¹ Pano ndukufwaya ukumwishibisheni, mwebakwasu ikyebo ikiweme ikyo natulishe kuli mwebo, ikyo mwapokelele kabili epo mwimakene, ² Kabili emo mulukupulukila, kani mwaikatisha makosa kwi shiwi ilyo natulishe kuli mwebo, kani mwaliketekele ukwalukoso. ³ Pakuti nali mipeleni mwebo koti abakutanga ababuleme ifyo na nemo na pokelele, ukwebati ba Kilishitu bali fwilile ifya kubofya fyesu ukulinga ne filembelwe, ⁴ Ukwebati alishikilwe, kabili ati ali bukile pa bushiku ubwalengele ubwabutatu ukulingana ne fi lembelwe. ⁵ Ba Kilishitu balibonekele kuli Kefasi, penka na kube kumi na babili; ⁶ Kabili alibonekele na kuba kwasu ukukila na pa myanda isanu pa mpindi imo. Kabili abengi muli bo bakili ne mweo, Lomba bambi muli bo balilele utulo. ⁷ Kabili alibonekele kuli Yakobo, naku batumwa bonse so. ⁸ Ukupelako muli fyonse, alibonekele kuli nemo, koti nikuli uyo ufyelwe mu nshiku iyi tainga kumana. ⁹ Pakuti ninemo ne upeleleko ku batumwa. Nshelelwe ukwitwa umutumwa pakuti nali kyushishe ikelesha lya ba Lesa. ¹⁰ Sombi mu bupe bwa ba Lesa, ndi koti nififi ndi, kabili ubupe bwabo muli nemo tabwali bwa lukoso. nipakuti, nali pyungishe ne makosa ukukila bonse. takyalipo ninemo, nemo. ¹¹ Fyopele fyo nangaba kingaba ninemo nangu nibo, twalitulishe kabili mwali ketekele. ^{12 13} Bukumo kani ba Kilishitu batulisha ati babukile ukufuma kuba fwile, kanshi mwebo bambi niwinga labila shani ati takuli uubuka kwa ba fwile? Kabili kani ukusanguka ukwa ba fwile, kani nangu no ba Kilishitu taba bukile; ¹⁴ Kabili kani ba Kilishitu taba bukile kani ukushimika kwesu nga kwa lukoso, kabili ne kiketekelo kyenu na kyo kaninga kya lukoso. ¹⁵ Nakabili, twasangwa ukuba imboni shabufi isha pali ba Lesa, Pakuti twali shimike ati ba Lesa bali ba bushishe ba Kilishitu ukufuma ku ba fwile. Lomba taba babushishe bo nga kine abafuta ba bushiwa. ¹⁶ Kani nga aba fwile taba bushiwa, naba Kilishitu nabo nga taba bukilepo; ¹⁷ Kabili ba Kilishitu nga taba bushwe, ukuketekela kwenu kwa lukoso kabili kani mukili mububi bwenu. ¹⁸ Pakuti nababo abalele muli ba Kilishitu nishi nabo bonaikile. ¹⁹ Nga kya kwebati muli buno bumi twaketekela muli ba Kilishitu, twabakila abantu bonse mukushama. ²⁰ Sombi pano ba Kilishitu ba bushiwa kuba fwile koti fisepo ifitanshi muli babo abalele. ²¹ Nipakuti imfwa yalishile ne muntu, ni mu muntu kabili ukusanguka. kwaishile ku ba fwile. ²² Nipakuti nimuli Adama bonse bafwa, kabili ni muli ba Kilishitu bonse bakalengwa abomi. ²³ Lomba kila muntu ne kulungika kwakwe umwine ubo abali fisepo ifitanshi, kabili nababo abali muli: ba Kilishitu, bakalengwa ukuba abomi pakuti kwabo. ²⁴ Efikaba ne mpela, eli akapela ubufumu kuli ba Lesa Tata, ili akonaula imishilo shonse ne nsambu ne makosa. ²⁵ Pakuti ye engatungulula ukufika neli akabika abalwani bonse panshi ya molu akwe. ²⁶ Umulwani uwapelako ukonaula ni mfwa. ²⁷ Pakuti ''abika ifintu fyonse panshi ya molu akwe.'' Lomba kani kya labilwa ati abika ifintu fyonse,'' kuli apatubile ati iki ta kibikilweko uyo ubika fyonse mukunkila munshi yakwe. ²⁸ Ili ifintu fyonse fya bikwa munshi yakwe, penka umwana umwine akakomekwa panshi ya uyo ubika fyonse mukumunakila mnshi yakwe ukwebati ba Lesa ba onse muli bonse. ²⁹ Kani fyo tefyo bakakite ndo abo aba batishiwe pakuti pa ba fwile? kani abo aba fwile ne kusuka yoo, mba nikindo ba bati shilebo? ³⁰ Nikindo mba tulukubeta mu buleme mu mpindi shonse? ³¹ Nda fwa pa kasuba konse! Iki kili koti bukine ubwa kulitota kwangi muli mwebo, uko nkwete muli ba Kilishitu Yesu ba Shikulu besu. ³² Mba findo nkasangilamo, ukufuma ku milangwe ya muntu, kani nga na lilwile ne finama ku Efesa, kani nga aba fwile ta ba bukile? ''Lekeni tulye ne kunwa, pakuti mailo tukafwa.'' ³³ Mwi twalwa mumbi: ''Amabumba abipile alonaula ifintu ifiweme.'' ³⁴ Tekanyeni! Ikaleni mukulungama! muli mwebo takwete akalango aka kwi shiba ba Lesa. Nalabilefi ku nsoni sheu. ³⁵ Lomba umo aka labila ati, ''nga ba fwile bali bukile shani, kabili nensa misango ya mibili bakabuka nasho?'' ³⁶ Mwe batumpile! Ifi mwabyele ifi mwa byele tafyakabe ne mweo sombi kani fi kafwe. ³⁷ Ifi wabyele tali efikaba umubili ukesa, sombi lubuto lukoso. kiti lwaba lwawichi nangu ifintu ifili fyonse. ³⁸ Lomba ba Lesa bakapela umubili kuli kyo ukulinga ne kusala kwakwe, kabili na kulubuto lonse ne mubili wa lukoso. ³⁹ Teminefu shonse ishilikimo. penka, kuli umunefu umo uwa muntu, ne munefu umbi uwa nama, kabili na umbi umunefu uwa fyoni, kabili na umbi uwe sabi. ⁴⁰ Kuli imibili imbi iya kwiulu kabili ne mibili ya panshi. Lomba ubuleme bwa mubili wa kwiulu musango umo kabili ubuleme uwa pa kyalo ni umbi. ⁴¹ Kuli ubuleme bumo ubw kasuba , kabili na bumbi ubuleme ubwa mwebshi, kabili na bumbi ubuleme ubwa tubangabanga. Pakuti akabangabanga kamo kali pusene ne kabyakwe akabangabanga mu buleme. ⁴² Fyopele fyo na mukusanguka kwa ba fwile. Ikyo ikibyalwa kilonaika, kabili nakikyo iki bushiwa takyonaikapo. ⁴³ Ulabyalwa mu nsoni; ulabushiwa mu buleme. Ulabyalwa mukunaika; ula buka mukukosa. ⁴⁴ Ula byalwa umubili wabuntushi; ula buka umubili wa mupashi. kani nga pali umubili wa muntunshi, pali kabili ne mubili wa mupashi. ⁴⁵ Fyopele fyo fililembelwe ati, ''umuntu uwakutanga Adama alibele uwa mweo.'' Adama uwa kupeleko alibele mupashi - uwa kupelo mweo. ⁴⁶ Nanga be fyo ikyo ikya buntu nshi ekya tangileko, popele pantangile ikya mupashi kyatangileko. ⁴⁷ Umuntu uwakutanga uwa panshi, ali bumbilwe ne lukungu. Umuntu wabubili ali tulila kwiulu. ⁴⁸ Koti ni fyopele fyo ifili uyo uwa bumbilwe kuulukungu, efili na babo aba lengelwe kulukungu, kabili efili na uyo umuntu uwa kwiulu. ⁴⁹ Kuti nifyefyo twafyelwe ne kipasho kya muntu kwa lengelwe kulukungu, Nafwebo tukapinta ikipasho kya muntu wa kwiulu. ⁵⁰ Bukumo ndukulabila iki, mwebakwasu, ati umunefu ne mulopa tekuti fipyane ubufumu bwa ba Lesa. Neli ifyonaika ukupyana ifi ta fyonaikapo. ⁵¹ Boneni! ndukumyebeni ikifiseme: bonse tatwakalale, Lomba bonse tuka kingishiwe. ⁵² Tuka kingishiwe pa kapindi akanini, mukukopa kwa linso, palupenga ulwakupelako. Pakuti ulupenga lukalila, kabili ne bafu ba kabuka ne mibili ishi tashonaika, kabili tukakingishiwa. ⁵³ Pakuti uyu mubili yonaika akafwala uyo tayonawikapo, kabili na uyu mubili ubola ukafwala uyo taubola. ⁵⁴ Sombi ili uyu mubili konaika aka fwala uyo taonaika, kabili ili uyu umubili ubola afwala uyo utabola, eli tukesa kwishiwi ilyo ili lembelwe ati, ''Imfwa ya minwa mukukimfya.'' ⁵⁵ ''We mfwa, mbo kukimfya kobe kulipi? we mfwa, mbo lubola lobe lulipi?'' ⁵⁶ Ulubola lwamfw kabifya, ne makosa ya kubifya nao mafunde. ⁵⁷ Sombi ukutota nakuba kuli ba Lesa, abo abatupela ukukimfya ukupitila muli ba Shikulu besu ba Yesu Kilishtu! ⁵⁸ Pakuti pali fyefyo,mwe bakwasu, mube abakosele ne kubulo kutenkashiwa. Mufulila lyonse mu mulimo waba Shikulu, pakuti mulishi ati imilimo yenu muli ba Shikulu te kwa lukoso.