¹ Yesus Gembala nang Gagas Yesus bakato, sarato sasidie, Aku bakato ka'kau, urok'ng nang ta'amo ka kandang dombo nang ano galalui pintu, malainkan naik ba'galalui marago lain, urok'ng ang'koo iolah pangait ba parampok. ² Tapi ang'koo, urok'ng nang ta'amo galalui pintu, io iolah gembala dombo. ³ Bagi'e, panjago pintu muko'ot pintu, ba dombo-dombo nangar suara'e, lantas io yaru dombo-dombo'e sandiri ba'namo ne'ido, sarato giringan ne'ido ka uas. ⁴ Dah'udoh samuo dombo'e digauasot, io bajo'ot ka depan ne'ido lantas dombo-dombo'e ma'o nuna'an io karano ne'ido ganali suara'e. ⁵ Urok'ng lain ano mungkin ne'ido tuna'an, tapi ne'ido ma'o dari'o ampat ka'io kareno ne'ido ano ganali suaro urok'ng-urok'ng lain." ⁶ Parumpamaan ang'koolah nang digato'ot Yesus ka ne'ido, tapi ne'ido ano garati dameo nang baru ajo Yesus gato'ot ka ne'ido. ⁷ Oleh sabab ang'koo, Yesus bakato agi ka ne'ido, "Sasidie, Aku bakato ka'kau, Akulah pintu ka dombo-dombo ang'koo. ⁸ Samuo urok'ng nang atok sanape Aku iolah pangait ba parampok, tapi dombo-dombo ano nangarot ne'ido. ⁹ Akulah pintu. Kade seko urok'ng ta'amo galalui Aku, io ma'o disalamatot, ba ma'o ta'amo kauas, sarato namuan padok rumput. ¹⁰ Pangait atok kahe untu gaito, munuho, ba minaso'oto; Ne'ido supayo ado ba'idup Aku atok, gampu'o io sacaro balabih. ¹¹ Akulah gambalo nang gagas; gambalo nang gagas mare'ot nyawo'E bagi dombo-dombo. ¹² Seko urok'ng upohot, buke seko urok'ng gambalo, nang buke ampu dombo-dombo ang'koo, nanang sarigala atok, io ningo'ot dombo-dombo ang'koo lantas dari; sarigala ang'koo ma'o narakam ba misoh-misohoto dombo-dombo ang'koo. ¹³ Io dari karano io urok'ng upohot lantas ano paduli ka dombo-dombo ang'koo. ¹⁴ Akulah gambalo nang gagas. Aku ganali dombo-dombo'Ku lantas dombo-dombo'Ku ganali Aku ¹⁵ samo saparati Bapo ganali Aku lantas Aku ganali Bapo; ba Aku mare'ot nyawo'Ku bagi dombo-dombo ang'koo. Dombo-dombo lain ¹⁶ Aku ado ugo (Urok'ng-urok'ng lain nang ma'o jadio pangikut Yesus ampat ka bangso lain nang buke bangso Yahudi) nang buke ampat ka kandang anyian; Aku ma'o mabo'o ne'ido ugo, lantas ne'ido ma'o nangar suaro'Ku; ba ne'ido ma'o di'jadioto sege kalompok ba seko gambalo. ¹⁷ Karano anyianlah Bapo gasihi Aku, soale Aku mareot nyawo'Ku supayo Aku biso gicoko'io agi. ¹⁸ Ano seko urok'ng pun udoh gicoko'io ampat ka'Aku, malainkan Akulah nang mareot'io manurut kamaoan'Ku sorok. Aku ado hak untu mareot nyawo'Ku, lantas Aku ugo ado hak untu gicoko'io agi. Anyianlah parintoh nang Aku tarimo ampat ka Bapo'Ku." ¹⁹ Sakai agi, ado papacohot ka antaro urok'ng-urok'ng Yahudi karano pakato'ot Yesus ang'koo. ²⁰ Manyak ampat ka ne'ido nang bakato, "Io kamasokot roh jahat lantas jadi gilo. Gameo'ke kito nangarot Io?" ²¹ Nang lain bakato, "Ang'koo buke pakato'ot seko urok'ng nang kamasokot roh jahat. Biso'ke roh jahat mincarangan mato urok'ng buto?" Yesus ba Bapo iolah Seko ²² Pado waktu ang'koo, ari rayo pentabhisan (minggu langho'e nang digarayot urok'ng Yahudi satiap buot desember untu mampringati panyuciot altar Bait Suci nang sanape udoh kotor) balangsung ka Yerusalem. Saat ang'koo musim dinggin, ²³ Lantas Yesus cakahan bajo'ot ka Bait Allah, ka'sami Salomo (bagian sabaloh timur Bait Suci nang dinutupi atap) ²⁴ ba, urok'ng-urok'ng Yahudi bakomo galilingi Io lantas bakato ka'Io, "Sangape lamo agi Kito miarot jiwo kami bimbang? Kade Kito Kristus, bakatolah tarus tarang ka kami." ²⁵ Yesus jahuti ne'ido, "Aku udoh gato'ot io ka'kau, tapi kau ano picayo. Pakarajo'ot-pakarajo'ot nang Aku galakuot ka'doop namo Bapo'Ku, ang'koolah nang mare'ot kasaksiot manganai Aku. ²⁶ Tapi ang'koo, kau ano picayo karano kau ano tamasuk dombo-dombo'Ku. ²⁷ Dombo-dombo'Ku nangar suaro'Ku, Aku ganali ne'ido lantas ne'ido nuna'an Aku. ²⁸ Aku mareot idup kakal ka ne'ido, ba ne'ido ano paranoh biso binaso; lantas ano seko urok'ng pun biso garabut ne'ido ampat ka kokot'Ku. ²⁹ Bapo'Ku, nang udoh mareot ne'ido ka'Aku, labih ayo daripado samua'e, ba ano ado seko urok'ng pun biso garabut ne'ido ampat ka'kokot Bapo. ³⁰ Aku ba Bao iolah seko." ³¹ Sakai agi, urok'ng-urok'ng Yahudi gicok batu untu nabaki Yesus. ³² Tapi ang'koo, Yesus bakato ka ne'ido, "Aku udoh nojok'kot ka'kau manyak pakarajo'ot gagas ampat ka'Bapo, pakarajo'ot mae'ke ampat ka antarae nang majawat'nyu ma'o nabakio Aku pake batu?" ³³ Urok'ng-urok'ng Yahudi ang'koo yahuti Io, "Buke karano sege pakarajo'ot gagas kami ma'o nabakio Kito pake batu, malainkan karano hujat (ano gako'i Allah) lantas karano Kito, nang kahe seko urok'ng manusio, yadioto diri'Nyu Allah." ³⁴ Yesus yahuti ne'ido, "Buke'ke tatulis ka'doop Kitab Taurat'nyu, 'Aku udoh bafirman, Kau iolah Allah'? ³⁵ Kade Allah yabut ne'ido nang narimo firman ang'koo 'allah', padahal Kitab Suci ano biso dibatalot, ³⁶ ameo'ke kau gato'ot manganai Io nang udoh Bapo kudusot ba yuruh ka doop dunio, 'Kito menghujat (ano gaku'i Allah)', karano Aku bakato ka'kau, 'Aku iolah Anak Allah'? ³⁷ Kade Aku ano galakuot pakarajo'ot-pakarajo'ot Bapo'Ku, usoh picayo ka'Aku. ³⁸ Tapi ang'koo, kade Aku galakuot pakarajo'ot-pakarajo'ot ang'koo, maskipun kau ano picayo ka'Aku, picayolah ka pakarajo'ot-pakarajo'ot ang'koo supayo kau nahui ba garati sasungguhe Bapo ka doop diri'Ku, lantas Aku ka doop Bapo." ³⁹ Sakai agi, ne'ido yobo nangkap Yesus, tapi Io lapas ampat ka ne'ido. ⁴⁰ Lantas, Yesus ampus agi yabarangi batangan Yordan notoko ka tampat Yohanes partamo kai maptis de'e lantas Yesus diop ka naan. ⁴¹ Manyak urok'ng atok ka'Io lantas bakato, "Maskipun Yohanes (Yohanes pambaptis buke Rasul Yohanes) ano galakuot sege tando ajaib pun, tapi samuo nang digato'ot Yohanes manganai urok'ng anyian sidi." ⁴² Lantas, manyak urok'ng jadi picago ka'Io ka naan.