¹ Maria Minyaki Poho Yesus ka Betania Anam ari sanape ari Rayo Paskah, Yesus ampus ka Betania, tampat diop Lazarus, nang udoh Io mangkitot dari kamatiot. ² Ka naan, udoh di yiapot jamuan makot maam untu Yesus; ba Maria cakahaan galayani, tapi Lazarus salah seko ampat ka ne'ido nang duduk ka mejo sabayo-bayo Yesus. ³ Salanjute, Maria gicok satangoh kati( Harfiah iolah litra, sepertiga kilogram ) minyak narwastu murni( parpum nang dimajawat ampat ka'akar kayu nard ) nang moho sidi, lantas minyaki poho Yesus ba garingan'io pake bu'uk-ke. Tarus, rumoh ang'koo baisi bau harum minyak wangi ang'koo. ⁴ Tapi ko'o, Yudas Iskariot, salah seko urok'ng murit'E, nang ma'o gianatio Io, bakato, ⁵ Gameo minyak wangi ang'koo ano di'juo ajo sarago tiga ratus dinar lantas dibareot ka urok'ng-urok'ng sontok?" ⁶ Io bakato ja'koo buke karano io paduli ka urok'ng sontok, malainkan karano io iolah salah seko urok'ng pangait, lantas karano io nabanan kotak duit( Yudas Iskariot pana'api duit kas murit-murit, tapi io sega gaiti duit ang'koo ), io biaso gicok duit nang dinamaan ka doop kotak ang'koo. ⁷ Lantas, Yesus yahut, "Biarotlah ambini ang'koo, io galakuot'io sebagai persiapan untu yuburo'Aku. ⁸ Sabab, urok'ng sontok sega ado ba'kau, tapi ba'kau Aku jarok ado." Samuo Imam Kapalo Ma'o Munuho Lazarus ⁹ Takallo sajumbaloh manyak urok'ng Yahudi nangar Yesus ado ka Betania, ne'ido ampus ka naan, buke kahe karano Yesus, malainkan ugo karano ma'o nanang Lazarus nang udoh Io mangkitot dari kamatiot. ¹⁰ Lantas, imam-imam kapalo barancano untu munuho Lazarus ugo. ¹¹ Karano Lazarus, manyak urok'ng Yahudi ningo'ot ne'ido lantas picayo ka Yesus. Yesus Ta'amo ka Koto Yerusalem Macam Rajo ¹² Ari ampagi'e, urok'ng rami nang gadiri gawe ang'koo, takallo nangar manganai Yesus ma'o atoko ka Yerusalem, ¹³ ne'ido gicok dauk-dauk tingoh lantas ampus ka uas untu yambuto Io ba langsung ba'gampa'kot, "Hosana! Dibarakatilah Io nang atok ka'doop namo Tuhan, Rajo Israel!" Mazmur 118:25-26 ¹⁴ Dah ako namuan seko keledai mudo, Yesus duduk ka atase, macam nang tatulis: ¹⁵ "usoh ga'i, he putri Sion( metapora untu panduduk Yerusalem )!Tananglah! Rajanyu atok, duduk ka atas seko keledaimudo."Zakharia 9:9 ¹⁶ Awale, murit-murit'E ano garati samuo jukut ang'koo, tapi takallo Yesus di mulio'ot( saat Yesus di yalipot,bangkit dari mati ba naik ka Subayot ), ne'ido salanjute garati bahwo mangganai Io samuae ang'koo udoh tatulis, lantas ne'ido udoh galakuot samuae untu Io. Urok'ng Manyak Bakato manganai Yesus ¹⁷ Jadi, urok'ng-urok'ng nang sabayo-bayo Yesus waktu Io yaru Lazarus kauar ampat ka kuburan lantas mangkitot io dari kamatiot tarus basaksi. ¹⁸ Oleh sabab ang'koo, manyak urok'ng yambut Yesus karano ne'ido nangar sasungguhe Iolah nang udoh galakuot mukjizat ang'koo. ¹⁹ Jadi, urok'ng-urok'ng Farisi bakato seko ka nang lain, "Kito nanang, ameo nang diri garancano'ot ano barasil. Tananglah, saluruh dunio udoh nuna'an Io!" Yesus Bakato manganai Kaidupot ba Kamatiot ²⁰ Pado saat ang'koo, ado ugo urok'ng-urok'ng Yunani( buke urok Yahudi ) ka antaro ne'ido nang ampus untu sambayang waktu parayo'ot ang'koo. ²¹ Ne'ido namui Filipus, nang barasal dari Betsaida ka Galilea, lantas bakato ka'io, "Tuan, kami ma'o batamuo ba'Yesus." ²² Filipus ampus lantas mataki Andreas; salanjute Andreas ba Filipus ampus ba mare Yesus nahui. ²³ Yesus jahuti ne'ido, "Waktu'e dah sampe bagi Anak Manusio untu dimulio'ot. ²⁴ Sa'sidi-sidie, Aku gato'ot ka'kau, kacuali bege gandum janto ka tanoh lantas mati, bege ang'koo tatap sege ajo; tapi kade bege ang'koo mati, io gasilot manyak buoh. ²⁵ Urok'ng nang yayangi nyawae, ma'o ka'angitot nyawae, tapi urok'ng nang ano yayangi nyawae ka dunio anyian, ma'o miharo'io untu idup kakal. Kade ²⁶ seko urok'ng galayani Aku, io harus nuna'an Aku; ka mae Aku barado, ka ko'o ugo palayan'Ku ado; kade seko urok'ng galayani Aku, Bapo pasti gormati io." Yesus Bakato manganai Kamatio'E ²⁷ "Kanio, jiwa-Ku galisoh. Ameo nang ma'o Kukato'ot? 'Bapo, salamatotlah Aku dari kanio anyian?' tapi ang'koo, saat anyian untu tujuan ang'koolah Aku atok. ²⁸ Bapo, mulio'otlah namo-Nyu!" Lantas, tadangarlah suaro ampat ka'subayot, "Aku udoh mulio'ot namo-Ku ba Aku ma'o mulioto'io agi." ²⁹ Urok'ng manyak nang badiri ka ko'o ba nangarot'io gato'ot sasungguhe ang'koo bunyi guntur, tapi nang laine bakato, "Seko urok'ng malaikat udoh bakato ka-Io!" ³⁰ Yesus yahut lantas bakato, "Bunyi ang'koo kadangarot buke untu kapantingan-Ku, malainkan untu kapantinganyu. ³¹ Kaniolah panghakiman untu dunio anyian, kaniolah panguaso dunio ma'o diburu. ³² Lantas, kade Aku ditingiot (dinaikot dari kamatiot sampe ka subayot) ampat ka dunio anyian, Aku ma'o yujuto/mabo'o samuo urok'ng ba-Aku." ³³ Yesus gato'ot jukut anyian untu madohot manganai kamatiot macam mae Io ma'o mati. ³⁴ Urok'ng manyak ang'koo yahuti Io, "Kami udoh nangar ampat ka hukum Taurat sasungguhe Kristus ma'o diop tatap salamo-lamae; jamae mungkin Kito bakato, Anak Manusio ang'koo arus ditinggiot?' Sape'ke Anak Manusio ang'koo?" ³⁵ Yesus yahuti ne'ido, "Tinggal sabantar agi Tarok(iolah Yesus) ang'koo ado ba'kau. Bajo'otlah sa'agi Tarok ang'koo masih ado supayo kagalapot ano biso guasainyu; sabab urok'ng nang bajo'ot ka doop kagalapot ano nahui ka mae io ampus. ³⁶ Kade Tarok ang'koo ado ka'kau, picayolah ka Tarok ang'koo supayo kau jadi'o anak-anak Tarok." Dah'ako gato'ot ja'koo, Yesus ampus lantas yoso'kot diri dari ne'ido. Labih dari Seko Urok'ng Yahudi Ano Picayo Ka Yesus ³⁷ Biarpun Yesus udoh galakuot manyak tando ajaib/endoh ka hadapot ne'ido, ne'ido tatap ano picayo ka-Io, ³⁸ supayo ganaplah pakato'ot nang diyampeot oleh Nabi Yesaya, Tuhan, sapeke nang picayo ka pakabar'ot kami? Lantas, ka sape'ge kokot (barupo simbol kuaso/kakuaso'ot) Tuhan udoh di yato'ot?" Yesaya 53:1 ³⁹ Ang'koolah sabape, ne'ido ano biso picayo karano Yesaya bakato ugo, ⁴⁰ "Io udoh muto'ot mato ne'ido lantas gara'kot ati ne'ido, supayo ne'ido usoh nanang pake mato ne'ido tapi ne'ido garati pake ati lantas babalik tarus Aku yamuhot ne'ido." Yesaya 6:10 ⁴¹ Yesaya gato'ot samuae anyian kareno io udoh nanang kamulio'ot Yesus lantas io bakato manganai Io ⁴² Maski ja'koo, manyak ugo pamimpin nang picayo ka Yesus, tapi karano ga'i ka urok'ng-urok'ng Farisi, ne'ido ano gato'otio tarus tarang karano ga'i ma'o di- kuciloto ampat ka sinagoge. ⁴³ Sabab, ne'ido labih repo narimo kamulio'ot ampat ka manusio daripado kamulio'ot ampat ka Allah. Ajarot Yesus Manganai Mengakimi Manusio ⁴⁴ Salanjute, Yesus bakato ayo, kata'E, "Satiap urok'ng nang picayo ka-Aku, ano picayo ka-Aku, malainkan ka Io nang yuruh Aku. ⁴⁵ Lantas, satiap urok'ng nang udoh nanang Aku, udoh nanang Io nang yuruh Aku. ⁴⁶ Aku udoh atok sebagai tarok ka dunio anyian, supayo satiap urok'ng nang picayo ka-Aku ano diop kadoop kagalapot. ⁴⁷ Kade seko urok'ng nangarot pakato'ot-Ku, tapi ano nuruti'io, Aku ano menghakimi io; sabab Aku atok buke untu menghakimi dunio, malainkan untu yalamat'tato dunio ⁴⁸ Sape nang nolak Aku ba ano narimo pakato'ot-Ku, tarus firman nang Aku gato'ot ma'o gakimio io ka akhir zaman. ⁴⁹ Kareno Aku ano bakato atas kamaoan-Ku, malainkan Bapo nang yuruh Aku mare-Aku parintoh atas ameo nang ma'o Aku kato'ot ba kalakar'ot. ⁵⁰ Lantas, Aku nahui sasungguhe parintah'E iolah idup kakal. Sabab ang'koo, jukut nang Aku yampeot, Aku yampeot macam nang digato'ot Bapo ka-Aku."