¹ Sabab kowo, baeklah diri waspado, supayo ame ado urok di antaro kau nang diangap ditingoot, sakaipon janji mao taamo kadoop pamarantiot-Ne masih balaku. ² Karano ka diri dibaritoot ugo kabar kasukoot sabayo macam ka ne'ido', tapi firman pamaritoot kowo ano baguno bagi ne'ido', karano no batumbuh ba samo-samo oleh iman ne'ido' nang nangar iyo. ³ Sabab diri nang ba iman, mao taamo ka tampat pamarantiot angayo nang Iyo ngatoot, "Sahingo aku basumpoh doop bero-Ku: Ne'ido' no akan taamo ka tampat pamarantiot-Ku," sakaipon pakarajaan-Ne dah ako' dunio dingamuat. ⁴ Sabab nganai ari ka tujuh suoh dingatoot di doop suatu nas : Allah baranti pado ari katujuh dari sagalo pakarajaan-Ne." ⁵ Doop nas kowo diri baco, "Ne'ido' no akan taamo katampat pamarantiot-Ku. ⁶ Jadi dah jalas, bahwo ado sajumbaloh urok mao taamo ka tampat pamarantiot kowo, sadangkan ne'ido' nang ka iyo labih doho' dimaritoot kabar kasukoot kowo, no taamo karano ka ano norotot ne'ido'. ⁷ Sabab kowo iyo natapot ugo suatu ari, kowolah "ari ngian", pas Iyo dah ako sakian lamo bafirman ba parantaroot Daud angayo dingatoot di atas: "Pado ari nyian, kade kau nangar suaro-E, ame karasot atingu! ⁸ Sabab, andai kato Yosua dah nabanan ne'ido' taamo ka tampat pamarantiot, pasti Allah ano akan bakato-kato agi nganai suatu ari laen. ⁹ Jadi masih tasadio suatu ari pamarantiot, ari katujuh, bagi umat Allah. ¹⁰ Sabab barang ape dah taamo ka tampat pamarantiot-Ne, iyo sandiri dah baranti dari sagalo pakarajaan-Ne. ¹¹ Karano kowo baeklah diri barusoho onto taamo ka doop pamarantiot kowo, supayo ame seko urok pon janto karano nunoot contoh ka ano taatot kowo ugo. ¹² Sabab firman Allah idup ba koat dan labih tajop dari pado pedang ba mato duo mae pon iyo nyocok sangat doop sampe misohot jiwo ba roh sendi-sendi ba sum-sum; iyo sangop medoot patimbangan ba piiran ati diri. ¹³ No ado suatu mahlok pon nang batapok di adapane, sabab sagalo sasuatu ba tianyok ba tabuko di depan mato-E, nang ka Iyo diri aros mare patangongjawabaan. Yesus Kristus lah Imam Kayo Diri ¹⁴ Karano diri kanio ado Imam kayo Agung samuo angit, kowolah Yesus, Anak Allah baeklah diri taguh mampaot pado pangakoan Iman diri. ¹⁵ Sabab Iman Kayo nang ado ka diri, bukelah iman kayo nang no biso torot ngarasoot kalamahan-kalamahan diri, sabalike sabayo ba diri, Iyo dah di nyoboi, kahe ano ngamuat doso. ¹⁶ Sabab kowo jelah diri panuh kabaranian ngampusi tahta kasih karunio, supayo diri narimo rahmat ba namuan kasih karunio onto namu patolongan diri pado waktue.