¹ Tuan-tuan amuatlah budak-budakngu banar ba adel karano kau nahui ugo bahwo kau ado ugo Tuan di sarugo. HAL-HAL NANG HAROS DIAMUAT ² Batekunlah doop doa, bajago'-jago' ba mangucap sokor. ³ Badoa ugo onto kami supayo Allah muko'ot pintu bagi firman agar kami biso nyampeot rahasio Kristus, nang karano io aku di pinjaro. ⁴ Badoalah agar aku biso nyampeot sampe jelas jamae saharus'e aku bakato'-kato'. ⁵ Basikaplah bijak ka urokng- urokng uar magunaan kasampatot sabaik-baike. ⁶ Biarlah kato'ngu salalu baisi kasih, dirampohi ba garop, supayo kau nahui jamae sabanare nyawab satiap urokng. SALAM DARI PAUALUS BA UROKNG-UROKNG NANG SABAYO BA IO. ⁷ Tikhikus mao nyaritoot samuo barito nganai aku. Io nyian sodara saiman diri nang takasih, palayan nang satia, ba ayuk' sakarajo doop Tuhan. ⁸ Aku nyuruh io ka kau tujuan ne supayo kau nahui ka adaan kami agar io biso ngoatot atingu. ⁹ Seko urok dari antaro kau, io ma atok ba Onesimus sodara saiman diri nang setia ba takasih, ne ido'k mao mataki ka kau sagalo sasuatu nang tajadi di sio. ¹⁰ Ayukku sapinjaro, Aristarkhus, ngirim salam ontongu, jakowo ugo Markus, dakan Barnabas, kau dah namu patonjok tentang io; sabutlah io pas io atok ka kau. ¹¹ Salam dari Yesus ugo, nang di nyaru Yustus. Di antaro ayuk sapalayananku onto karajaan Allah, kahe ne' ido' nyianlah nang baasal dari kalangan urok' baturih, ne' ido' dah manjadi pangasoot bagi aku. ¹² Epafras, sodora saimanngu, hambo Kristus Yesus, ngerem salam ugo ontongu. Io salalu bagomol doop doa demi kau agar kau biso badiri taguh ba kayakinana panuh doop sagalo kamaoan Allah. ¹³ Aku biso mare' kisoh jamae io dah manyak mandarito onto kau ba onto ne' ido' nang ado di Laodikia ba Hierapolis. ¹⁴ Lukas, dokter nang takasih, ba Demas ngerem salam onto kau. ¹⁵ Sampeot salamku ka sodara-sodara saiman di Laodikia,ka Nimfa ba jemaat nang ado dirumahe. Kalo dah ako ¹⁶ surat nyian di bacoot ka kau, bacoot ugo ka jemaat Laodikia. Sabalike , baco ugo surat onto jemaat Laodikia. ¹⁷ Padohot ka Arkhipus, "Tananglah supayo kau ngakoot tugas palayanan nang dah kau narimo dari Tuhan." ¹⁸ Aku, Paulus, noles salam nyian ba kokot ku snadiri. Ingatlah balengguku. Anugerah Allah nyertai kau.