¹ Bala anakku, aku nulis tuk ke ikapm sak ikapm adak mulah dosa. Tapi, kalau ada nang mulah dosa, kite ade Pemela diadap Apakng, yaitu Kristus Yesus, nang Bonar nyak. ² Siatn elah tumal pedamai ke bala dosa kite. Bukatn ke dosa kite jak, tapi kesemua dosa di seluruh dunia. ³ Pinyaklah kite tau kalau kite ngenal Allah, kalau kite naat semua perintah e. ⁴ Iyakng nang ngomong, "Aku ngenal Allah," tapi adak naat perintah e, inyie pemulak kebonar adih di inyi e. ⁵ Tapi , sope nang naat firman e, kasih Allah dah bonar sempurna di idik e. Pinyak lah kite tau kalau kite dalapm inyie. ⁶ Iyakng nang madah kalau inyie diapm dalapm Allah, inyie arus idup upa Yesus. Ngasih Sesama tamah Ngelaku Kemaok Allah ⁷ Bala mianak nang aku kasih, aku bukatn nulis perintah baru ke ikapm, tapi perintah nang dari doluk kemaik ikapm udah ketau. Perintah nang lamak nyak adalah firman nang udah kapm dinga dari doluk kemaik. ⁸ Tapi, aku nulis perintah baru gak ke ikapm, nang bonar di dalapm inyie tamah di dalapm ikapm bante potakng agik ngelalu pituk terakng bonar ayuk besinar. ⁹ Iyakng nang ngomong kalau inyie di dalapm terakng, tapi ngemoncik miyadik e, mangka inyie masih dalapm potakng sampe pituk. ¹⁰ Iyakng nang ngasik miyadik e tingal dalapm terakng adih sutik pun nyuruh inyie nyadi tesongkak. ¹¹ Tapi, nang ngemoncik miyadik e diyapm dalapm potakng bejalatn dalapm potakng. Inyie adak tau kone nak bejalatn bante potakng dah ngemutak mata e. ¹² Aku nulis ke ikapm, hai bala anak, bante dosa kapm udah di ampuni demi nama e. ¹³ Aku nulis ke ikapm, hai bala apakng, bante ikapm udah ngenal Siatn e dari kemaik. Aku nulis ke ikapm, hai bala iyakng mudak, bante aku udah ngalah nang ja't. Aku nulis ke ikapm, hai bala anak, bante ikapm dah ngenal Apakng. ¹⁴ Aku nulis ke ikapm, hai bala apakng, bante ikapm udah ngenal Siatn edari kemaik. Aku nulis ke ikapm, hai bala iyakng mudak, bante ikapm kuat, firman Allah diapm dalapm ikapm, ikapm udah ngalah nang ja't. ¹⁵ Inang nyinta dunia tuk atau jolu nang ada di dunia. Kalau iyakng nyinta dunia, kasih Apakng adis di binyie. ¹⁶ Sebab, semua nang ada di dunia, yaitu keingin dagitn, keingin mata, tamah kesomoknh ati adak berasal dari Apakng, tapi dari dunia. ¹⁷ Dunia tuk losi tamah keingin e, tapi iyakng nang ngelaku keingin Allah idup selama e. Inang Nunak Anti Kristus ¹⁸ Bala anakku, pintuk joman pengabis, upa nang udah kapm dinga anti-Kristus nak datakng, pituk bala anti-Kristus banyak nang udah datakng. Pinyak am lah kite tau pituk joman pengabis. ¹⁹ Sidak datakng dari sentara kite, tapi sidak bukatn dari kite. Bante, kalau sidak dari kite, sidak pasti tamah kite. Tapi, sidak ningal kite nampak am kalau sudak bukatn dari kite. ²⁰ Tapi, ikapm udah umpuk pengurapan dari nang kudus, ikapm ngentau semua e. ²¹ Aku nulis ke ikapm bukatn bante ikapm opatn ngentau kebonar e, bante udah tau bante pemulak adis berasal dari kebonar. ²² Sopekah pemulak nyak kalau bukatn mensia nang besangkal kalaw Yesuslah Sang Kristus? Nyak am anti-Kristus, insia nang nyangkal Apakng tamah Anak. ²³ Sope pun nang nyangkal Anak nyak adak ba Apakng. Tapi, setiap nang ngangkuk Anak inyie pasti ba Apakng. ²⁴ Sak am ope nang kapn dinga dari kemaik totap di ikapm. Kalaw ope nang kapm dinga totap di ikapm, ikapm totap diapm dalapm Anak tamah Apakng. ²⁵ Tuklah janyi nang Siatn e padah ke kite, yaitu idup kokal. ²⁶ Semua jolu nang udah aku tulis ke ikapm tuk, nyamokng tamah sidak nang nak nyosat kapm. ²⁷ Namun, urapan nang udah kapm terimak dari Siatn totap diapm di ikapm, ikapm adak merolu iyakng ke ngajar ikapm. Tapi, bante pengurapan e nyak mgajar ikapm tentang segala macapm -- hal nyak bonar, bukatn pemulak -- dimak ngaya Siatn udah ngajar ikapm, totaplah diapm dalapm Siatn e. ²⁸ Pintuk, bala anakku, diapmlah dalapm siatn e sak Siatn ngenyata idik e, kite yaketn adak malu di adap Siatn waktu kedatakng Siatn e. ²⁹ Kalau ikapm tau kalau Siatn e bonar, ikapm tau kalau iyakng nang ngelaku kebonar, laher dari Siatn e.