¹ Kade kau dah dibangkitot basamo Kristus, gago jokot-jokot nang ka atas, tampat Kristus barado, dodok do sabaloh kanan Allah. ² Pekerot jokot-jokot nang ka atas, buke jokot nang ka dunio. ³ Sabab, kau dah mati ba idupngu basamo Kristus doop Allah. ⁴ Pas Kristus, nang koolah idupngu nyatoot diri-E nuju katangane nang kaduo kalie. Kau ugo Mao dinyatoot doop kamulian basamo- samo ba Io. ⁵ Karano koo, matiot amio pon nang ba asal dari parubayoh duniongu, koolah pancabulan, kacamarot, hawo nafsu, kamaoan many jahat, ba sarakoh, nang panyambohot ka bahalo. ⁶ Hal-hal koolah nang ngamuat murka Allah mao atok. ⁷ Dee, kau ugo ngamuat io pas kau masih idup di doope. ⁸ Kanio buoklah samua'e koo: kaberoot kamurkaot, kategetot, fitnoh, ba kato' caco' dari mootngu. ⁹ Ame agi kau baaoki karano kau dah nangoot manusio lamongu basamo ba parbuatane. ¹⁰ kanootlah manusio barahu, nang taros-manaros dibarahui ba pangatahuot sasuai ba gambar dari panciptoe. ¹¹ Doop hal nyian, no ado agi urokng Yunani ato' Yahudi, urokng basunat ato' no basunat, urokng Barbar ato' Skit, kuli ato' urokng mardeka, tapi Kristus koolah samua'e di doop sagalo sasuatu. IDUP NANG BARAHU BA SESAMO ¹² Jadi, Medes urokng-urokng pilihot Allah, nang kudus ba dikasihi, kanootlah ka kau balas kasih, karamohan, karandohot ati, kalamutot, ba kasabarot. ¹³ Sabarlah seko' urokng ba nang laen, saleng mangamponilah Kalo ado seko' urokng nang basaloh ka nang laen. Sabayo ba Tuhan nang dah ngamponi kau, jakoo ugo kau haros saleng mangamponi. ¹⁴ Di atas samuo koo, kanootlah kasih, jadi pangikat nang langkap. ¹⁵ Biarlah damai sejahtera ngandaliot ati ngu karano onto koolah kau dinyaru jadi sege' tubuh, Dan basokorlah. ¹⁶ Biarot Kato' Kristus malimpoh diop di doop kau, ba sagalo hikmat kau ngajar ba nasehati saurokng ta adap nang laen, enyahanlah mazmur, lagu- lagu pujiot, ba enyahan-enyahan rohani, samua'e panuh ucapot sokor di doop ati ngu ka Allah. ¹⁷ Amiopon nang kau ngamuat, diop kato' atopon pabuatan, amuatlah koo diop nano Than Yesus, sambir batarimo kasih ka Allah Bapa, ngalalui Io. IDUP NANG BARAHU DOOP RUMOH TANGGO ¹⁸ Bini-bini, tondoklah ka akingu jamae saharosse ka diop Tuhan. ¹⁹ Aki-aki, kasihilah biningu ame ngamuat kasar ka mereka. ²⁰ Kamudo-kamudo, turuti urokng tuhongu diop sagalo hal karano nyian ngaso'ot Tuhan. ²¹ Bopo'k-bapo'k, ame gago' kabero'ot anak-anakngu supayo mereka no patoh sumangat. ²² Kariawan-kariawan, patuhilah tuan-tuanngu nang ado kadoop dunio nyian diop sagalo hal. Amuat koo buke kahe mereka nanang kau onto ngaso'ot mereka malaenkan ba tolos ati karano gai ka Tuhan. ²³ Amio sajo nang kau ngamuat, amuatlah ba saganap ati ngu angayo onto Tuhan buke onto manusio, ²⁴ Sabab kau nahui Dari Tuhan kau Mao narimo waresot onto upohngu. Kristus Tuhanlah nang ago kau ngalayani. ²⁵ Sabab, urokng nang ngamuat salon mao narimo balasan atas kasalohot nang io ngamuat no ado nang do ngacoaliot.