¹ Sebab nyak, jadilah bala penunak Allah upa gaya bala anak e nang terkasih. ² Iduplah dalapm kasih, upa Kristus ngasih kite morik idik e ke kite ke persembahan tamah kurban nang bau nyaman ke Allah. ³ Tapi, inang mulah cabul atau tecomar atau seraka, bah kan di sobut pun inang babte nyak adak layak di sentara bala iyakng kudus. ⁴ Inang ada kata jaek, bodo, atau kelolok nang koras -- nang adak cocok -- sebalit e, terimah kasih. ⁵ Sebab, ikapm tau bonar kalau iyakng cabul, dak suci, iyakng serakah nang nyumah berhala adak bulih kerajaan Ktistus tamah Allah. ⁶ Inang ada iyakng nang nipu kapm make omong pemulak bante jolu nyak nang matakng murka Allah. ⁷ Jadi, inang begaol tamah sidak. ⁸ Kemaik ikapm potakng, pintuk ikapm terakng dalapm Tuhatn. Idup lahnyadi bala anak terakng ⁹ bante terakng nyak semua kebait, adel, bonar, ¹⁰ encoba ngogak ope nang kesenang Tuhatn. ¹¹ Inang bepulah jaek nang adak ngasel buah, sebalit e kelanyakng buakng semua pempulah nyak. ¹² Sebab, nyobut jolu nang sida pulah secara betapok-tapok saja mulah malu. ¹³ Tapi, semua nang di kelanyakng ole terakng nyadi teponto ¹⁴ bante semua nyak nyadi nyata oleh terakng. Nyak sebeb e, di padah, "Bangkit, ikap si tukukng tidi! Bangkit dari sentara iyakng iyakng mati, Kristus akan becahaya atas ikapm." Yesaya 60:1 ¹⁵ Jadi, ponto bait-bait dimak ngaya kapm idup, inang upa iyakng babal, ngenyadi pintar. ¹⁶ Gunalah waktu nyak dengan sebait-baite bante ari tuk ari ja't. ¹⁷ Bante pinyak, inang jadi bodo, tapi ngeroti ope kemaok Tuhatn. ¹⁸ Inang mabok minum angor bante nyak adak bagos, sebalit e ponuh lah make roh. ¹⁹ Ngomong lah ke bala pangan make mazmur, kidung pujian, tamah lagu rohani, benyanyi pulah lagu ke Tuhatn dengan segenap atiko. ²⁰ Ngucap terimak kasih atas semua e ke Allah Bapa dalapm nama Tuhatn kite, Yesus Kristus. Nasehat ke Laki tamah Bini ²¹ Tunoklah soyakng ke iyakng laitn bante golak ke Kristus. ²² Bala bini, tunok lah ke laki kapm, upa ke Tuhatn. ²³ Sebab, laki adalah kepala bala bini, upa Kristus kepala dari umat, yaitu tubuh e Inyie kinik lah juru selamat e. ²⁴ Tapi, dimak ngaya umat tunok ke Kristus, pinyak gak bini tunok ke laki dalapm semua hal. ²⁵ Bala laki kasih lah bini kapm upa Kristus ngasih umat morik idik e ke umat, ²⁶ pake ngudus sidak mereseh e ngelalu aik tamah firman. ²⁷ Dengan pinyak, Kristus ulih mempersembahkan umat ke idik e dalapm kemuliaan adis noda, kerut, semacapm e sampe umat nyadi kudus adak tercela. ²⁸ Pinyak gak, bala laki arus ngegasih binie upa tubuhe kinik. Inyie nang ngasih binie, ngasih idike kinik. ²⁹ Sebab, adih iyakng nang ngemoncik tubuh e soyakng, tapi nyaga nerawat e. Pinyak gak nang Kristus pulah ke kite ³⁰ bante kite angota tubuh e. ³¹ Nyak am sebab e, soyakng lelaki ningal ine apakng e dan besatu tamah binie sampe keduak e nyadi sutik tubuh. ³² Rasia tuk bosar, aku madah tuk dalapm hubungan entara Kristus tamah umat. ³³ Sak am masitn-masitn ikapm ngasih bini kapm upa ikapm ngasih kapm kinik pinyak gak bini ngehormat laki e.