¹ Lalu, waktu Anak Domba muko' segel nang ka tujuh, sarugo sunyi' ado kiro-kiro satangoh jam lamae. ² Lalu, aku nanang ka tujuh malaekat nang badiri ka adapotn Allah, lalu tujuh sarompet di mare'otn ka ne'ido'. ³ Lalu, malaekat nang lain atokng langsung badiri ka altar, nangkapi' padupootn amas sege'; lalu ka io koo dimare' manyak dupo sa' disambahatno' barage do'o-do'o urokng kudus ka atas altar amas nang ka adapotn takhta koo. ⁴ Lalu, asap dupo koo, barage ba do'o-do'o urokng kudus, naik ka adapotn Allah ampat ka kokot malaekat koo. ⁵ Lalu, malaekat koo ngicokng padupootn lalu ngisi' io ba api nang di ngicokng ampat ka altar lalh dinabamotn ka dunio; jadi kadangarotnlah bunyi guntur ba kilat ba gampo dunio. SAROMPET PAMULO SAMPE SAROMPET NANG KAAMPAT DINYIUP ⁶ Ako' koo, tujuh malaekat nang nagkapi' tujuh sarompet koo dah siap-siap mao nyiup sarompet ne'ido'. ⁷ Malaekat pamulo nyiup sarompete, lalu tajadilah ujotn es ba api bacampur daroh; lalu di numpohotn ka dunio, jadi tatunulah bagi talu dunio lalu bagi talu puhutn-puhutn lalu tatunulah samuo rumput ino. ⁸ Malaekat kaduo nyiup sarompete, jadi ado angayo bukit nang tatunu api dinabakotn ka doopm laut; lalu bagi talu ampat kalau jadi daroh, ⁹ jadi bagi talu binatang nang ado ka laut nang idup jadi mati, lalu bagi talu nang ka kapal dingancurotn. ¹⁰ Malaekat nang katalu nyiup sarompete, jadi janto'lah ampat ka angit sege' bintokng ayo', nyalo angayo obor, lalu bintokng koo ngadotn bagi talu sunge ba mato ai'. ¹¹ Damo bintokng koo Apsintus. Jadi, bagi talu samuo ai' jadi apsintus lalu manyak urokng mati kano ai' karamo ai' koo dah dinyadiotn pahit. ¹² Malaekat ka ampat nyiup sarompete, jadi tapangkonglah bagi talu mata ari, bagi talu buotn, ba bagi talu bintokng jadie bagi talu ne'ido'koo jadi galap, lalu bagi talu siokng ari jadi galap lalh jakoo ugo'lah pado maam ari. ¹³ Lalu, aku nanang ba nangar seko' burukng rajawali tarabokng katangoh-tangoh angit, bakato ba suaro nyardkng, "Cilako, cilako, cilakolah ne'ido' nang diopm kadunio karamo bunyi sarompet katalu malaekat lain nang masih nyiopo'."