¹ Aher e, bala mianak, kami mintak nasehat ko dalapm Tuhatn Yesus sak upa nang udah kapm terimah dari kami tentang dimak ngaya kapm idup ngenyenang Allah, pulahken nyak lobih agik. ² Sebab, kapm tau perintah ope nang kami padah ke ikapm ngelalu kuasa Tuhatn Yesus. ³ Sebab, nyak lah kemaok Allah: pengudusanko*, kalau ko arus jauh dari percabulan; ⁴ kapm semua tau dimak ngaya nguasa tubuh kapm soyakng dalapm kekudusan dan kehormatan, ⁵ bukatn gairah nafsu bala yakng nang adak ngenal Allah, ⁶ sak adis soyakng pun nang nipu ngakal mianak dalapm hal tuk. Sebab, Tuhatn pemalas dari semua tuk, upa nang kami padah seopatn e kami ngingat bonar-bonar ke ikapm. ⁷ Allah nyapa kite bukatn pake ke adak kudus e, tapi pake kekudus e. ⁸ Dari nyak, sope pun nang nulak ajaran tuk, bukatn nulak insia, tapi nulak Allah, nang morik Roh Kudus e* ke ikapm. ⁹ Namun, tentang kasih ke bala mianak ko adak merolu iyakng ke nulis ke iko bante ko kinik udah di ajar Allah pake sama ngasih. ¹⁰ Bahkan, iko udah ngelaku e ke bala mianak di Makedonia. Tapi, bala mianak, kami mintak bonar am sak kapm ngelaku enang lobih agik, ¹¹ beusahalah idup tenang, urus bala urusan idik soyakn, kereja make jari soyakng, upa nang udah kami perintah ke iko, ¹² sak iko ulih nyalatn idup pantas di adap bala iyakng luar adis kekurakng ope-ope. Kedatakng Tuhatn ¹³ Bala mianak, kami bolek kapm ngelupak bala yakng nang dah mati sak kapm adak piluk upa bala yakng nang adis pengarap. ¹⁴ Jika kite pecayak kalau Yesus udah mati ngemangkit agik, kite pecayak gak kalau Allah ngumpul sidak tamah Yesus besama tamah Siatn e. ¹⁵ Kami madah tuk ke ikapm make firman Tuhatn, bahwa kite nang masih idup, nang ada sampe kedatakng Tuhatn, adak mungkin ngenoluk sidak nang udah mati. ¹⁶ Tuhatn kinik turutn dari seruga make tengkaokng, ingan ketua malekat, make ingan terompet Allah, lalu bala yakng nang mati dalapm Kristus bangkit lobih doluk. ¹⁷ Abis nyak, kite nang idup, masih tingal, di kengkait besama make rauk tamah sidak ke betomu tamah Tuhatn di langit, pinyaklah kite selalu tamah Tuhatn. ¹⁸ Bante nyak, iborlah bala pangan laitn kata-kata tuk.