¹ Sope nang pecayak kalaw Yesus nyak Kristus laher dari Allah; iyakng nang ngasih Apakng, gak ngasih anak nang laher dari Apakng. ² Mangka tuk, kite tau kalau kite ngasih bala anak Allah, waktu kite ngasih Allah tamah naat segala perintah e. ³ Bante tuklah kasih Allah, bait kite naat segala perintah e; segala perintah enyak adak borat. ⁴ Sebab, ope nang laher dari Allah ngalah dunia; tuklah kemonang nang udah ngalah dunia: iman kite. ⁵ Sope ngalah dunia kalau bukatn inyie nang pecayak kalau Yesus nyak Anak Allah? Idup Lamak Ada di Dalapm Yesus ⁶ Siatn tuklah nang datakng make aik tamah darah: Yesus Kristus; bukatn make aik mem, tapi make aik tamah darah. Rohlah besaksi bante Roh tuklah kebonar. ⁷ Sebab, ade tiga nang besaksi di seruga: ⁸ Roh, aik, tamah darah; ketiga enyak nyadi sutik. ⁹ Kalau kite nerimak saksi insia, saksi Allah lobih kuat. Sebab, saksi nang Allah borik nyk saksi ke Anak e. ¹⁰ Insia nang pecayak ke Anak Allah umpuk kesaksi tuk dalapm idik e. Iyakng nang adak pecayak ke Allah udah mulah idik e nyadi pemulak bante iyakng nyak adak pecayak ke saksi nang Allah padah tentang Anak e. ¹¹ Tuk am saksi nyak: Allah udah morik ke kite idup kekal, idup nyak dalapm Anak e. ¹² Iyakng nang ngumpuk Sang Anak umpuk idup; iyakng nang adak ngumpuk Anak Allah adak ngumpuk idup. Iyakng nang Laher dari Allah Adak Mulah Dosa ¹³ Aku udah nulis jolu tuk ke kapm nang pecayak ke nama Anak Allah sak kapm tau kapm ngumpuk idup kekal. ¹⁴ Tuklah keyaketn nang kite umpuk di adap Siatn, kalau kite mintak ope nang sesuai kemaok e, Siatn ninga kite. ¹⁵ Kalaw kite tau siatn ninga kite, ope nang kite pintak, kite udah ada pemohon nang udah kite pintak dari Siatn. ¹⁶ Kalaw ada iyakng nang nonsit mianak e mulah dosa nang adak manah ke kemati e, bait am yakng nyak mintak, Allah morik keidup ke iyakng nang mulah dosa nang adak manah ke kemati e nyak. Tapi, ada sutik dosa nangbmanah ke kemati e nyak; aku adak madah kalau inyie aus betanyak ke dosa nyak. ¹⁷ Semua nang adak bonaw nyak dosa, tapi ada dosa nang adak manah ke kemati nyak. ¹⁸ Kite tau setiap iyakng nang laher dari Allah adak mulah dosa, tapi nang laher dari Allah ngelinokng e sak nang ja't adak niguk e. ¹⁹ Kite tau kalaw kite asal e dari Allah, dunia asal e dari nang ja't. ²⁰ Kite tau kalau Anak Allah udah datakng udah morik pengeroti ke kite sak kite ulih ngenal Siatn nang bonar; kite ada dalapm Siatn enang bonar, dalapm anak e, Yesus Kristus. Siatnlah Allah nang bonar idup nang kokal. ²¹ Bala anak ku, jauh ken ikapm dari segala berhala.