Pasal 13
RIHIM ERER PE EHLA AFEITAP
1
En ihitit enon mneihofa tamtorimat urfri omnas Yesus enohok tamtori-tamtori Galilea sop tendisila sop deritane Pilatus saet etepar mensao urfri fendumat.
2
Yesus ehimtari fendumat ebope,"Esampana yam angker iti tamtori-tamtori Galilea et ehla am sefa mat aenpe tamtori-tamtori Galilea lus saetsop fenduma femarmori feyae tit?
3
Yau yisrak ebope tapse saet samo yam tapse bertobat yam penyek uma aen fetes.
4
Eisae fone kedelapan belas tamtorimu rerper saet menare en raruk kolom SIloam elot sop foni fendumat saet yam monase fendumat renihi pen ehla sop sefa fetes ut wen wifei penyek tamtorimat sop renaha ren Yerusalem?
5
Yat yesrak yibope,tapse aen saet sop yam tapse afarahi yam penyek sehe ema sop aper!"
AIMAT SOP TAPFO
6
Yesus ema esrakri eyale tit enon tomtues sop ebema ebema aiaramal etuenon saet selmalafo en witilon anggur saet sop samo et oma ut waho pape aifomat tit, et tap arome.
7
Afei tit sop esrak ebope ofei witilon tul delyak yame toul yat yama yoho pape fo ail aramat sop yau tao yaro mefo mat tes.Saet yalus alara tit endu aen nahofa saet ehla-ehla selmalafo sop ai et?
8
Samo mat saet ofei witilon ehimtare tuan tifya aimat tit tafun aen yametit sop aur fufo ainon yau yeil selmale tit aimon sop yafok pare daha efyapal.
9
Yemnase ai matit tafu aurfyam fo yame ama tit saet tapse aurfianfo saet Tuan tan sop alus."'
YESUS OFEI BEBU RIWAHETO SABAT
10
Samotes,Yesus fenti obanipe enfotes sinagoge samo waheto Sabat.
11
Enoto enontomtues mofnimat foman ehile saet ofeinari enduwalo enon limtuul belas yame renfani amfendima tit datiu eyal saet tapse iten etuen etuen.
12
Samo Yesus eromi,et ehimri amfendumat sop esrake,"Hai amfenai yam delyak afok pari ren mehai."
13
Samo Yesus lasenri morimat saet anifendi iti sop samo tit ema iten etuen aha sop snanyak Arpame.
14
Saet sop uren ni sinagoge so ennihi garam saet Yesus oferi bebu saet waheto Sabat et esrak ebopo tamtorisefa enam waheto limtes sop ofei arseya.Samomat oma waheto Sabat."
15
Samo Tuhan esrakri tamtori tit,"Yam tamtori-tamtori munafik!Baen yam penyek sehe afokpari sapi sop keledai yebema yofau ren kandang sop yadar darri yemrak ut emus en waheto Sabat?"
16
Saet sop tit baen ela amfenditit,tamtori Abraham sop saet etak aene samsenamseen limlu belas yame saet foman saet ri afok pare en pele fetes sop tit samo waheto Sabat?
17
Saet Yesus esrak ri peyama penyek raukirya saet rifemari ritamtorimat sefa momlo rifei afo penyek endu rifeinar omrak aha sop saet afeinari.
ESRAK EYAU SESAWIFO SOP RAGI
18
Samo mat saet Yesus esrak ri saetfe ensampana Kerajaan Arpames entit?Saet ensanpan yau yaiten yakman?
19
Kerajaan ARPAMES sae aenofe seseawifo sop aiti tamtori sop riafas aen witilon;Fo aen onrak aha aennofei ai sop mani-manihe aen onotani lelyo saet aila aila-aila."
20
Et esrak tit tero,"Etsop ensampan yau yakim nar Kerajaan ARPAMES tit enofe ragi sae ritit tamtormal amfendi sae riartane warilon?
21
Sukat tepung aen penyek sehe adonan matit adaraha.
SAET MANENTU SOP RITRENONFIA
22
Yesus salilo kota-kota sop sao-sao et esrarak ri mblaohe salil etak nare Yerusalem.
23
Saet tamtorimat rihimtare rebope TUHAN ensampana endu manentue tamtorimat renonfia?"Yesus esrak e ebope fendumat penyek.
24
Rifetare saet endumat riten recil riao rantanmat netuwen saet yau yesrak yibope tamtori sefa rifetare recil en no samo fendumat tapse riafetar mao.
25
Saet tuan limu etu ini sop teltit fan ramtan limumat enon ihiyam etuen melamuar sop tatuk ramtan sop esrak;tuan sorok ya afokfia femim etsop ehimtare yau tap yomnas yamme ehifa haet mima.'
26
Saet yam sop mihimtare,"Mim sop mompana sop manes mus sop mikienon et.Et sop esrak emim rara-rara sao mim.
27
Samo et sop ehimtare yau tao eilale sop tap yemnase et enninifa sop yam mimimar,aomar sop atak aoe saet penyeksehe mifeinar ehla!"
28
Saet miten etan sop sen senema yau yorome Abraham,Ishak sop Yakop saet penyek sehe nabi renon nihi warilon Kerajaan Arpames enonihi yam atepa re aen melamuar.
29
Samo tamtori-tamtorimat riminar ren ondi sop semiar saet sop tou sop ripu fendumat rameros ren rin Kerajaan ARPAMES warilon.
30
Melmalse tamtori-tamtorimat renbiti saet aen afei en matan et tamtori-tamtori mat matan saet aen mafei biti."
YESUS SIS YAPEAO YERUSALEM
31
Samomat saet tamtori Farisi rimi ribope Yesus sop esrak,"Aonar aene pelemal tit saet.Herodes boupe riatut prari."
32
Yesus ehimtari fendumat,"Aonar sop esrak ebope feti atepar en,waheto tit a amera,yatsop yaheu roh-roh fetes ren ramemnar ren tomtumat sop en rihi waheto toul yat sop yafeinar aopar erseyamat."
33
Samomat saet yau yaha lilyo mblaohe sesia araha tit amer-amer sano saet tapse hofa tomtues aper aen melamuar Yerusalem.
34
Yerusalem,Yerusalem yam mitut pare para nabi sop merajam tamtori ut wikispar wibope! Seisortan sop yau yohautaru yokimnar natun-natunri sae enofe ayam tam ekinangturi so itop puuse.samo mat yam tapse wiyorpare.
35
Saet limumat mamuhe sop etmu tapse.Yau yisrak u yebope yam tapse sop yorome yau yama yotu ini yen samo yam sop yisrakri yaurfiam et sop yomi warilon ha TUHAN!"