '''Noma ngabe kukahle emehlweni aNkulunkulu kutfobela wena kunaye, uyahlulela. ²⁰ Singeke sikhone kuyekela kukhuluma ngaletintfo lesitibonile kanye nalesitivile.'' ²¹ Emvakwe kucaphelisiswa lokungayiphi Phetro na Johane, babayekela bahamba. Abazange bakhone kubeka taba tekubanika sijubo, ngoba bonkhe labantfu bebadvumisa Nkulunkulu ngalakwentile. ²² Lendvodza leyatibonela lommangaliso wekuphiliswa bekangetulu kwemashumi lamane umnyaka( 40). ²³ Emvakwekuba sebakhululiwe, boPhetro na Johane beta kubantfu babo babika konkhe lokwashiwo baPristi nalabadzala kubo. ²⁴ Uma bakuva loku, baphakamisa emavi ngenhloso yinye kuNkulunkulu batsi, ''Nkhosi, wenta emazulu nemhlaba nelwandle nako konkhe lokukuwo. ²⁵ Wakhuluma ngaMoya Longcwele ngemlomo ngemgcotjwa wakho, babe wetfu Davide, 'Kuya ngani betive basonge futsi nalabantfu bacabange tintfo letinganamsebenti?' ²⁶ Watsi, 'emaNkhosi alomhlaba abalungiselele kanyekanye kanye nebabusi bahlangana kanyekanye kumelana neNkhosi bamelana kanye naKhrestu wakhe.' ²⁷ Nembala boHerodi na Phothiyusi kanye kanye nebetive nebantfu baka Israyeli, bahlanga kanye kanye kulelidolobha bamelana nenceku lengcwele Jesu, lowayigcoba. ²⁸ Bahlangana kanye kanye kutowenta konkhe letandla kanye netinhlelo letancunywa kungakafiki sikhatsi tingenteka. ²⁹ Nyalo Nkhosi, buka leticaphelo tabo bese unika inceku yakho kutsi ikhulume livi lakho ngesibindzi. ³⁰ Yelula sandla sakho utophilisa futsi utosinika timphawu nemimangaliso ngeligama lenceku yakho lengcwele Jesu.'' ³¹ Emvakwekuba sebathandazile, lendzawo lebebakuyo yanyakatiswa, bagcwaliswa ngaMoya Longcwele babese bakhuluma livi laNkulunkulu ngesibindzi. ³² Lenombolo lenkhulu yalabo labakholwa beyimoya munye futsi banhlitiyo yinye. Kute lowatsi noma ngayini layitfolako bekukwakhe, kepha banako konkhe lokufanako. ³³ Ngemandla lamakhulu baPhostoli bamemetela bufakazi ngekuvuka kweNkhosi Jesu nemusa lomkhulu bekasetikwabo. ³⁴ Kwababete umuntfu emkhatsisini wabo labeswele, ngoba bonkhe labanemapulazi noma tindlu batitsengisile baletsa lemali yaletintfo labatitsengisile ³⁵ bayibeka etinyaweni tebaphostoli, kwabese kuyahlukaniselwa kuwonkhe muntfu ngangetidzingo tabo. ³⁶ Josefa, le baphostoli bamubita nga Banabasi (lokusho kutsi Indvodzana yekuGcugcutela), labengumLevi, indvodza yase Siphrosi, ³⁷ watsengisa insimi yakhe waletsa lemali wayibeka etinyaweni tebaphostolo.