1 Deo ulun apu beusaha nyurat ali buen nget kawan kejadian ye apu jaji te botuk taka. 2 Dali nyurat sameh nget ye na kesah tong taka ene kawan ulun ye kite gegales kawan kejadian iro te tela ye belalu ngulek kabar iro. 3 uli ab ali behimat nyeledik kawus ye iro ketela ye, ab nganggap patut dian nyurat erai laporan yetesusun buen tong ko. 4 Ab ngene iro,dian ko ketoan betentu se ye apu naajar tong ko nget bene bujur. 5 Kede da Herodes jaji raja te jaa Yudea,naan erai ulun imam be aran da Zakaria, da temasuk babuhan kawan imam Abia.sao da bearan da Elizabet,sameh keturunan imam. 6 Pemolum dali due mensao iro je pesanang ate Allah. kekedue ye nampelos kawus perintah nelang kawus hukum Tuhan ali se awus - awus ye. 7 Dali beloh naan anak leka da Elizabet temanang nelang dali kedue ye apu tuha. 8 Te sindai olo kede babuhan Abia mahan giliran, da Zakaria nampelos tugas nget imam te hadapan Allah. 9 Ali undian,nget biasa na ene kawan imam, da Zakaria na tundru dian masuk tong suang belai Tuhan belalu nutur kemeyan. 10 Desung upacara nutur kemeyan nampelos, ulun deo bedoa te ongon. 11 Te kede iro malekat Tuhan petendre unuk da tong Zakaria.Malekat iro jakat te sila kawan meja runa nemolum kemeyan. 12 Kede da Zakaria kite malaikat iro,da embah nelang takut. 13 Et malekat iro ngulek,"ya takut,Zakaria.! Allah apu ngeringa doa ko. Sao ko da Elizabet sagar entung erai keulun anak upo. ko harus ngene aran da nende da Yohanes. 14 Ko sagar ego bene nelang deo ulun sagar siut ega aka anak iro odi ye na belolos. 15 Da sagar jaji ulun solai te hadapan Tuhan, nelang da sa sagar isep anggur atawa minuman keras.ke da na belolos da sagar te suang Roh Allah. 16 Deo ulun Israel sagar percaya mulik tong Allah,Tuhan dali. 17 Da sagar jaji pelayan Tuhan ye buen nelang bekuasa nget da Elia. da sagar pe damai nemuen ma ali anak, nelang ulun ye sa moyo ngunau sagar na pimpin ene da mulik tong alan pikiran ye koreng bujur.ali nget iro da nyedia erai umat ye patut tong Tuhan. 18 Nget me ab tau ketoan hal iro sagar jari.? situk Zakaria tong malekat iro, ab apu tuha, nelang sao ab ade apu tuha. 19 Malekat iro ngulek,Ab ihe da Gabriel, Ab malayani Allah nelang da ye nyiu ab pekempe kabar ihe tong ko. 20 Se ye na ulek ab sagar jaji tekede ye. et leka ko sa percaya, ko nende sa tau pander,; ko sagar ongo empe se ye na ulek ab ihe bene. 21 Te kede iro ulun deo desung ngemba da Zakaria. dali kado kewauh kone me da nget iro ola ye te suang belai Tuhan. 22 Kede da keluar da sa tau pander eso ali taka.da seleur ngokoi isyarat ali kami da,nelang tetap ongo. belalu ulun deo ketaru pasti da apu kite erai pengite te suang belai Tuhan. 23 Demih apu awus tugas da te belai Tuhan, da Zakaria belalu uli tong belai da. 24 Sa empe ola uli iro, da Elizabet sao da entung,belalu bekurung te belai lime bulan ola ye. 25 Da ngulek. akhir ye Tuhan ngawat ab nelang musut pehina ab. 26 Te kede da Elizabet apu entung onum bulan, Allah nyiu malekat Gabriel tong Nazaret, te jaa daerah Galilea. 27 Gabriel na utus tong erai keulun bawe bujang peruna, bearan da Maria. bawe bujang paruna iro apu betunangan ali keulun bearan da Yosef, keturunan Raja Dawid. 28 Malekat iro sulet tong da Maria pelos ngulek, Tabe,ko ye na berkat Tuhan ali cara ye istimewa! Tuhan sendro ali ko. 29 Keringa engan malaket iro da Maria embah,empe da nyituk te suang ate da se maksud engan tabe iro. 30 Maka malekat iro ngulek tong da,"ya takut.Maria,leka ko ye naketuju ene Allah. 31 Ko sagar entung nelang belolos erai keulun anak, ye harus ko ngene aran ye Yesus. 32 Da sagar jaji solai mulia nelang sagar na ulek anak Allah ye penge moo. Tuhan Allah sagar ngene da jaji raja nget Dawid, datu nini ye. 33 Da sagar merintah nget raja te moo keturunan Yakub empe kengola - ola ye.kerajaan da sa sagar waa. 34 Et ab sengke bujang paruna,lek Maria ma malekat iro.nget me hal iro tau jaji.? 35 Malekat iro ngulek, Roh Allah sagar sulet tong ko, nelang kuasa Allah sagar ngelikup ko. iro sebab ye anak ye sagar na belolos iro sagar na otus berasih. Anak Allah. 36 Ingat : da Elizabet, kula warga ko iro apu entung onum bulan,biar da apu tuha nelang ulun ngulek da temanang. 37 Leka te Allah beloh naan ye mustahil. 38 Belalu da Maria ngulek,ab ihe pelayan Tuhan. dion jaji te ab nget ye na ga ene da,"Belalu malekat iro tulak ngikah da Maria. 39 Sa ola uli iro, da Maria tulak tong erai jaa te Yudea te daerad pegunungan. 40 Da tulak tong belai Zakaria kede da masuk, da pekempe tabe tong da Elizabet. 41 Demih da Elizabet keringa engan tabe Maria, anak te suang butung Elizabet iro begarak. belalu da Elizabet na kuasa ene Roh Allah. 42 Belalu nook,ko ye pengenaberkat ke kawus kawan bawe.! Naberkat anak ye sagar na belolos ko iro.! 43 Dase ab ihe empe ne Tuhan sulet demasu ab.? 44 nget iro ab keringa engan tabe ko, anak te suang butung ab begarak ego bene. 45 Sanang buen ko, leka percaya se ye na ulek Tuhan tong ko iro sagar tulus! 46 Da Maria ngulek, ate ab ngehormat Tuhan. 47 Nelang aseng ab ego sanang leka Allah penyelamat ab. 48 Da ingat ab pelayan da ye hina! mulai ke nehe kawus bangsa ngotus ab sanang buen. 49 Leka Allah ye beloh naan batas ye kuasa nampelos kawan hal ye solai tong ab. berasih aran da. 50 Turun temurun Tuhan seleur belas kasih tong ulun ye takut ali da. 51 Maka kami da ye kuat da nempisah ulun ye sakah sombong nelang pesabak pikiran dali. 52 Kawan raja na pedolui ke tahta nelang ulun hina na engkat empe moo. 53 Ulun lauu na tanbuting da ali kawan ye buen ye tatau na usir ali tangan lawe. 54 Da ngawat Israel pelayan da, nget janji ye na ene da ali datu nini taka. 55 Tuhan sa ngubah janji da, da buen ate ali da Abraham nelang ali keturunan da empe keola - ola ye. 56 Suang tolu bulan ola ye da Maria nondo sendro da Elizabet,kado da uli tong belai da. Da Yohanes pembaptis na belolos. 57 Demih empe wayah ye tong da Elizabet. da na belolos erai keulun anak upo. 58 Kawan tetangga ali kula warga da keringa nget buen ye Tuhan ali da Elizabet, belalu dali ade siut ego ali da. 59 Kede anak iro beumur walo olo dali sulet nget nyunat da dali kakan ngene aran anak iro da Zakaria ngunau nget aran ma da. 60 Et ne da ngulek." Sa! da harus na ene aran da Yohanes." 61 Beloh naan sunah erai ulun ke kula warga ko bearan nget iro, ulek dali tong da. 62 Belalu ali isyarat, dali nyituk tong da Zakaria nget ga da,dase aran anak da iro. 63 Da Zakaria kaweng erai batu tulis belalu nyurat,aran iro da Yohanes," dali kawus mandam. 64 Te kede iro da Zakaria tau paner eso pelos ngehormat Allah. 65 Kawan tetangga da uras takut, nelang kabar iro tesiar tong kawus daerah pegunungan Yudea. 66 Kawus ulun ye keringa hal iro nyituk te suang ate ye," jaji se anak iro nende.? leka Tuhan nyendro da. 67 Da Zakaria, ma anak iro, na kuasa ene Roh Allah empe da ngulek paket ke Tuhan Da ngulek, 68 Dion taka ngehomat Tuhan Allah Israel.! da apu sulet ngawat umat da nelang ngebebas dali. 69 Da ngokoi ma taka penyelamat ye ke turunan Dawid, pelayan da. 70 Bayuh alem lalo kawan nabi pelian da Tuhan apu ngokoi janji ye. 71 Dian nyelamat taka neke musuh taka nelang ke kuasa kawan ulun ye muar taka. 72 Dian petendre kebuen ate da tong leluhur taka, janji da ye bersih iro sagar na tampelos. 73 Ye besumpah ali da Abraham ma taka,nelang bejanji nget nyelamat taka ke musuh taka. 74 Nget taka sagar na bebas ke kami musuh - musuh taka dian taka kate melayani Da sa usah naan takut. 75 Seleur demasu da nelang ngokoi kesanang ate da seola umur taka bolum. 76 Ko,u anak ab, sagar na otus nabi Allah ye penge moo.Ko nautus one ke Tuhan dian ngoa alan tong da. 77 Dian ngulek tong umat ye dali sagar neselamat, aka Allah apu ngampun kawan dosa dali. 78 Tuhan taka buen ate nelang berbelaskasihan, dian nyelamat taka da sulet nget mate olo timbul te pita subuh. 79 Nget iro da ngokoi maa da tong kawus ulun ye bolum te dendem nelang ketakut da ngayak taka te alan ye nuju kedamaian." 80 Anak Zakaria iro betambeh solai nelang betambeh kuat roh ye. da nondo te padeng gurun, empe wayah ye da petendre unuk da tong bangsa Israel.