¹ Ndangkong ɓit peemǝ mǝn Yesu mang Bitrus, gǝ Yakubu, gǝ emnǝgǝn muup Yahaya mǝn mwaan mpang wufǝfyer gǝ muop. ² Mǝn shik muup bat ntagam muop. Fanyit muup yagal saan kabi fuus hǝ, mǝn byaat gǝfe yagal saan kabi wus tat hǝ. ³ Lat mǝn mǝ naa Musa gǝ Iliya fu lǝfu gǝnyi. ⁴ Bitrus laa gǝ Yesu yong, "Miskagam, ɗong wu mǝn npeen hǝ. Ɗǝ gǝ ɗem ɓǝ a ɗyak kyang-kyang kùn—gǝme a nǝmak, gǝme a nung Musa, gǝme a nung Iliya." ⁵ Nyi fu ɓǝlǝp dat kam mǝn ligin sǝp kaa muop, mǝn mǝ kǝlǝng ɗǝgǝl nɗǝgǝn ligin nanyi, yen, "Wudung a laa gǝɗam gǝnǝ, wu took nǝ pya gǝnyi badǝn hǝ. Gu lǝng kom gu gu kǝlǝng nyi." ⁶ Jepgǝdǝr mǝ kǝlǝng kam mǝn mǝ falap mǝn mǝ swap kaa muop nsa mǝ yigil lugut. ⁷ Mǝn Yesu waaji ɓuam muop mǝn yong, "Gu yigil gǝtǝng, gu yigil lugut mou." ⁸ Mǝ ap yit muop mǝn mǝ kat mǝgwuo mou ɗe a Yesu dat. ⁹ Muop nsam gǝpang nanyi mǝn Yesu laa gǝmuop yen, "Gu yakdang bii wu gu naa hǝ gǝ mǝgwuo mou ɗe a par ɓit wu Laa Gurum gǝ yagal gǝnaar mǝdiɗǝm." ¹⁰ Jepgǝdǝr muup mǝ nang fu muup mǝ yong, "A waa nme mǝbyiyil mǝ yong a Iliya gǝ wul ɗǝng yi?" ¹¹ Yesu lap yong, "Iliya gǝ wul wagap ji nchin jepe dau nlǝ. ¹² A laa yi gǝgun, Iliya wul gwe mǝn gurum mǝ man nyi mou. Mǝn mǝ chin dwet gǝnyi. A kam shizak Laa Gurum gǝ sua tǝgǝrchiin nsar muop." ¹³ Mǝn jepgǝdǝr mǝn man nkwǝt nyi fu laa ɓǝlǝp a kaa Yahaya Wukǝnpe. ¹⁴ Wakjya mǝ wul dǝr gurum wukǝrǝgi mǝn me dagwuo ji dugum ntagam muup mǝn yong, ¹⁵ "Miskagam, naachigir kaa laa nǝ, nsa nyi a wuɗǝm ɓǝrang, muutla nogol nyi yoon. Bii fǝlap nɗǝgǝn wus gǝ am. ¹⁶ A mwaan gǝnyi ntagam jepgǝdǝrgǝ mǝn mǝ ɓoot npe chin nyi mou." ¹⁷ Yesu lap yong, "Gun a seen wu lǝleng, wu nyang pǝn naduk, gǝ a tong gǝgu a ɓit ɗang yi? Gǝ chin a ɓit ɗang a ɗokɓǝp gǝ a naa gun yi? Gu jya gǝnyi npeen dǝr nǝ." ¹⁸ Lat mǝn Yesu ɓyaal damwam nanyi, mǝn pǝt mǝn lalaa nanyi kagam gǝshii nanyi. ¹⁹ Lat mǝn jepgǝdǝr mǝ jya dǝr Yesu gǝ eskoghop mǝ yong, "Ɗe a me saa mǝ ɓoot npe chen nyi mou yi?" ²⁰ Yesu laa gǝ muop yong, "A nsa pǝn-naduk gǝgu kat. A laa gǝgun, ɗǝ gu kwǝt gǝ pǝn-naduk wa laanyi kabi ǝk mostad hǝ, ɓǝ gu laa dǝr pang gu yong, 'Nyi peen gǝ mwaan npeen' ɓǝ gǝ yagal nmwaan, ɓǝ mǝbi gǝ ma gun u. ²¹ . ²² Shi wu muop nGalili hǝ mǝn Yesu laa gǝ jepgǝdǝr muup yong, "Par gǝ mǝ shen Laa Gurum gǝsar gurum muop ²³ mǝn mǝ ntǝ nyi, par ɓit wukùn ɓǝ yagal." Mǝn jepgǝdǝr nanyi mǝ weel badǝn. ²⁴ Jya mǝ wul gǝyil Kaparnawum mǝn mǝlap gǝndung mǝ jya dǝr Bitrus jya mǝ yong, "Wu sheepee gǝgu bii kwat karyit shekel a?" ²⁵ Mǝn lap yong, "Ǝu." Bitrus waa yaa shi lǝ mǝn Yesu laa ɓǝlǝp a gǝnyi ɗǝng yong, "Gǝ naa gǝ kat a na Simon? Long gǝyil bii mǝ lap gǝndung gǝ wap a fu wuɗa muop yi? A fu gurum gǝmuop a, a fu mǝjong yi?" ²⁶ Bitrus lap yong "A fu mǝjong," mǝn Yesu yong, "Nkwǝt a kam ɓǝ gurum gǝmuop gǝ mǝ kwat mou. ²⁷ Naa yong mǝ nyit mǝlap gǝndung mǝ nruo nɗǝgǝn bii wubis. Mwaan nch̵ip, mwaan gǝ lǝng zwaan, ɓǝ gǝ yaa cherep wupel. Gǝ ep fu muup ɓǝ gǝ kat shekel. Mang mǝn mwaan gǝ kwat fuɓǝt nǝ gǝ nǝmak."