¹ Te kede iro Kaisar Agustus merintah dian kawus warga negara kerajaan Roma mendaftar unuk dian sensu. ² Sensus ye nyentela ihe nampelos kede da Kirenius jaji Gubernur daerah Siria. ³ Kawus ulun te kede iro tulak tong jaa da erai mengerai, dian nadaftar. ⁴ Da Yosef tulak ade ke Nazaret te Galilea, tong Betlehem te Yudea,runa raja Dawid na belolos; leka da Yosef ke turunan Dawid. ⁵ Da Yosef ngedaftar unuk sendro da Maria tunangan da, ye desung entung. ⁶ Kede dali te Betlehem empe wayah ye da Maria belolos. ⁷ Da belolos erai keulun anak upo,anak da ye pertama. anak iro nebungkus da ali kain, belalu na ondok da te suang dulang ye te suang riumi, leka dali beloh mahan runa penginapan. ⁸ Te malem iro naan kawan pekatik desung nyaga kawan bebiri da te padeng ikut te daerah iro. ⁹ Nyelenga malekat Tuhan petendre unuk tong dali,nelang cahaya maa ke Tuhan nyiar pemaa dali belalu dali takut bene. ¹⁰ Et malekat iro ngulek"Ya takut! leka ab sulet ngoit kabar buen tong kam - kabar ye bene - bene maka ego kawus ulun. ¹¹ Olo ihe te jaa Dawid apu na belolos Raja Penyelamat kam ye iro Kristus Tuhan. ¹² Ihe tanda ye : kam sagar sengkeruku erai keulun tia nebungkus ali kain, nelang loku tesuang dulang. ¹³ Selenga malekat iro nasendro deo malekat lain, ye ngehormat Allah dali ngulek, ¹⁴ Homat Allah te langit ye penge moo.! nelang kesenangan tong meresia te munan tana ye pesanang ate Tuhan.! ¹⁵ Demih uli kawan malekat ngikah dali nelang mulik tong sorga, kawan pakatik iro ngulek ali sameh dali, buen taka tong Betlehem laang neneng kejadian ye jaji iro, ye na ulek Tuhan tong taka. ¹⁶ Dali jao tulak, belalu sengkeruku da Maria ali da Yosef, ali tia iro ye desung loku tesuang dulang. ¹⁷ Kede kawan pakatik kite tia iro. dali ngesah se ye naulek kawan malekat nget tia iro. ¹⁸ Kawus ulun mandam keringa kesah kawan pakatik iro. ¹⁹ Et da Maria nyiok kawus iro tesuang ate da nelang ngingat ye. ²⁰ Kawan pakatik iro mulik tong padeng ikut nelang ngehormat Allah,leka kawus ye apu nadinga nelang naite dali,pas nget na ulek ene malekat. ²¹ Demih apu beumur walo olo, tia iro nasunat.pelos dali ngokoi aran da Yesus, aran ye naokoi malekat tong da one ke da te suang butung ene ne da. ²² Empe wayah ye da Yosef ali da Maria nampelos adat ngeberasih nget hukum Moses. jaji dali ngoit tia iro tong Yerusalem nget nasarah tong Tuhan. ²³ Leka te suang hukum Tuhan nasurat nget ihe. sasenu tia upo ye pertama harus nasarah tong Tuhan." ²⁴ Dali ade bemaksud ngokoi persembahan, yeiro erai pasang tempulu kuku atawa due ikui tempulu dara ye tia, nget ye apu natentu tesuang Hukum Tuhan. ²⁵ Kede masa iro te Yerusalem naan erai ke ulun bearan da Semeon.da ulun buen. ye takut tong Allah nelang desung ngemba masa ye Allah nyelamat Israel. Roh Allah nyendro da. ²⁶ Nelang Roh Allah apu ngulek tong da pasti da sa sagar mate aka male kite raja Penyelamat ye najanji ene Tuhan. ²⁷ Da Simeon na ayak ene Roh Allah,masuk tong belai Tuhan. te kede iro da Yosef ali da Maria ngoit Yesus ye eso idis iro masuk nget nampelos upacara ye naperintah ene hukum agama. ²⁸ Maka da Simeon ngepe tia iro pelos miit da, belalu ngehormat Allah. ²⁹ Nehe, Tuhan,ko apu nampelos janji ko, dion ye pelayan ko ihe mate ali damai. ³⁰ Leka apu mate ab gegales ab apu kite penyelamat ye ke ko. ³¹ Penyelamat iro apu nasedia ko. tong kawus bangsa. ³² nget pemaa ye apu maa alan tong kawan bangsa ye bali dian sulet demasu ko. da iro maa ye ngoit kehormatan tong ulun Israel. ³³ Ma ali ne tia iro mandam keringa se ye na ulek ene Simeon nget tia iro. ³⁴ Da Simeon ngeberkat dali nelang ngulek tong Maria, ne tia iro, tia ihe apu napeli ene Allah dian ngebinasa ali pakai nyelamat deo ulun Israel. Da sagar jaji tanda ke Allah,ye sagar nalawen ene ulun deo. ³⁵ Maka leka nget iro awus tabungkar se ye tesuang ate dali. kenarean ate sagar pesoo ate ko nget na towek ali pedang. ³⁶ Naan ade erai keulun nabi bawe ye apu tuha bene.aran ye da Hana,anak Fanuel, ke bubuhan Asyer, uli ngebane turu taun. ³⁷ Da Hana balu,nelang nehe da beumur walopulu opat taun, da sa pini ngikah belai Tuhan.jolo malem da sembayang te biro tong Allah ali bedoa nelang puasa. ³⁸ Pas te kede iro da ade sulet.belalu ngehormat Allah nelang bepander ngulek nget tia iro tong kekawus ulun ye ngemba wayah ye Allah ngebebas Yerusalem. ³⁹ Uli da Yosef ali da Maria nampelos kekawus ye nawajib ene hukum Tuhan, dali uli tong Nazaret te Galilea. ⁴⁰ Anak iro makin betambah solai nelang gagah.nelang pintar merehati nelang bene - bene nacinta ene Allah. ⁴¹ Tiap taun ulun tuha Yesus tulak tong Yerusalem laang siut pesta Paskah. ⁴² Kede Yesus beumur due belas taun. dali tulak tong pesta ye iro nget biasa. ⁴³ Demih pesta iro waa dali uli, et Yesus,anak iro,masih nondo te Yerusalem, ne ma da sa ketoan. ⁴⁴ Dali ngekira da apu siut sendro ali rombongan. apu erai olo dali malan demih doyeng kado dali ngeto da te padang kula warga nelang kawan ulun kepatuhan dali. ⁴⁵ Et dali beloh mahan da,belalu dali mulik tong Yerusalem ngeto da. ⁴⁶ Uli tolu olo ngeto, dali sengkeruku da te suang belai Tuhan. da desung tuet ngeringa kawan guru agama nelang ngejawab deo situkan. ⁴⁷ Kawus ulun ye keringa da wauh leka kepintar da ngejawab ⁴⁸ Ulun tuha da pada kewauh kite da, ne da ngulek tong da"U,anak kone me ko ngene nget ihe ali kain? ma ko ali ne ko gupuh ngeto ko.! ⁴⁹ Yesus ngulek, kone me da ma ali da ne ngeto ab.? se da ma ali da ne sa ketoan ye ab harus naan tesuang belai ma ab.! ⁵⁰ Et dali sa ketaru engan tuing Yesus iro. ⁵¹ Ke iro Yesus uli sendro dali tong Nazaret,nelang hakun moyo tong dali,kawus hal iro na siok ene ne da tesuang ate da. ⁵² Yesus makin betambeh solai nelang betambeh pintar marahati,nelang na sayang ene Allah nelang na suka meresia.