¹ Bamna mani 14 (mata wal sip pura walhwal) luan pyua wina kli uli wari Jerusalem ra, Bernabe an Tito sin aikuki. ² Bara uli wari ba sika pirit hulikira diara kum aimadikan ba mita, ba wina yang Dawan bila upla wan Dawan kakaira apia nani bara smalkisna ba tanka sin wiaia dukiara. Upla kulkan ka tara brî nani bara sapni kira ni wal aisari, pain daihra walaikari, patkas waras sna ba. ³ Tito ba yang wal tauki kan, witin Grik nîsan ka kan yaba sin, karhna munras kan sirkunsisan takaia. ⁴ Kunin kira muihnika nani ba balan sapni kira yang nani Jisaskrais wal prî lâ kara mauhisna nani ba aikaikaia. Witin nani ba alba lâ kara dimi mauhamna ba aibrinka kan, ⁵ kuna yang nani aima kumi sin witin nani mina munhtara bawi mauhras kari, ba tak ba Dawan bila rait kaba manani ra bapi buan kabia dukiara. ⁶ Bamna upla kulkan ka târa brî talia nani kan ba, dia kâta sapan, yang kupi lukras, kan Dawan sika upla kum ba kau purara pitka kulkras, bahnan kulkan ka târa brî bak kan nani ba yang maipara, diara raya kum sin aimadikras. ⁷ Kau ni, witin nani aikaikan Dawan bila ba yan wal ba sirkunsisan takras nani ba dukiara, Pita ra Dawan bila yaban kata baku sikunsisan takan nani ba dukiara. ⁸ Baku sin Dawan Pita wal apastil wark ka daukan sirkunsisan takan nani ba wal, yang wal sim wark takan upla wan Dawan kakaira aipa nani kan ba wal. ⁹ Jems, Cefas an Jan nani ba prias watla bapanka ba witin nani ba kan kat, ai dahra walan yang nani ra lilia laka bâra ba, bamna baku lika Bernabe an yang wal ra ai mihta aihkika aikan pana baku. Naha daukan na ai brinka kan yang nani ba Dawan kulkras nani bara wamna, bara witin nani lika sirkunsisan takan nani ba wal waia. ¹⁰ Witin nani diara kumi makaban ba upla umpira nani ba aiuya tikamna ra, yang sin baku pali luki daukaia brinka kari dukia. ¹¹ Kuna Cefas ba Antioquia ra balan pyua ra, kasak mapara takri kan witin saura dauki tauki kan. ¹² Kau Jems blikan uplika nani ba balras kan pyua ra Cefas ba upla Dawan luha nani aikuki kumira plun pi kan. Banma baku sin nahnani waitnika balan pyua kat laiuhra taki taukikan Dawan apu nani wina. Witin sibri kan sirkunsisan daukbia wisi karhna aisi kan uplika nani wina. ¹³ Yû kiamka nani kata sin nahnani ai mawan wal brî kata wal prawan. Bernabe pali sin baha yabalka saura ra ai mawan wal brî nani mita brihwan. ¹⁴ Bamna yang daihra walri wapanka nani ba Dawan bila wal apia kan nara, upla sut mawan ra Cefas ra wiri: "Man ba Yû kiamka kum sma, kuna Dawan luha nani baku iwi sma kâkâ an Yû kiamka baku apia, nahki karhna munaia isma ki Dawan luha nani bara Yû nani baku iubia? ¹⁵ Yawan pali na Yû kiamka sa wan baiki sakan wina an Dawan luha saura dadaukra kiamka apia; ¹⁶ Sakuna, yawan pain pali nû sa upla kumi sin lâ ba mita suakbi sakras, Jisaskrais ra kasak lukan lâ ka ba mita lika. Yawan nani sin kasak lukan lâ kaba mita Krais Jisas ra balan baku lika kasak lukan lâ kaba mita suakbi wan sakbia dukiara Krais ra an Musis lâ ka bila ba mita apia. Kan upla kumi ra sin suaki sakbia apia naha lâ kana mita. ¹⁷ Kuna yawan sin Krais mita suaki wan sakbia wisi man trai kaiki sa kaka, yawan nani sin saura dadaukra kum pitka sa, bak nara Krais ba dia saura daukbia wisi wan tatukbisa ki? ¡Apia pali sa! ¹⁸ Bamna baku sin pyua kum yang diara saura kum suih tikri ba kli bal daukuna kaka, yang lâ wina klaia ra pali sna. ¹⁹ Kan lâ ba mita aikan lâ bara pruri, Dawan wal iwaia dukiara. ²⁰ Yang na Krais wal dus prihni ra pruri. Rayaki na yang apia sna, Krais ba yang ra îwi sa. Na wîna tara ra îwi sna na, Dawan luhpia ra kasak lukan lâ ka tara ba mita, witin latwan aikaikan an ai rayaka sin yaban yang dukira. ²¹ Yang Dawan lilia lâ ka brî ba unra lakras, kan suak takan lâ ka ba Musis lâ ka ba wina kan kâkâ, ¡bamna Krais ba bahki pruan!