¹ Gu kang yong gu chan byiwukǝr a npe gurum naa yi dat, gu chin kam ɓǝ gun gǝ kopgǝshi dǝr Nda gu wu gǝbǝtǝng hǝ mou. ² Ɗǝ gǝ badǝr pǝn bii nmǝgwuo ɓǝ naa yi gǝ duam gǝ gurum kabi wu mweng muop bii mǝ chan nlǝwap gǝ gǝwar npe gurum tǝgǝr muop yi. Chin kam ɓǝ gǝ gǝ kopgǝshi mou. A laa naduk gǝgun, mǝ kat kopgǝshi du gwe. ³ Ɗǝ gǝ badǝr pǝn mǝbi nmǝgwuo ɓǝ gǝ nyit sar dakul nman bii wu sar dasǝ fu chin mou, ⁴ ɗewar byipǝn agǝ waa bii gǝsok yi. A kam ɓǝ Nda gu wu gǝ naa jepe gǝsok hǝ gǝ pǝn kopgǝshi ngǝ. ⁵ Gǝ yagal dǝr ɗangnaan ɓǝ gǝ chin kabi nung mweng muop mou, nsa muop bii mǝ tangkop ɗyam ɗangnaan yi nlewap gǝ gǝwar ɗǝwar gurum mǝ naa muop yi. A laa naduk gǝgun, muop mǝ kat kopgǝshi du gwe. ⁶ Ɗǝ gǝ badǝr ɗangnaan ɓǝ gǝ rǝ nɗǝgǝn lǝ agǝ, ogot fulǝ mǝn gǝ ɗang Ndaagǝ wu nyi gǝsok hǝ. A kam ɓǝ Ndaagǝ wu gǝ naa jepe gǝsok hǝ gǝ pǝn kopgǝshi ngǝ. ⁷ Gǝ ɗangnaan ɓǝ, gǝ nook ɓǝlǝp tǝkyit wubaan kabi ndung Mǝjong bii mǝ chan hǝ, enɗye gǝ muop ɓǝ mǝ kat Naan gǝ ɓes nkǝlǝng dun nsa lǝfu gǝdu wu gwet hǝ. ⁸ Waa nsa kam hǝ, naa yong gu wak kabi muop hǝ, nsa nda gu man jepe wu gun fu tangkop nɗǝng she gu nang fu muup. ⁹ Waa nsa kam hǝ bii gu ɗangnaan kam hǝ: 'Ndaamu wu fugǝtǝng, mang ɗyin mǝ saar sǝmgǝ, ¹⁰ Mang yil-long gǝgǝ wul. Mang mǝ chin bii wu gǝ ɗemkop gǝyil kabi wu fugǝtǝng hǝ. ¹¹ Pǝn sǝ wu gǝ mǝ tankop chinyi nmǝn, ¹² Kon wubyas gǝmu, kabi wu bii mǝ kon wubyas muop wu mǝ chan wubyas nmǝn hǝ zak. ¹³ Gǝ nyit mǝn mǝ ruo nɗǝgǝn katshii mou, ɗe gǝ tagat mǝn nfu byiwubis.' ¹⁴ Nsa ɗǝ gu kon wubyas gurum muop, ɓǝ Ndaagu wu fugǝtǝng gǝ kon wubyas agu zak. ¹⁵ Ɗǝ gu kon wubyas gǝmuop mou, ɓǝ Ndaagu zak gǝ kon wubyas agu mou. ¹⁶ A kam shizak, ɗyin gun fu sǝnfu ɓǝ gu mang ɗogor kabi wu mweng bii gǝ mǝ chan hǝ mou, nsa bii mǝ ɗyan yit du ɗewar gurum mǝ man muop fu sǝnfu yi. A laa naduk gǝgun, mǝ kat kopgǝshi du gwe. ¹⁷ Ɗǝ gu sǝnfu gu ɓǝ gu mǝm kaa gu shi muor mǝn gu vang yit gu, ¹⁸ yong gurum mǝ nman nkwǝt gun fu sǝnfu, ɗe a Ndaagu wu gǝ naa jepe gǝsok hǝ dat; Ndaagu wu gǝ naa jepe gǝsok hǝ, gǝ pǝn kopgǝshi ngun. ¹⁹ Naa yong gu chinkǝn byilong dǝr kaasuk gǝyil, pee wu dǝsǝr gǝ mǝ aar mǝn nlat ɓǝ wam, ɗagat ɓǝ wat jya mǝ kok. ²⁰ Ɗe a npe kam ɓǝ gu chinkǝn byilong dǝr kaasuk gǝbǝtǝng, pee wu dǝsǝr gǝ aar mou, mǝn gǝ wam mou, wat jya gǝ kok mou. ²¹ Nsa pee wu byilong agǝ nnǝgǝn ɓǝ engǝ a nnǝgǝn zak. ²² Yit a nyi a til-ngong nung shishik. Ɗyin yitgǝ a wuret ɓǝ sǝsak gǝ peewusaan. ²³ Ɗyin yitgǝ ndam, ɓǝ sǝsak dip nkwoo. A waa nsa nyi, ɗǝ peewusaan agǝ nkwǝt a kwoo, ɓǝ kwoo nanyi a karyit a! ²⁴ Mǝgwuo gǝme gǝ wap daskagam vǝl mou, nsa ɓǝ nyangyit nde ɗe ɗemyit nde, ɗagat ɓǝ pǝnkaashik nde mǝn nlǝɓak shi nde. Gǝ ɓoot npǝ wap Naan gǝ byilong mou. ²⁵ A waa nnyi, a laa gǝgun, gu weel gǝ kaasuk gǝkaa bii wu gu sǝ gǝ bii wu gu sua mou, nau gǝ shishik gu, gǝkaa bii wu gu ɓyaang. Ɗe tooklang a wu maa sǝ, mǝn shishik a wu maa byaat mo? ²⁶ Gu naa yer gǝtǝng. Bii mǝ kop, ɗǝ mǝ ɗyip, ɗǝ mǝ tǝl yi ɗǝk nmee mou, mǝn Ndaagu wu gǝbǝtǝng bii sǝ gǝmuop. Kan gun a wu maa muop mou mǝ? ²⁷ A wuɗang gǝnaargu ɓǝ nweel kam ɓǝ dǝl zaa yii muup yi? ²⁸ A waa nme gu wel nsa lee ɓyang yi? Gu naa shi pel jepe wu bii fyar gǝlaap hǝ. Bii gǝ mǝ chan ɓǝlang ɗe gǝtaa raa byad yi mou. ²⁹ Dau kam hǝ, a laa gǝgun, wa Sulemanu nɗǝgǝn yoon afe dok kat byaad kabi nǝmuop hǝ mou. ³⁰ Ɗe Naan nmyap wung wu gǝlaap, wung wu bii nyi chinyi mǝn dǝɗaar ɓǝ fii ɗe a kon nwus dat, ɓǝ gǝ duu gun shi byaat mou a? Pǝn-naduk agu kat ³¹ Naa yong gu weel mǝn gu yen, 'Ɗe gǝ mǝ sǝ a me?' ko gu yen, 'Ɗe gǝ mǝ sua a me?' ko gu yen, 'Ɗe gǝ mǝ ɓyang a me?' ³² Nsa Mǝjong bii mǝ tang jepe nanyi, mǝn Ndaagu wu gǝbǝtǝng man nkwǝt gu tangkop muop. ³³ Bii chin wupel: gu tang a yil-long Naan gǝ byiwukǝr gǝfe, ɓǝ gǝ mǝ pǝn jepe nhǝ dip ngun. ³⁴ A waa nnyi, gu weel gǝ dǝɗaar mou, nsa dǝɗaar gǝ weel gǝ kaashik. Ɓit diɗyak-diɗyak gǝ weel gǝdu.