¹ Kristus Dah Merdekaot Urok Picayo Demi kemerdekaot, Kristus dah ngapasot diri'. karamo koo, badirilah kokoh lantas ame agi maok dibebani nang kuk Pabudakot. ² Dangarot! Aku, Paulus, ngatoot ka kao bahwa kade kao narimo sunat, Kristus anok ado gunae onto' ngu. ³ sakai agi, aku ngatoot ka samuae urok nang narimo sunat bahwa io wajib naati saluruh ukum taurat. ⁴ kade kao barusoho onto' dibanarot dengan majaanan ukum taurat, idupngu dah dimisohot dari Kristus lantas kao dah ningoot anugerah. ⁵ ngalalui Roh, nang iman, diri' nunggu-nunggu arapan akan kabanarot. ⁶ sebab, doop Yesus Kristus, basunat ato anok basunat anok ado artie. hanya iman nang bakarajo ngalalui kasih nang ado artie. ⁷ kao dah batalamo dengan baek. sape nang ngalangi kao dari naati kabanarot? ⁸ ajakan koo buke atok dari Io nang dah nyaru kao. ⁹ sadikit ragi dah ngamuat saluruh adonan ngamok." ¹⁰ aku miliki keyakinan terhadap kao doop Tuhan bahwa kao anok akan narimo pikiran nang laen. tapi, sape pon nang nganggu kao akan nanggung ukumane. ¹¹ jadi kamaru-kamaru, kade aku masih ngabarot sunat, ngameo aku masih dianiayo? kade macam nyian, batu sandongan terhadap salib dah dinyingkirot. ¹² aku baarap ka ne' udo nang ngasut kao koo akan takano ka dirie sandiri. ¹³ kamaru-kamaru, kao dah dinyaru onto' jadi merdeka. tapi, ame pagunaan kemerdekaanngu koo sebagai kesempatan onto' idup doop dageng, malaenkan layanilah urok terhadap nang laen dengan kasih. ¹⁴ sebab, saluruh ukum taurat dah diganapi doop satu firman nyian, "kasihilah nang sabayo ba kao manusio angayo diri'ngu sandiri." ¹⁵ kade kao saling ngigit lantas noot, baati-atilah agar kao ame saling nyilakoot. Kainginan Roh Balawanan nang Nafsu Kadagengan. ¹⁶ jadi, aku ngatoot, iduplah doop Roh, maka kao anok akan ngalakukan hal-hal nang dimaoan oleh nafsu kadagengan. ¹⁷ kamaoan nafsu kadagengan balawanan nang kamaoan Roh, lantas kamaoan Roh balawanan nang kamaoan nafsu kadagengan, karamo kaduae saling balawanan supayo kao anok ngalakukan hal-hal nang kao maoan. ¹⁸ tapi, kade kao dipimpin oleh Roh, kao anok ado di baboh ukum taurat. ¹⁹ pakarajaan dari nafsu kadagengan dah jalas, yaitu doso cabul, pancamaran, hawa nafsu, ²⁰ nyamboh berhala, kuaso gelap, kategetot, pamantohot, iri ati, bero nang anok tekendali, kapantingan diri' sandiri, pasalisihot, papacohot, ²¹ panimuru, mabok-mabokan, pesta pora, lantas sejenise, aku ngingati kao kanio, angayo nang dah aku ngungati sanapee, sape nang ngalakukan hal-hal koo anok akan mewarisi karajaan Allah. ²² tapi, buoh Roh adalah kasih, sukacito, damai sejahtera, kesabarot, karamahan, kabaikot, kesetiaan, ²³ kalamohlambutot, plant as nguasai diri'. anok ado ukum nang ngalawan hal-hal nyian. ²⁴ ne' udo nang jadi milik Yesus Kristus dah nyalibpot nafsu kadagengan serta sagala nafsu lantas kamaoanne. ²⁵ kade diri' idup oleh Roh, baeklah diri' bajoot sasuai nang Roh. ²⁶ amelah diri' jadi sombong, saling ngasut, ato saling iri ati.