¹ Sabab, aku mao kau nahui sidi barate pajuangan nang ku ngamuat onto kau, ba ne'ido' nang ado di Laodikia, onto samuo urokng nang nape suoh batamu muho ba aku. ² Tujuanku nyian supayo ati ne'ido' tahibur ba disatuot doop kasih supayo ne'ido' mamiliki sagalo kakayo'ot nang barasal dari jaminan akan pangaratiot ba pangatahuan dari rahasio Allah, koolah Kristus sandiri. ³ Doop Io, tasambunyi sagalo harto dari hikmat ba pangatahuan. ⁴ Aku madohot jokot nyian supayo no ado urokng nang nipu kau ba padabatot nang kadangaratne masok akal. ⁵ Sabab, kadepon tubuh jasmaniku no ado sabayo-bayo ba kau, tapi aku sabayo-bayo ba kau doop sumangat, aku barepo-repo nanang kataatotngu nang baek ba kataguhot imanngu kadoop Kristus. TAROSLAH NUNOOT KRISTUS YESUS ⁶ karano kau dah narimo Yesus Kristus jadi Tuhan, iduplah taros doop Io, ⁷ baakar ba umpatotlah diringu doop Io, taguhot imanngu jamae dah dingajarot ka kau, manyaki ucapot sokor. ⁸ Ba ati-atilah supayo ame ado sa urok pon nang nahan kau ba filsafat nang kosong ba nyasatot, nang bassal dari kabiasaan manusio ba atoran-atoran roh dunio, buke ba parensip-parensip Kristus. ⁹ Sabab, ka doop Io diop saluruh kapauhan kailahan nang idop doop rupo jasmani. ¹⁰ Kau dah dingisi doop Io, nang adalah Kapalo atas samuo pamarentoh ba panguaso. ¹¹ Kadoop Io, kau ugo dah disunat, buke make sunat nang dingamuat kokot manusio, tapi make sunat Kristus, nang natak tubuh kadagenan nang badoso. ¹² Doop baptesot, kau dinyobor basamo Kristus, dibangketot ugo basamo-samo ba Io ngalalui imanngu doop kuaso Allah nan mangketot Io Dari antaro urokng mati. ¹³ Kadepon de'e kau mati doop palanggaran-palanggaranngu ba kadaginanngu nang no basunat, dah diidupot Allah basamo-samo ba Io nang dah ngamponi samuo palangaran diri. ¹⁴ Io dah matalot Surat utokng ba atoran tuntutane nang ngalangi hobongan antaro Allah ba diri. Io dah nicok ba makuotnyo'o ka atas kayu salib. ¹⁵ Io dah ngapasot pamarentoh ba panguaso, taros nyadiot Io tontonan nang nyupatni karano kamanangan-Ne ka atas kayu salib. AME NGIKUTI ATORAN-ATORAN NANG DINGAMUAT MANUSIO ¹⁶ Karno koo, ame biarot seko' urokngpon ngakimi kau ba masaloh makot ba nyocok ato' ari rayo kaagamaan, parayaan buot barahu ato' ari sabat. ¹⁷ Samuae koo Kahe bayangan onto' hal-hal nano, tapi rupo' nang sabanare Kristus. ¹⁸ Ame biarot urokng nang aso' ba kababohot ati nang Palsu manyamboh ka malaekat-malaekat ngakemi kau. Ne'ido' nyian urokng-urokng nang suko ba pananangan jokot-jokot enek ahere ngamuat pekeran ne'ido' sombong karano pamekeran-pamekeran duniowi. ¹⁹ Urokng nang jako'o ano mampaot taguh ka Kapalo. Kapalo nyian nang nahan saluruh tubuh, disatuot nang sandi-sandi ba otot-otot, samuae batumbuh ba partumbuhot nang baasal Dari Allah. ²⁰ Kade basamo Kristus kau dah mati ka dasar-dasar dunio, damio saolah-olah kau masih milik dunio, tondok ka atoran-atoran angayo: ²¹ "Ame jangkam, ame cacapi, ame santuh"? ²² Atoran-atoran nyian dah ako' diikuti mao di binaso'ot karano dingamuat badasar ka parintoh ba ajaran manusio. ²³ Atoran-atoran macam koo garie pintar ba magari'ot sambayang nang bapusat ka diri ba karendahan ati nang alok ba nyikso tubuh. Tapi, samuae koo no ado nilaie salain onto mamuasot kadaginan.