¹ Lat mǝn Mǝrip mang Yesu waadǝr gǝgǝr gǝnyi ɗewar Shetan katshii muup yi. ² Yesu sǝnfu ɓit yagurum-vǝl nfuus gǝ lǝpar, lat mǝn ɓǝlak tǝ nyi. ³ Wu katshii nanyi ji laa gǝnyi yen, "Ɗǝ gǝ kwǝt a Laa Naan ɓǝ bat pang muop nhǝ wak nawe gǝnyi." ⁴ Mǝn Yesu laa gǝnyi yen, "Mǝ yil gwe ɗen, 'Gurum gǝ bar a shi nawe dat mou, ɗe a shi ɓǝlǝp wu gǝ tongpǝt nfu Naan hǝ'". ⁵ Lat mǝn Shetan mang nyi mwaan gǝfǝr gǝnyi mǝn lang nyi gǝsung lǝwap wuyoon, ⁶ mǝn laa dǝr muup yen,"Ɗǝ gǝ kwǝt a Laa Naan ɓǝ gǝ paar gǝ taa n-yil, nsa nyi a wuyiyil gwe, 'Yong gǝ laa dǝr mǝwong gǝfǝ mǝ nkangkaa gǝ' mǝn 'Gǝ mǝ lap gǝ gǝsar muop, yong gǝ chit kwak gǝ shi pang.'" ⁷ Yesu laa gǝnyi yen, "Nyi a wuyiyil gwe, 'Gǝ katshii Miskagam gǝgǝ Naan mou.'" ⁸ Shetan bǝn mang nyi kaa gǝ pang gǝnyi mǝn nyin yil-long gǝyil dau nnyi nau gǝ ɗong gǝmuop. ⁹ Mǝn laa dǝr muup yen, "Gǝ a pǝn jepe muop nhǝ dip ngǝ, ɗǝ gǝ dugum ntagam nǝ mǝn gǝ wap an." ¹⁰ Yesu laa dǝr muup yen, "Yagal gǝ kyem hǝ, Shetan! Nyi a wuyiyil gwe, 'Yong gǝ wap a Miskagam gǝgǝ Naan, mǝn gǝ chin ɓǝlang a nnyi dat.'" ¹¹ Lat mǝn Shetan nyit nyi, mǝn mǝwong muop jya mǝ wap nyi. ¹² Yesu kǝlǝng nkwǝt mǝ yaa Yahaya mǝn gap baa waadǝr Galili. ¹³ Nyit Nazaret mǝn mwaan gǝ tong nKafarnahum wu nyi dukduk gǝ Chip Galili, ngan gǝyil Zabaluna gǝ Naftali. ¹⁴ Dok taa kam a dǝr kǝgǝt lǝfu wudok Ishaya, wulaa-ɓǝlǝpnaan laa yen, ¹⁵ "Gǝyil Zabaluna gǝ Naflali, dukduk gǝ fu Chip wu gap Kong Urdun ɗeltaa, Galili Mǝjong! ¹⁶ Gurum wudok mǝ tugatɗok nkwoo hǝ mǝ naa peewusaan, muop wudok mǝ tugatɗok ngan gǝpe riin muut hǝ, pee saan kaamuop." ¹⁷ A gǝshii nyi mǝn Yesu ɓǝn shakɓǝlǝp mǝn yen, "Gu nyit wubis nsa yil-long gǝbǝtǝng wulduk." ¹⁸ Shi wudok mwaanɗok fu chip Galili mǝn naa daas vǝl wu a mǝjepnǝgǝn shak hǝ. Nde a Saminu wu gǝ mǝ yong nyi shi Bitrus hǝ gǝ emnǝgǝn muup Andarawus muop fu zwam jeng gǝdu nchip nsa muop dok a mǝkwat cherep. ¹⁹ Yesu laa gǝ muop yen, "Gu lǝng gǝdǝr nǝ, yong a bat gun gu wak fuǝr gurum. ²⁰ Dat wagap bǝr mǝn mǝ nyit jeng gǝmuop mǝn mǝ lǝng gǝdǝr muup. ²¹ Yesu yagal nyit pee nanyi dat mǝn bǝn naa nde daas vǝl a mǝjepnǝgǝn shak, nde a Yakubu laa Zabadi gǝ emnǝgǝn muup Yahaya. Dok muop nɗǝgǝn chii am gǝpe gǝme ndaamuop Zabadi, muop fu myap jeng gǝdu. Yesu yong muop. ²² Dat wagap bǝr mǝn mǝ nyit chii am gǝ ndaamuop mǝn mǝ lǝng gǝdǝr muup. ²³ Yesu zar gǝyil Galili dip, nyi fu sheepee nlǝwap amuop, nyi fu shakɓǝlǝp langship yil-long Naan, nyi fu ɗak wugok gǝnaar muop. ²⁴ Ɓǝlǝp afe sǝlpee gǝyil Suriya dip, mǝn gurum gǝ jya gǝ wugok muop dip dǝr muup, gǝ muop wu muutlaa byiyaa diɗyak-diɗyak yak muop, gǝ muop wu damwam weel muop, gǝ muop wu ɗuam-ɓǝrang, gǝ muop wu shishik muop ɗuamkum hǝ. Yesu ɗak muop. ²⁵ Gurum wukǝgǝi mǝ lǝng gǝdǝr muop gǝyil Galili, gǝ Dikapolis, gǝ Urishalima, gǝ Yahudiya gǝ pee wu gap Urdun ɗeltaa.