¹ Te sindai kede,Yesus jakat te diding danau Genesaret. ulun deo besensolet nget ngeringa kabar ke Allah. ² Yesus kite naan due jukung te diding danau iro.kawan ulun ngeto esa apu dolui ke jukung iro nelang desung mui lunta dali. ³ Yesus sungket tong erai jukung,ye iro jukung na Simon, belalu nyiu Simon nujul jukung da iro oro idis kepampang.Yesus tuet tesuang jukung iro belalu ngajar ulun deo. ⁴ Demih uli ngajar,da ngulek tong Simon "kayuh tong runa ye takei,timbai lunta ko ngeto esa" ⁵ " Guru," ulek Simon, erai malem budas kain behimat begawi, et beloh naan mahan se - se.! et leka ko nyiu,dionleh : ab nimbai lunta eso. ⁶ Uli dali nimbai lunta,dali mahan esa deo bene empe lunta dali kakan bereset. ⁷ Leka iro dali kaweng awat ali kawan uyang dali te jukung bali. kawan uyang dali iro sulet belalu dali sameh - sameh ngisi due jukung iro ponu ali esa empe kawan jukung iro sarat. ⁸ Kede da Simon kite iro, da tuduk te hadapan Yesus,belalu ngulek,"ikah ab, Tuhan.! leka ab ulun bedosa.! ⁹ Da Simon ali kawus ulun ye sendro da ke wauh kite deo esa ahan dali. ¹⁰ Nget iro ade kawan uyang Simon,ye iro da Yakobus ali Yohanes, kawan anak Zebedeus. Yesus ngulek tong da Simon,"Ya takut.! ke nehe ko sagar jaji tukang melunta meresia. ¹¹ Da Simon ali kawan uyang da narik kawan jukung iro tong diding pampang,belalu dali ngikah kawus ye, pelos siut Yesus. ¹² Te sindai olo, Yesus naan te erai jaa.,te biduh naan erai keulun upo ye te unuk da ponu ali kadan.kede da kite Yesus,da tunduk te hadapan da nelang kaweng,"Guru,aka ko kakan, ko tau ngempe bume ab. ¹³ Yesus mege ulun iro nelang ngulek,"ab kakan,ko bume.! kede iro ade penyakit da jaweh. ¹⁴ Belalu Yesus kelamen ulun iro ngesah hal iro tong dase - dase,ulek da,alan demasu imam, kaweng da dian petendre ye ko himat apu bome.belalu alan ngokoi kurban nget ye na perintah ene Moses.ye lah bukti tong ulun kawus ye ko bene - bene apu bome. ¹⁵ Et kabar nget Yesus makin te siar te kame - kame belalu deo ulun sulet nget keringa da dian na pebome ke penyakit dali. ¹⁶ Uli iro Yesus tulak bedoa tong runa ye ranai. ¹⁷ Yesus nyembume erai keulun lumpuh. Te kede olo kede Yesus desung ngajar, naan sasenu ulun Farisi sendro kawan guru agama tuet te biro, dali sulet ke Yerusalem,nelang ke kawan jaa te Galilea ali Yudea, kuasa Tuhan naan te Yesus dian pebume kawan ulun sakit. ¹⁸ Te kede iro sasenu ulun sulet ngoit erai keulun lumpuh ye loku te munan lapik. dali kakan ngoit ulun iro tong suang belai dian tau ngondok da te hadapan Yesus. ¹⁹ Et leka ulun deo bene te biro, dali sa mahan ngoit da masuk, leka sebab iro dali ngekat da tong moo sapo belai belalu dali ngebungkar sapo pelos pedolui da sendro ali lapik da te hadapan Yesus tong botuk - botuk ulun deo iro. ²⁰ Demih Yesus kite tamam solai kepercayaan dali.da ngulek tong ulun iro, erai butung, dosa ko apu na ampun. ²¹ Kawan guru agama ali kawan ulun Farisi mulai bepander sameh dali,dase ulun ihe ye ronu ngehina Allah.? Da ye tau ngampun dosa, aka lain ke Allah. ²² Yesus ketoan situkkan dali.belau da ngulek.kone me kam nyituk nget iro te suang ate kam. ²³ Ye kame ye lewi murah ngulek, dosa ko apu na ampun, atawa ngulek, buet pelos malan.! ²⁴ Et nehe ab sagar ngulek di kam ketoan ye tong kam te moo tana ihe anak meresia bekuasa nget ngampun dosa."Belalu Yesus ngulek tong ulun lumpuh iro"buet,ekat lapik ko, alan uli. ²⁵ Ali jao ulun iro buet te hadapan dali kawus, belalu ngekat unan lapik ye, pelos uli nelang ngehormat Allah. ²⁶ dali kawus ye mandam bene belalu ngehormat Allah, nelang ali takut, dali ngulek, "Ajaib bene kejadian ye na ite ene taka olo ihe" ²⁷ Uli iro Yesus keluar belalu kite erai keulun tukang tagih pajak,bearan Lewi , desung tuet te kantor da.Yesus ngulek tong da," siut ab". ²⁸ Da Lewi jakat pelos ngikah nget kawus ye, belalu siut Yesus. ²⁹ Uli iro da Lewi ngene pesta te belai da tong Yesus.deo kawan tukang tagih pajak ali ulun bali siut man siut ali dali. ³⁰ Sasenu ulun Farisi ali kawan guru agama kesa sa sanang,belalu ngulek tong kawan ulun ye siut Yesus, kone me kam kawus man isep sendro tukang tagih pajak sendro ali ulun sa buen. ³¹ Yesus ngulek,"ulunye sehat sa perlu dokter; je ulun ye sakit. ³² Ab sulet sa laang nook kawan ulun ye nganggap unuk da apu buen,malengkan kawan ulun ye bedosa dian dali betobat kekawan dosa dali. ³³ Sasenu keulun ngulek tong Yesus,"kawan ulun ye siut da Yohanes ali ye siut ulun Farisi gagah puasa nelang bedoa, et kawan ulun ye siut da man isep. ³⁴ Yesus ngulek, se kam tau nyiu kawan tamu puasa te pesta kawin, seola pengantin upo sengke naan sendro dali.? Betantu sa.! ³⁵ Et sagar empe wayah ye penganten upo iro na epe ke dali te kede iro dali sagar puasa. ³⁶ Belalu Yesus ngesah tong dali peribahasa iro, beloh naan ulun ye nambal karut boto makai biris kain te karut kado. leka da ngebereset karut ye boto iro. uli iro kain penamal ye kado iro sa susuk ali karut ye usang. ³⁷ Nget iro ade beloh naan ulun ye nuang anggur kado tong suang kantong upak ye usang, leka anggur kado iro sagar ngene masalah kantong iro pikak, belalu anggue ye menaya,nelang kantong rusak. ³⁸ Anggur ye kado harus na buat tong suang kantong ye kado ade. ³⁹ Nget iro ade beloh naan ulun ye kakan isep anggur kado uli isep anggur usang.Anggur usang iro lewi nyaman."ulek da."