¹ Bala mianak nang aku kasihi, inang pecayak ke setiap roh, tapi uji bala roh nyak ke kite ngentau e opekah sidak berasal dari Allah bante banyak nabi pemulak nang datakng ke dunia. ² Pituk lah kapm ngenal Roh Allah: roh nang ngakuk kalaw Yesus Kristus datakng upa insia nyak dari Allah. ³ Roh nang adak ngangkuk Yesus, adak berasal dari Allah. Nyak roh anti-Kristus, nang kapm dinga nak datakng pituk udah ada didunia. ⁴ Bala anak ku, ikapm berasal dari Allah udah ngalah bala nabi pemulak nak bante Siatn ada dalapm ikapm bose dari inyie di dunia. ⁵ Bala nabi pemulak nyak berasal dari dunia. Bante nyak, sidak ngomong dari dunia lalu dunia nang ninga sidak. ⁶ Kite berasal dari Allah. Iyakng nang ngenal Allah ninga kite, tapi iyakng nang adak berasal dari Allah adak ninga kite. Mangka tuk, kite ngentau Roh kebonar tamah roh penyosat. Aboh Kite Sama Ngasih ⁷ Bala mianak nang aku kasihi, aboh kite sama ngasih babte kasih berasal dari Allah, setiap iyakng nang ngasih laher dari Allah dan ngenal Allah. ⁸ Iyakng nang adak ngasih adak ngenal Allah bante Allah adalah kasih. ⁹ Pituk lah kasih Allah nang di padah ke kite: Allah nyuruh Anak-e nang tungal ke dunia sak kite ulih idup ngelalu Siatn e. ¹⁰ Di dalapm tuklah kasih nyak: Bukatn kite nang ngasih Allah, tapi Allah nang ngasih kite ngiripm anak e ke kurban pedamai ke bala dosa kite. ¹¹ Bala mianak nang aku kasihi, kalaw Allah bebonar ngengasih kite, kite gak arus sama ngasih. ¹² Adis iyang nang udah nonsit Allah. Kalaw kite sama ngasih, Allah diapm dalapm kite kasih e dikebagos dalapm kite. ¹³ Make tuk kite tau kalaw kite diapm dalapm Allah pinyak pun sebalit e bante Allah udah morik ke kite dari Roh-e. ¹⁴ Kami udah monto tamah besaksi kalaw Apakng ngutus Anak-e nyadi Juru Selamat dunia. ¹⁵ Setiap iyakng nang ngakuk kalaw Yesus anak Allah, Allah diapm dalapm idik e pinyak pun sebalit e. ¹⁶ Kite udah tau tamah pecayak kasih umpuk Allah nang di bagi ke kite. Allah nyak kasih, iyakng nang diapm dalapm kasih, diapm dalapm Allah, pinyak gak sebalit e. ¹⁷ Make tuk, kasih di kebagos tamah kite sak kite ulih ngumpuk keyaketn kinik ke Ari Penghakiman bante sama upa Siatn e, pinyak gak kite di dunia tuk. ¹⁸ Adis kegolak dalapm kasih, tapi kasih nang bagos nguser pengolak bante pengolak besomak tamah ukupm. Iyakng nang golak, opatn bagos dalapm kasih. ¹⁹ Kite ngasih e bante Siatn elobih doluk ngasih kite. ²⁰ Kalau ada iyakng nang ngomong, "Aku ngasih Allah", tapi ngemoncik miadik e, iyakng nyak pemulak. Sebab, iyakng nang adak ulih ngasih miadik e nang teponto, adak ulih ngasih Allah nang adak teponto. ²¹ Perintah tuk kite terimak dari Allah: Setiap iyakng nang ngasih Allah, ngasih miadik e gak.