1 Yesus nook kedue belas keulun murid da, belalu ngokoi tong dali kuasa nget ngusir roh jahat nelang pebome kawan ulun dongo. 2 Uli iro da nyiu dali tulak pebome ulun sakit nelang ngulek kabar nget me Allah merintah ye lei raja. 3 ulek Yesus tong dali,ya ngoit se macam te pama ko te alan elui kam."ya ngoit tungket,atawa tas,duit, maka okan iya ngoit karut due lambar. 4 Te kame kam naterima,ondo te biro empe kam ngikah jaa iro. 5 nelang te kame kam sa naterima,kede kam ngikah jaa iro,kebas dabu ke palat poo kam, yelei peringatan tong dali." 6 Kawan ulun ye siut Yesus tulak,belalu malan tong kawan desa nget ngulek kabar buen iro nelang pebome ulun sakit te kame - kame. Da Herodes bingung. 7 Kede da Herodes,ye merintah te Galilea,keringa nget kawus kejadian iro. da bingung,Leka naan ye ngulek pasti da Yohanes pembaptis apu bolum mulik eso. 8 Naan ade ye ngulek pasti da Elia apu sulet eso, ulun bali ade ngulek himat erai keulun nabi ke kawan nabi bayuh one apu bolum mulik. 9 Da Herodes ngulek," Ab apu nyiu ulun motek utek Yohanes. et ulun ihe, dase sebene ye da.? naan deo macam ye apu dinga ab nget da," belalu da Herodes ngeto dian tau kite Yesus. Pengokan tong lime ribu ulun. 10 Kawan rasul Yesus sulet mulik pelos ngesah tong Yesus kawus ye apu na ene dali.Yesus belalu ngoit dali, belalu dali sendro tulak gegales tong jaa Betsaida. 11 Et kede kawan ulun ketoan nget hal iro, dali demasu Yesus, da nerima dali,belalu bepander tong dali nget me Allah merintah ye lan raja.nelang da ade pebome kawan ulun sakti ye naan te botuk dali. 12 Kede mate olo mulai leteng,kedue belas ulun ye siut Yesus sulet demasu da belalu ngulek,Guru, runa ihe ranai, lewi buen aka teruna onsan te kawan jaa ali kawan desa te sekiar ihe. 13 Et Yesus nuing, kam ye ngokoi tong dali pengokan."kawan murid Yesus ngulek, kain je naan lime ketipak rote ali due keikui esa, se kain sagar tulak laang moli pengokan dian kawus ulun ihe.? 14 ( naan se bangsa lime ribu keulun upo te behe.) Yesus ngulek tong kawan ulun ye siut da, siu kawan ulun ihe tuet bekelompok, nget lime pulu keulun erai kelompok." 15 Kawan ulun ye siut Yesus iro nampelor se ye naulek Yesus tong dali. 16 belalu Yesus ngalap lime ketipak rote ali due keikui esa iro, uli iro da nyenaa tong langit ngulek terimakasih tong Allah,uli iro da nyeset rote ali esa iro ali kami da belalu ngokoi tong kawan ulun ye siut da dian ngebagi ye tong ulun deo iro. 17 Dali kawus ye man empe boting.belalu kawan ulun ye siut Yesus ngumpul ye lewi pengokan iro deo ye naan due belas sempikan. 18 Te sindai olo, kede Yesus desung bedoa gegales,kawan ulun ye siut da sulet demasu da. Yesus nyetuk tong dali, menurut lek ulun,ab ihe dase.? 19 Dali nuing,"Naan ye ngulek da Yohanes pembaptis, naan ade ye ngulek da Elia,ye lain eso ngulek erai keulun ke kawan nabi jaman bayuh ye apu bolum mulik. 20 Et menurut kam, Ab ihe dase."? situk Yesus, da Petrus nuing "Guru ko iro Raja penyelamat ye na janji Allah. 21 Et Yesus pekingat dali ali keras dion dali ya ngulek tong dase pun prihal iro.Yesus ngulek prihal mate da. 22 Yesus ngulek ade, anak meresia ye puna harus deo nanggung kenare nelang na lawen ene kawan pemimpin ali kawan imam kepala,nelang kawan guru agama, da sagar na bunu , et te olo ketolu sagar na iluk bolum mulik." 23 Udi iro Yesus ngulek tong ulun kawus ye naan te biro. ulun ye kakan siut ab, da harus ya ngingat kepentingan ye gales.ngoson salib da setiap olo,nelang seleur siut ab. 24 Leka ulun ye kakan mempertahan pemelum da,sagar kejawehan pemulum da,et ulun ye nyarah pemulum ye nget kepentingan ab,sagar nyelamat da. 25 Se untung ye tong dase - dase ulun aka kekawus denia ihe jaji milik da, et da perusak nelang kejawehan pemulu ye.? 26 aka ulun mangen mengaku ab ali pengajaran ab, anak meresia ade sagar mangen mengaku ulun iro te kede da sulet odi olo ali kuasa ye nelang ali kuasa ma nelang kuasa kawan malekat ye berasih. 27 Buen kam ketoan: ke botuk kam te behe naan ye sa sagar mate semale da kite Allah merentah. Yesus sendro Musa ali Elia. 28 Kira - kira 8 olo uli Yesus ngajar kawan hal iro, da ngoit da Petrus,da Yohanes,ali da Yakobus tong moo erai gunung dian bedoa. 29 Desung Yesus bedoa te biro, waemate da beubah nelang pakaian ye jaji bura beama. 30 Biro kite due ulun desug bepander ali da kedue ulun iro ye Musa ali Elia. 31 Ye ngeluar unuk kemuliaan ali bepander perihal mate Yesus ye sagar lekah na genapi tai Yerusalem. 1 32 Kede iro Petrus ali kawan uyang da desung mengantuk bene,et kede dali bujur - bujur sadar, dali kite kemuliaan Yesus ali due ulun ye jakat sendro da. 33 Te kede kedue keulun iro kakan ngikah Yesus, da Petrus ngulek tong Yesus,Guru,buen bene taka te behe. ware taka pejakat tolu pondok : erai tong ko,erai tong Moses,erai eso tong Elia,"( Da Petrus ngulek nget iro ali sa ketaru se ye naulek da) 34 Kede da Petrus desung bepander,sulet erai jaun ye nutup dali,empe dali takut. 35 uli iro ke jaun iro naan keringa engan ye ngulek,"Ihe anak ab ye napeli ab ware kam nyeringa da.! 36 Uli engan iro apu waa, dali kite Yesus gegales te biro, kawan ulun ye siut Yesus sa mengan nget kawus ye iro, nelang sa ngulek tong dase - dase se ye apu na teneng dali. 37 Te olo tande,Yesus sendro ketolu keulun - ulun ye siut da dolui kegunung iro, belalu ulun deo sulet demasu Yesus. 38 Erai keulun upo ke botuk ulun deo iro ngulek ali engan wale,"Guru, awat neneng anak ab je da erai keulun anak ab.! 39 Aka roh jahat nyarang da, da nyelenga ngeraring pelos unuk da ngegunsang empe bowa da ngebure,roh iro pelos ngenyiksa da nelang sa kakan keluar ke da. 40 Ab apu kaweng kawan ulun ye siut ko ngusir roh iro, et dali sa tau. 41 Yesus nuing,"Puna leha kam ihe,! kam bene - bene kawan ulun ye nyeleweng nelang sa percaya.! empe me ab sengke sendro kam nelang besabar ali kam? oit anak ko iro tong ihe.! 42 Desunganak iro malan nuju Yesus,roh jahat iro manting da pelos ngene unuk da mojat mojet. Et Yesus merentah roh jahat iro keluar pelos anak iro belalu bome.belalu anak iro na sarah mulik tong ma da. 43 Kawus ulun wauh kite kuasa Allah nget iro solai.te kede ulun sengke wauh kite kawus ye na ene da,Yesus ngulek tong kawan ulun ye siut da. 44 Perhati bebuen nelang ya sa kingat kawan engan ab ihe,: anak meresia sagar nasarah tong kuasa meresia." 45 Et kawan ulun ye siut ab iro sa ketaru ye na ulek da iro,hal iro narahasia tong dali dian dali sa ketaru,et dali takut nyituk hal iro tong da. 46 Maka kawan ulun ye siut Yesus rawek besual nget dase ke dali ye penge tamam. 47 Yesus ketoan pikiran dali, leka iro da ngepe erai keulun anak idis pelos ngondok anak iro jakat te ekang da. 48 Belalu da ngulek tong kawan ulun ye siut da."Ulun ye nerima anak ihe leka ab,bearti nerima ab nelang ulun ye nerima ab, nerima da ye ngutus ab. leka ulun ye penge dis te botuk kam ye iro ye penge tamam. Pihak ye sama. 49 Yohanes nuing da,Tuan, kain kite ulun ngusir setan makai aran tuan, et kain kelamen da,leka da sa ketaka." 50 Ya kelamen da, Ulek Yesus tong da Yohanes ali kawan ulun ye siut Yesus ye bali ye,leka ulu ye sa ngelawen kam,bearti siut ke kam. Yesus sanaterima tai Samaria. 51 kede apu dani wayah ye Yesus naengkat tong sorga,da menguatkan ate tulak tong Yerusalem. 52 Belalu da nyiu ulun tulak one ke da,kawan ulun ye na siu da iro tulak belalu masuk tong erai jaa te Samaria dian nyedia nget kekawus tong Yesus. 53 Et kawan ulun te jaa iro sa kakan nerima Yesus,leka tujuan alan da tong Yerusalem. 54 Belalu kede kawan ulun ye siut Yesus, ye iro da Yakobus ali da Yohanes ketoan nget hal iro, dali ngulek,"Tuhan, se Tuhan kakan, kain kaweng apui dolui ke langit pakai ngabinasa kawan ulun ihe. 55 Yesus sekelap, belalu ngereket dali. 56 uli iro dali tulak tong jaa ye lain. Tantangan nahadap pengikut Yesus. 57 Desung Yesus ali kawan ulun ye siut da nampelos alan dali, naan ulun ngulek tong Yesus,"Guru,ab kakan siut ko tong kame ko tulak.!" 58 Yesus nuing, sarigala naan liang,nelang tempulu naan salai(sarang) Et anak meresia beloh naan runa ye loku." 59 Belalu Yesus ngulek tong ulun lain,hayu siut ab. et ulun iro ngulek,"Guru,ab kaweng uli one ye laang ngelebeng ma ab. 60 Yesus nuing,dion da ulun mate ngelebeng ulun matei ye gegales. et ko, alan tulak nelang ulek kabar nget Allah apu merentah." 61 Naan ade erai keulun ye bali ngulek,"Guru,ab kakan siut ko, et ab kaweng uli one ye laang ngulek tong kula warga ab," 62 Yesus ngulek tong ulun iro,"ulun ye apu tela meluku, belalu ngelap tong odi lutuk, beloh patut jaji ulun pelian na Allah.