¹ Galisa nani tanis kira, manani ra ya mita trik maimunan ki? manani mamwan kat, Jisaskrais dus prinhni ra saban ba klir mamrikan. ² Diara kumi man mamkabi walan ai dauksa: Spirit hulikira briram ba lâ ba wina sa ki apia kaka wali kasak lukram ba wina briram ki? ³ manani sins kam ba tanis banhwi sma ki? Spirit ra ta krikram yaba, nanara wînatara ra danh takaihma ki? ⁴ Panis ailal taki bara diara apu sma, diara apu kaia dukiara karam ki? ⁵ Witin ka mita sika Spirit hulikira maiki sa an sain aihka kira dauki sa, baha ba lâ ba mita daukisa ki, apia kaka kasak luki wali ba mita ki? ⁶ Abraham baku: " DAWAN RA LUKAN BAMNA KASAK KULKAN," ⁷ Baku sin nu taki mauhs, ya nani kasak lukan ra ba, Abraham luhpia sa. ⁸ Dawan ba pat ulban ka ra suin kan, Dawan luha nani bara ai kasak ka lukan ka ba wal Lâ ka daukaia, bila baikra ba smalkan Abraham ra kaina manis: "MAN BAK TASBA AISKA NA BLIS MUNAN KABIA." ⁹ Baku bamna, ya nani kasak lukan ra iwi nani ba blis munan sa Abraham wal, kasak la lukra waitnika. ¹⁰ Ya nani La wark ka ra ai kasak ka briba lahtuban kara sa; kan naku ulbansa: " YA UPLIKA NANI LÂ BILARA ULBAN BA DAUKRAS SA KAKA LAHTUBAN KARA SA". ¹¹ Nanara klir sa upla kumi sin patkas kulkras kabia apia sa Dawan mawan ra Lâ ba mita, kan: "KASAK KIRA BA KASAK LUKAN KARA IUBIA". ¹² Lâ ba sika kasak lukan wina balras sa, bamna: YA UPLIKA LÂ BILA RA ULBAN NANI DAUKI BA, BÂRA IWAIA KABIA". ¹³ Krais ba klin muni wan sakan sa lahtuban ka wina witin ai wina tara wal lahtuban ra dimi yawan dukiara, kan naku ulban sa: " YA UPLIKA DUS RA PAMI IKI BA LAHTUBAN SA". ¹⁴ Abraham yamni ka ba briaia kan kaka upla Jisas Krais kaikras nani ba, yawan nani na Spirit hulikira briaia sa kaka. ¹⁵ Muihki nani, ai suis mai aisamna tasba uplika baku. Waitna nani ba pramis kum daukisa taim, upla wala mita sip slinbi tikras an kau sin prakras, pat wal wapni takan taim. ¹⁶ Nanara pramis nani ba aisan sa Abraham kiamka kum ra." Kiamka nani ra" kabia wiras, upla ailal ra pitka, kuna kumi ra baman, "an man kiamkam", baha sika Krais. ¹⁷ Nanara yang diara kumi aisaia want sna na naha: 430 mani luan, Lâ kum bal diman ba, Dawan ai pramiska suin kan ba knaia ra lakras. ¹⁸ Bamna prapati ba Lâ bila bak balsa kaka, baku nara pramis bak apia sa. Kuna Dawan sika Abraham ra pramis wal yaban. ¹⁹ Lâ ba dia muni paskan, baku kaka? Saura dadaukra nani ba taka paskan, Abraham kiamka ra pramis munan kan ba balan kat ra. Lâ ka ba Insal nani bui tabriaika kum ra yaban brih ta krikan. ²⁰ Kuna nanara, upla kum upla wala wal aisi sa taim, tabriaika apu. Dawan sin witin pramis daukan taim Abraham ra tabriaika yus munras kan. ²¹ Baku nara Lâ ba Dawan pramis ka mapara sa? ¡ apia pali sa ! Lâ kum ba rayaka yabaia sip kan kaka, diara nani pitka kat daukaia tanka ba lâ bak bal dimaia kan. ²² Kuna ulbanka ba mita tak ba saurka atia sa baku ra suin. Dawan mita baku ra suin yawan nani suak takan lâka bribia ya Jisaskrais ra ai kasak ka lukan ka bribia kaka. ²³ Kau kasak lukan lâka ba bal dimras kan pyuwara, lâ ba mina munhtara kan, silak ra baku kasak lukan lâka ba bal diman kat ra. ²⁴ Baku bamna lâ ba wan yabal ka kan Krais balan kat, baku lika sip kan patkas wan kulkaia kasak lukan ka ba wal. ²⁵ Nanara kasak lukan lâ ka ba bal diman nara yawan kau wan tabriaika kum minara apia sa. ²⁶ Kan manani tak sut ba Dawan luhpika atia sma Jisaskrais ra kasak lukan lâka ba wal. ²⁷ Manani ailal pali sma Krais ra tahbi mau daukan, manani Krais briram. ²⁸ Yû nani kiamka apia, Grik nani sin apia, alba lâ kara nani ba sin apia, pri lâ kara tauki nani ba sin apia, waitna apu, mairin sin apu, kan manani alsut ba kumi ra sma KraisJisas ra. ²⁹ Manani ba Krais dukia sma kaka, Abraham kiam ka sma, an prapati ka ba sin dia pramis ka baku.