¹ Yesu naa gurum wukǝgǝi dat mǝn kaa yaa gǝpang. Tong lat mǝn jepgǝdǝr muup mǝ jya dǝr muup. ² Epfu muup shee muop yen, ³ "Wuret lang-nkaa muop wu a pya nnɗǝgǝn mǝrip, nsa yil-long gǝpǝtǝng a nǝ muop. ⁴ Wuret lang-nkaa muop wu fu tugat chiin, nsa yi gǝ mǝ zwaan muop. ⁵ Wuret lang-nkaa wu zǝzugam muop, nsa a muop gǝ mǝ yaa gǝyil. ⁶ Wuret lang-nkaa muop wu gǝ ɓǝlak gǝ amtǝ npe byiwukǝr hǝ, nsa gǝ mǝ agal. ⁷ Wuret lang-nkaa muop wu naachigir, nsa gǝ mǝ naachigir kaamuop. ⁸ Wuret lang-nkaa muop bǝzung muop a kyagad hǝ, nsa gǝ mǝ naa Naan. ⁹ Wuret lang-nkaa muop wu tang tugat-chagap, nsa gǝ mǝ yong muop shi jep Naan. ¹⁰ Wuret lang-nkaa muop wu mǝ twang muop gǝfu byiwukǝr hǝ, nsa yil-long gǝbǝtǝng a nǝmuop. ¹¹ Wuret lang-nkaa gu wu gurum mǝ agas gun, mǝn mǝ twang gun mǝn mǝ pam gun dat baan nsa an. ¹² Gu chin tookpya, nsa kopgǝshii gu nyi gwet gǝbǝtǝng. Nsa dok mǝ twang mǝlaa-ɓǝlǝpnaan wu mǝ yaa war ngun hǝ a kam hǝ. ¹³ A gun a kǝgǝn gǝyil. Mǝn ɗe kǝgǝn nzugum ɓǝ gǝ mǝ chin a nang nbǝn shang shizak yi? Nyi gǝ kyen zak mou, nlat ɓǝ mǝ kon-a-kon dat mǝn gurum mǝ dal kaa. ¹⁴ Gun a peewusaan gǝyil. Gǝfǝr wu langɗok gǝ lǝɓung bii nyi gǝsok mou. ¹⁵ Gurum gǝ lang wus shi til-ngong mǝn n-ogot kaa shi tukushi mou, gǝ ɗen a gǝtal ɗewar nsaanpe yi dip gǝpang. ¹⁶ Ɗagat peewusaan gǝgu saan yi tagam gurum ɗewar mǝ naa ɓǝlang gǝgu wuret yi mǝn mǝ tǝgǝr Nda gu wu gǝbǝtǝng hǝ. ¹⁷ Naa yi gu yen a wul a dǝr baa gǝ byitǝt gǝ byiyil mǝlaa-ɓǝlǝpnaan. A wul a dǝr baa gǝ muop mou, a wul a npe mǝ wak yi ruo nogot. ¹⁸ A laa naduk yi gǝgun, gǝbǝtǝng gǝ gǝyil gǝ mǝ lat, mǝbi wa til nɗǝgǝn byitǝt gǝ ɗel dat baan mou, jepe gǝ waa nrǝ a nogot. ¹⁹ A waa nnyi, mǝgwuo nroop mǝbi wa wutil gǝnaar byitǝt muop nhǝ mǝn nshee gurum muop gǝnyi ɓǝ gǝ yong nyi a shi wutil nɗǝgǝn yil-long gǝbǝtǝng. Mǝgwuo wu tǝt muop mǝn shee gurum kam hǝ ɓǝ gǝ mǝ yong nyi a shi wuyoon nɗǝgǝn yil-long gǝbǝtǝng. ²⁰ A laa yi gǝgun, ɗagat nǝ byiwukǝr agu nmaa nung mǝbyiyil gǝ Farisiyawa muop mou ɓǝ yong gu kat pǝruo nɗǝgǝn yil-long gǝbǝtǝng mou. ²¹ Gu kǝlǝng nkwǝt mǝ laa dǝr muop wudok nmok yen, 'Gǝ tǝ gurum mou,' mǝn 'Mǝgwuo wu tǝ gurum ɓǝ gǝ mǝ nogol nyi. ²² Gǝɗes hǝ, a laa gǝgun nkwǝt ɓǝt mǝgwuo nyal dǝr emnǝgǝn ɓǝ gǝ mǝ nogol nyi; mǝgwuo nlaa gǝ emnǝgǝn muup n-yen, 'Gǝ a wubaan gurum!' ɓǝ par gǝ ɗar ntagam gǝwur daskagam; mǝgwuo n-yen, 'Gǝ a wuyogor!' ɓǝ gǝ mǝ tak nyi nlǝwus. ²³ A waa nnyi, ɗyin gǝ mwaan gǝ byipǝn npe byitok gǝkaa rǝk-tok mǝn gǝ ɗye nkwǝt emnang nyi gǝ weel gǝgǝ, ²⁴ ɓǝ gǝ nyit byipǝn agǝ ntagam rǝk-tok nanyi mǝn waa gǝ myap gǝkang gǝ gǝ emnang nɗang she gǝ waaji gǝ pǝn byipǝn agǝ. ²⁵ Gapdǝr gǝ myap gǝkang gǝ gǝ gurum wu pam gǝ shi wu gu kutnyi gǝwar lǝ sheep hǝ. A kam mou ɓǝ wupam gǝ gǝ shen gǝ nwusheep, mǝn wusheep nshen gǝ nwuɓalpe, wuɓalpe gǝ tak gǝ nlǝɓal. ²⁶ A laa naduk, par gǝ pǝt ɗagat nǝ gǝ kwat shagal wu nkaa gǝ nanyi a dip mou. ²⁷ Gu kǝlǝng dok mǝ laa mǝ yen, 'Gǝ teer gǝ mat mǝgwuo mou.' ²⁸ Gǝɗes hǝ a laa gǝgun nkwǝt mǝgwuo wu naa mǝmat a naape koor hǝ, ɓǝ teer gwe gǝnyi nbǝzung muup. ²⁹ Ɗǝ yit gǝ gǝsar wumis nkwǝt a tugus pal gǝgǝ ɓǝ gǝ gogol gǝ shang mǝn gǝ tak hǝ. Nsa me ɓeep gǝ nlat baan ɓǝ ɗong maa wu gǝ waa dǝr lǝwus gǝ sǝsak dip. ³⁰ Ɗǝ sar gǝ wumis nkwǝt a tugus pal gǝgǝ ɓǝ gǝ gap gǝ tak hǝ. Nsa me ɓeep gǝ nlat baan ɓǝ ɗong maa wu gǝ waa dǝr lǝwus gǝ sǝsak dip. ³¹ Dok mǝ bǝn laa mǝ yen, mǝgwuo wu chen mat muup ɓǝ nyi shen byiran kǝgǝt nung tǝ ɗyik nny.' ³² Gǝɗes hǝ a laa gǝgu nkwǝt mǝgwuo ntǝ ɗyik gǝ mat muup, nǝ nkwǝt a gǝkaa ɓǝlǝp ɓwaar mou ɓǝ ɗen nyi a gǝwar ɓwaar. Mǝgwuo wu lap nyi ndangkong mǝ tǝ ɗyik afe, ɓǝ nyi zak a fu ɓwaar. ³³ Gu bǝn gu kǝlǝng nkwǝt mǝ laa dǝr muop wudok nmok mǝ yen, 'Gǝ sǝgǝr kǝ wurum mou, ɗe gǝ chin bii wu bǝzung gǝ mang hǝ dǝr Miskagam.' ³⁴ Gǝɗǝs hǝ a laa gǝgun gu sǝgǝr gǝ mǝbi mou, gu sǝgǝr gǝ gǝbǝtǝng mou, nsa a nyi a pǝtong-long Naan; ³⁵ gu sǝgǝr gǝ gǝyil mou, nsa a nyi a pǝtǝp kwak muup; gu sǝgǝr gǝ Urishalima mou, nsa a nyi a gǝfǝr Long wuyoon. ³⁶ Gǝ sǝgǝr gǝkaa gǝ mou, nsa yong gǝ ɓoot npǝ bat swoopkaa gǝ wa gǝme nwaa wupya ko wuchip mou. ³⁷ Ɗǝ ɓǝlǝp agu nɗar a gǝkaa 'ǝu' ɓǝ a 'ǝu' ɗǝ a 'hayǝu' ɓǝ a 'hayǝu'. Nɗel gǝkaa ndung ɓǝ tong a dǝr Shetan. ³⁸ Gu kǝlǝng nkwǝt dok mǝ laa mǝ yen, 'Yit nkop yit,' mǝn 'agas nkop agas.' ³⁹ Gǝɗǝs hǝ a laa gǝgun, gu nyang gurum wubis mou. Mǝgwuo nchit gǝngǝ ngan dasǝ, ɓǝ gǝ bat gan nde gǝ pǝn nyi. ⁴⁰ Ɗyin mǝgwuo ntangkop mwaan gǝgǝ nlǝsheep, mǝn nmang byaat ɓyang agǝ ɓǝ gǝ nyit byaat ǝbǝr agǝ nau nnyi. ⁴¹ Mǝgwuo nsaa gǝ a mat mwaan-mwaan mel gǝme yi ɓǝ gǝ mwaan gǝnyi mel vǝl. ⁴² Mǝgwuo wu ɗang mǝbi ɓǝ gǝ pǝn nyi, gǝ bat dangkong gǝ shen mǝgwuo wu tangkop lap kaat fu gǝ mou. ⁴³ Gu kǝlǝng nkwǝt dok mǝ laa yen, 'Ɗem emnang mǝn gǝ nyang wukas gǝ.' ⁴⁴ Gǝɗǝs hǝ a laa gǝgun, gu ɗem wukas gu mǝn gu ɗangnaan npe muop wu fu twang gun hǝ, ⁴⁵ ɗewar gu wak jep Ndaa gu wu gǝbǝtǝng hǝ yi. Nsa bii nyi fuus afe kaa kǝ gurum wubis gǝ wuret hǝ muop, mǝn bii lep gǝ fan kǝ gurum wukǝr gǝ wubaan. ⁴⁶ Ɗǝ gu ɗem a muop wu mǝ ɗem gun dat ɓǝ a me a kopgǝshii gu yi? Mǝ lap gǝndung muop bii mǝ chin a kam mou a? ⁴⁷ Ɗǝ bii gu nang a mǝjepnǝgǝngu dat ɓǝ gu chin a me maa nung gogot gurum yi? Mǝjong muop jet gǝ chan a kam mou a? ⁴⁸ A waa nsa kam hǝ, gu kagat a lengwaar, kabi Nda gu wu gǝbǝtǝng a wukǝgǝt hǝ.