¹ Kamatiot Lazarus Ado seko urok'ng angaki nang cakahan rongko, nama'e Lazarus ampat ka Betania, kampok Maria ba kamaru'e, ² Marta. Maria anyianlah ambini nang paranoh minyaki (caro urok'ng Yahudi gormati tamu istimewo nang atok) poho Yesus pake minyak wangi ba galap poho'E pake bu'ukke, nang kamaru angakie, Lazarius, waktu ang'koo rongko. ³ Sabab ang'koo, kaduo kamaru'e anyian giriman barito ka'Io, nang bakato, "Tuhan, urok'ng nang Kito gasihi cakahan rongko." ⁴ Tapi takallo Yesus nangar barito ang'koo, Io bakato, "Panyakit ang'koo ano biso yabapot kamatiot, tapi ma'o yato'oto kamuliaan Allah supayo Anak Allah dimuliot galalui'Io." ⁵ Yesus memang gasihi Marta, kamaru ambini'e, ba Lazarus. ⁶ Jadi, takallo Yesus nangar Lazarus rongko sasidie, Io singajo diop 2 ari agi katampat'E ang'koo. ⁷ Dah'ako ang'koo, Yesus bakato ka murit-murit'E, "Je diri ampus agi ka Yudea." ⁸ Samuo murit bakato ka'Io, "Guru, urok'ng-urok'ng Yahudi nape lamo anyian barusoho nabakio Kito pake batu, Kito tatap ampuso kanaan agi'ke?" ⁹ Yesus yahut, "Buke'ke ado 12 jam doop sa'ari? Kade seko urok'ng bajo'ot siok ari, io ano tarantuk karano io nanang tarok dunio anyian. ¹⁰ Tapi ang'koo, kade seko urok'ng bajo'ot maam ari, io tarantuk karano tarok ang'koo ano ado ka'io." ¹¹ Dahudoh Yesus bakato ja'koo, Io bakato ka ne'ido, "Ayuk diri, Lazarus, udoh tidur (nang dimaksut Yesus udoh mati), tapi Aku ma'o ampuso untu gumpat'tato io." ¹² Murit-murit bakato ka'Io, "Tuhan, kade io udoh tatidur, io pasti tomo." ¹³ Yesus sabanare bakato manganai kamatiot Lazarus, tapi murit-murit giro Io bakato manganai tatidur doop arti istirahat. ¹⁴ Karano ang'koo, Salanjute Yesus bakato ba'tarus tarang ka ne'ido, "Lazarus udoh mati, ¹⁵ ba Aku aso untu kapantingan'nyu, Aku ano ado kanaan supayo kau biso picayo. Jadi, je diri ampus ka'io." ¹⁶ Salanjute, Tomas, nang diyabut Didimus (namo Tomas asale ampat ka'bahaso Ibrani, Didimus nang artie anak kamar), bakato ka murit-murit nang lain, "Je diri ampus ugo supayo diri biso mati barage'Io." ¹⁷ Takallo Yesus sampe, io napati Lazarus dah ado ka doop kuburan salamo 4 ari. ¹⁸ Adopun Betania barado limo balas stadia jauh'e ampat ka Yerusalem. ¹⁹ Manyak urok'ng Yahudi udoh atok namui Maria ba Marta, untu giburo ne'ido nang bakaitan ba kamaru'e ang'koo. ²⁰ Takallo nangar Yesus dah atok, Marta ampus lantas yambut'Io, tapi Maria tatap diop ka rumoh. ²¹ Marta bakato ka Yesus, "Tuhan, sa'ande waktu ang'koo Kito ado ka sio, kamaru'ku pasti ano mati'o. ²² Tapi ang'koo, kanio anyian aku nahui sasungguh'e ameo pun nang Kito minto ampat ka Allah, Allah ma'o mareoto'io ka'Kau." ²³ Yesus bakato ka'io, "Kamaru'nyu ma'o bangkit." ²⁴ Marta yahuti Io, "Aku nahui io ma'o bangkit ka ari kabangkitot saat ahir zaman." ²⁵ Yesus bakato ka'io, "Akulah kabangkitot ba kaidupot; sape pun nang picayo ka'Aku, io pasti idup walaupun io udoh mati, ²⁶ lantas satiap urok'ng nang idup ba picayo ka'Aku ano paranoh biso mati. Kau picayo'ke manganai jukut anyian?" ²⁷ Marta bakato ka'Io, "au Tuhan, aku picayo sasungguh'e Kitolah Kristus, Anak Allah, nang atok ka dunio." Yesus Nangis ²⁸ Dah ako gato'ot jukut ang'koo, Marta ampus ba yaru Maria, kamaru'e, lantas bakato sacaro pribadi, "Guru ado ka sio ba Io yaru'kau." ²⁹ nangar jukut ang'koo, Maria langsung badiri lantas namu'i Yesus. ³⁰ Saat ang'koo, Yesus nape sampe ka kampok ang'koo, tapi masih ka tampat Maria namu'i Io. ³¹ Urok'ng-urok'ng Yahudi nang sabayo-bayo Maria ka rumoh ang'koo, nang cakahan gibur io, nanang Maria langsung umpat lantas ampus kauwas; ne'ido nuno io kareno giro io ma'o ampuso ka kuburan untu nangiso ka naan. ³² Takallo Maria sampe ka tampat Yesus ang'koo, io nanang Yesus lantas basujut ka paha'E, tarus bakato ka'Io,"Tuhan, sa'ande Kito ado ka sio waktu ang'koo, kamaruku pasto ano mati." ³³ Takallo Yesus nanang Maria nangis, ba urok'ng-urok'ng Yahudi nang sabayo-bayo'io turut nangis ugo, ga'delah Yesus ka'doop Roh lantas maraso taganggu. ³⁴ Yesus batanyo, "Kamae Lazarus kau yubur?" Ne'ido yahuti Io, "Tuhan, je ampus lantas tananglah." ³⁵ Yesus pun nangis. ³⁶ Tarus, urok'ng-urok'ng Yahudi bakato, "Tananglah! Batapo Io gasihi Lazarus sidi!" ³⁷ Tapi ang'koo, ado basagape urok'ng ka antaro ne'ido bakato, "Ano biso'ke Io nang udoh mincarangan mato urok'ng buto anyian ugo majawat Lazarus ano mati?" Lazarus Dimangkitot dari Kamatiot ³⁸ Yesus, nang sakai agi ga'de ka'doop diri'E, ampus ka kuburan. Kuburan ang'koo iolah sabuoh guo ba sabuoh batu digako'ot nutupi'io. ³⁹ Yesus bakato, "Singkirot batu ang'koo!" Marta, kamaru urok'ng nang mati ang'koo, bakato ka'Io, "Tuhan, kanio pasto ma'o ado'o bau buruk karano io udoh mati salamo 4 ari." ⁴⁰ Yesus yahuti io, "Buke'ke Aku udoh gato'ot io ka'kau sasidie kade kau picayo, kau ma'o nanang kamuliot Allah?" ⁴¹ Jadi, ne'ido gangkat batu ang'koo. Salanjute, Yesus nigawo lantas bakato, "Bapo, Aku basukur ka'Kito karano Kito udoh nangar'rot Aku. ⁴² Aku nahu'i sasidie Kito sega nangar'rot Aku, tapi karano urok'ng-urok'ng nang badiri ka sakaliling'Ku, Aku gato'ot jukut ang'koo supayo ne'ido picayo sasidie Kitolah nang yuruh Aku." ⁴³ Dahudoh gato'ot ang'koo, Yesus gampak pake suaro yarek, "Lazarus, kauwarlah!" ⁴⁴ Urok'ng nang udoh mati ang'koo kauwar, kokot ba pahae masih tarikat tali kafan, ba muhae masih tatutup kain kafan. Yesus bakato ka ne'ido, "Lapasot kain-kain ang'koo dari'io lantas biarot io dari." Rancano untu Munuho Yesus ⁴⁵ Urok'ng-urok'ng Yahudi nang atok nabo Maria, ba nanang ameo nang udoh Yesus galakuot, jadi picayo ka'Io. ⁴⁶ Tapi ang'koo, basagape ampat ka ne'ido gataki urok'ng-urok'ng Farisi lantas mataki ne'ido ameo nang udoh Yesus galakuot. ⁴⁷ Jadi, imam-imam kapalo ba urok'ng-urok'ng Farisi gado'ot patamuan Sanhedrin (dewan Yahudi nang paling tinggi untu masalah agama ba sipil) lantas bakato, "Ameo nang ma'o diri lakuot? Sabab, urok'ng anyian galakuot manyak tando ajaib. ⁴⁸ Kade diri miarot Io tarus macam anyian, samuo urok'ng pasti picayo ka'Io lantas urok'ng-urok'ng Roma ma'o atok untu garabuto tampat anyian ba bangso diri." ⁴⁹ Tapi ang'koo, seko urok'ng ampat ka ne'ido nang banamo Kayafas, nang jadi imam ayo pado tahut ang'koo, bakato ka ne'ido, "Kito ano nahu'i ameo-ameo, ⁵⁰ atougo mampartimbangkan sasungguhe labih gagas seko urok'ng mati untu samuae bangso, daripado samuae bangso binaso." ⁵¹ Io ano gato'otio ampat ka diri'e sandiri, tapi jadi imam ayo tahut ang'koo, io bernubuat(garamalot) bahwo Yesus ma'o mati untu bangso ⁵² ang'koo. Ba, buke kahe untu bangso Yahudi ajo,malainkan makomoan'no ugo anak-anak Allah nang papar. ⁵³ Jadi, mulai ari ang'koo, ne'ido sapakat untu munuho Yesus. ⁵⁴ Karano ang'koo, Yesus ano agi bajo'ot sacaro tarang-tarangan ka antaro urok'ng Yahudi, tapi Io ampus ampat ka naan ka wilayoh samak padok balantaro ka sege koto banamo Efraim(koto nang samak Yerusalem ka utara kiro-kiro 20 km) ; lantas Io diop kanaan ba'murit-murit'E. ⁵⁵ Saat ang'koo, Paskah urok'ng Yahudi udoh samak, lantas manyak urok'ng ka wilayoh ang'koo ampus ka Yerusalem sanape paskah untu ne'ido marasihoto diri. ⁵⁶ Kamudian, ne'ido gagui Yesus lantas bakato seko ka nang lain samintaro ne'ido badiri ka'doop bait Allah, ne'ido saling batanyo, "Jamae manurut'kau? Io samo sakai ano atoko'ke ka acara anyian?" ⁵⁷ Adopun imam-imam kapalo ba urok'ng-urok'ng Farisi udoh gauarot parintoh kade ado seko urok'ng nahu'i kamae kabaradaate, urok'ng ang'koo harus madohot'io supayo ne'ido biso nangkap'Io.