¹ Shi nanyi mǝn jepgǝdǝr mǝ jya dǝr Yesu mǝn mǝ yong, "A wuɗa a wuyoon dau nɗǝgǝn yil-long gǝbǝtǝng yi?" ² Mǝn Yesu yong me lalaa wuchom, mǝn ɗen gǝnaar muop, ³ mǝn yong "A laa naduk gǝgun, ɗagat nǝ gu bat gu wak kabi jep wuɗyen mou ɓǝ gu ruo nɗǝgǝn yil-long gǝbǝtǝng mou. ⁴ Mǝgwuo wu sam gǝkaa muup kabi nung lalaa wuchom nhǝ, ɓǝ a nyi gǝ kwǝt a wuyoon dau nɗǝgǝn yil-long gǝbǝtǝng. ⁵ Mǝgwuo nlap lalaa wuchom kabi wudung, ɓǝ lap a an. ⁶ Mǝgwuo wu saa me lalaa nɗǝgǝn muop wu mǝ pǝn naduk n-an nchin wubis ɓǝ ɗong ɗyin mǝ nɓugat pang fiin ntak ntook muup mǝn mǝ ntak nyi nɗǝgǝn chip. ⁷ Lat nkaa gǝyil nsa a shii fat fǝlap a gǝɗet nhǝ! Nsa shii nanyi nwul a lengwaar, ɗe zhirii gǝ lang kaa gurum wu saa shii nanyi wul yi! ⁸ Ɗǝ sar gǝ ko lashi gǝ nkwǝt a bii pal gǝgǝ, ɓǝ gǝ gap gǝ tak. Nsa gǝ rǝ lǝ Naan a wu kǝgǝl, kwǝt gǝ bot sar o, ɓǝ a wuret ma wu gǝ rǝ nlǝwus gǝ sar vǝl gǝ kwak vǝl. ⁹ Ɗǝ yit gǝ nkwǝt a war pal gǝgǝ, ɓǝ ǝlok gǝ shang gǝ tak. Gǝ rǝ lǝ Naan gǝ yit gǝme ɓǝ ɗong ma wu gǝ rǝ nlǝwus gǝ yit vǝl. ¹⁰ Naa yi gu takɓak shi me jep wuɗyen nhǝ mou. A laa gǝgun mǝwong gǝmuop bii mǝ naa yit Ndaanǝ wu gǝbǝtǝng. ¹¹ . ¹² Gu naa gu kat a na? Mǝgwu nkwǝt gǝ tǝm yagurum-paat, mǝn gǝme npaap, ɓǝ nyit gǝshang wu yagurum-feer gǝfu-sar gǝɓǝt lǝɓung mǝn mwaan gǝ tang gǝme wu paap hǝ mou a? ¹³ A laa naduk gǝgun, ɗǝ nkat ɓǝ took muup gǝ pya gǝ wu gǝme nanyi nma gogot wu yagurum-feer gǝfu-sar wu mǝ paap mou hǝ. ¹⁴ A kam zak, Ndaa gu wu gǝbǝtǝng ɗem ɗyin wa gǝme gǝnaar jep muop nhǝ nlat baan mou. ¹⁵ Ɗǝ emnang ndam took gǝ, ɓǝ mwaan gǝ laa gǝnyi, gǝkang gu gǝsuk dat. Ɗǝ nkǝlǝng gǝ ɓǝ gǝ pǝt gǝ emnang. ¹⁶ Ɗǝ nkǝlǝng gǝ mou ɓǝ gǝ yong mǝgwuo gǝme ko vǝl gu mwaan, ɗewar fu gurum vǝl ko kùn twamshik kaa muup yi. ¹⁷ Ɗǝ nnyang kǝlǝng muop, ɓǝ gǝ laa gǝ gǝwur gurum Naan. Ɗǝ nnyang kǝlǝng muop ɓǝ gu tak nyi kabi Mǝjong gǝ wulap gǝngung hǝ. ¹⁸ A laa naduk gǝgun bii wu gu ɓugat gǝyil ɓǝ gǝ mǝ ɓugat gǝbǝtǝng; bii wu gu wut gǝyil ɓǝ gǝ mǝ wut gǝbǝtǝng. ¹⁹ A chin a laa yi gǝgun, ɗǝ gun vǝl gu mang fu gu gǝyil gǝkaa mǝbi wu gu ɗang, ɓǝ Ndaanǝ wu gǝbǝtǝng gǝ chin ngun. ²⁰ Nsa pee wu gurum vǝl ko kùn mǝ tǝl gǝshak nɗǝgǝn sǝmnǝ, ɓǝ an nnǝgǝn gǝnaar muop." ²¹ Lat mǝn Bitrus nang fu Yesu yen, "Miskagam, emna gǝ chan wubis a ɗang ɓǝ a kon nnyi yi? Gǝ kwǝt a pogovǝl a?" ²² Yesu yen, "A laa gǝgǝ a yong a pogovǝl mou, a yagurum-kùn gǝfu-sar bǝb pogovǝl. ²³ A waa nnyi, yil-long gǝbǝtǝng a kabi me long wu ɗemkop myap gǝkang muup gǝ frang gǝfe muop. ²⁴ Mang ɓǝm dat mǝn mǝ jya gǝ me frang gǝfe wu nyi gǝ kaat talenti kam sar. ²⁵ Ɓoot npe kwat mou mǝn miskagam gǝfe yong mǝ seet gǝnyi, gǝ mat muup nau gǝ jep muup, ɗewar mǝ kwat kaat nanyi yi. ²⁶ Frang nanyi pal ntagam muup mǝn yen, 'Miskagam, mogorkung gǝ an, gǝ a kwat dau.' ²⁷ Mǝn wupin lǝ nanyi naachigir gǝfe nsa kat ɓoot npe kwat mou, mǝn nyit kaat nanyi. ²⁸ Mǝn frang nanyi mwaan gǝ kat wunye muuop frang wu nyi gǝ kaat gǝfe dinari yagurum-paat. Yaa nyi shi feel mǝn yen, 'Kwat bii gǝnǝ wu gǝ gǝnyi hǝ.' ²⁹ Mǝn wunye muup frang nanyi ɗwak nyi yen, 'Mogorkung gǝ an, gǝ a kwat gǝ.' ³⁰ Mǝn nyang. Mǝn yaa wunye muup nanyi tak nlǝbal ɗe par gǝ kwat a lengwaar. ³¹ Pangkop mǝnye muup mǝ naa kam mǝn logom muop badǝn. Mwaan mǝ yakdang bii wu taa hǝ dau gǝ wupin lǝ gǝ muop. ³² Lat mǝn wupin lǝ frang nanyi yong nyi mǝn laa gǝnyi yen, 'Gǝ, a wu ɓǝtbis, a nyit nagǝt kaat gǝgǝ nsa gǝ ɗang an. ³³ Ɗong ɗyin gǝ zak gǝ naachigir wunye gǝ frang kabi wu an a chin ngǝ hǝ mo?' ³⁴ Ɓǝt wupin lǝ gǝfe yal mǝn yaa nyi pǝn mǝpyan nogolpe, ɗe par gǝ kwat kaat nanyi yi dip. ³⁵ Ndaanǝ wu gǝbǝtǝng gǝ chin a kam gǝ gun, ɗagat nǝ gu kon wubis mǝjepnung gu gǝ bǝzung gǝme."