¹ Farisiyawa gǝ Sadukiyawa mǝ jya npe katshii muup, mǝ nang mǝ yen gwar kam byinyin ndun gǝtǝng. ² Mǝn lap fumuop yen, ''Ɗǝ nkwǝt a kansǝgǝn, ɓǝ gu laa gu yen, 'pee yaa gǝ saan, nsa gǝtǝng ɓang.' ³ Ɗǝ nkwǝt a gǝɓit ɓǝ gu laa gu yen, 'Ɓit ya gǝ bis, nsa gǝbǝtǝng naat mǝn kwoo.' Gu ɓoot npe laa bii wu gǝtǝng, mǝn byinyin wu gǝɗǝt nhǝ maa gun nlaa. ⁴ Seen wubis gǝ ɓwaar fu tang byinyin, mǝn gǝ kat byinyin wu ma nung Jona mou." Lat mǝn Yesu yagal nyit muop. ⁵ Jepgǝdǝr jya mǝ ruo gǝyit nde mǝn mǝ mandǝr gǝsut ɗe gǝ nawe. ⁶ Yesu laa dǝr muop yen ''Gu mwaan lee gu kang yis Farisiyawa gǝ Sadukiyawa.'' ⁷ Jepgǝdǝr mǝ ɓagalka ɓǝlǝp nanyi dǝrsut mǝn mǝ yǝn, ''A nsa mǝ mang nawe mou.'' ⁸ Yesu man kam mǝn yen, ''Pǝn-naduk gǝgun kat, a me saa gun fu ɓagalka dǝrsuk gu yen a nsa gu mang nawe mou yi? ⁹ Kutnyi gu ɗye ɓiling nawe wudok paat mǝn sǝ gǝ gurum kam paat hǝ mou me, dok gu kok ɗuk nɗǝgǝn tukushi a ɗang yi? ¹⁰ Ɗe ɓilig nawe pogovǝl wudok sǝ gǝ gurum kam feer, dok gu kok ɗuk nɗǝgǝn tukushi a ɗang yi? ¹¹ A nsa me gu mankang ɓǝlǝp wu an fu laa gǝgun gǝkaa nawe mou yi? Gu mwaan lee gu kang yisti Farisiyawa gǝ Sadukiyawa.'' ¹² Lat mǝn man gǝtap nyi fu delkom muop gǝkaa lǝp yis nung nawe mou, ɗe nyi fu laa gǝ muop mǝ kang a gǝ sheepee Farisiyawa gǝ Sadukiyawa. ¹³ Shi wu Yesu bat ngan yit Kaisariya Filibbi mǝn nang fu jepgǝdǝr muup yen, "Gurum bii mǝ yen Laa Gurum a wuɗa?" ¹⁴ Mǝ yen, "Pak mǝ yen a Yahaya Wukǝnpe; pak mǝ yen a Iliya; pangkop mǝ yen a Irimiya ko me wulaa-ɓǝlǝpnaan." ¹⁵ Laa gǝ muop yen, "Ɗe gun bii gu yong an a wuɗa?" ¹⁶ Bitrus lap yen, "Gǝ a Kristi Laa Naan wu nkagam." ¹⁷ Yesu lap fumuup yen, ''Wuret lang-nkaa gǝ Simon laa Jona, nsa a gurum nyin bii nhǝ ngǝ mou, a Ndaanǝ wu gǝbǝtǝng. ¹⁸ An zak fu laa gǝgǝ, a gǝ a Bitrus, gǝ gǝ a ɗyik gǝwur gurum Naan gǝnǝ a kaa pang nhǝ. Fulǝ Hades gǝ ribin nyi mou. ¹⁹ Gǝ a pǝn bii ep fulǝ yil-long gǝbǝtǝng ngǝ. "Bii wu gǝ ɓugat gǝyil ɓǝ gǝ mǝ ɓugat gǝbǝtǝng, bii wu gǝ wut gǝyil ɓǝ gǝ mǝ wut gǝbǝtǝng" ²⁰ Lat mǝn Yesu ɓyang ɓǝlǝp pǝn jepgǝdǝr muup yen nua laa gǝ mǝgwuo gǝtap jin a Kristi mou. ²¹ A shide mǝn Yesu ɓǝm laa gǝ jepgǝdǝr muup yen gǝ ji mwaan nUrishalima a tiit, mwaan gǝ ji sua tǝgǝrchiin gwet nsar daskagam gǝ mǝnan ndaawang gǝ mǝbyiyil, gǝ mǝ tǝ jin mǝn nlat ɓǝ mǝ ep jin gǝ nook nɗǝgǝn ɓit wukùn. ²² Mǝn Bitrus dǝl nyi gǝ jong mǝn ɓyaal nyi yǝn, "Mang ɗyin jong gǝgǝ, Miskagam; bii nakam gǝ kat gǝ mou." ²³ Mǝn Yesu bad laa gǝ Bitrus yen, ''Yagal gǝ kyem hǝ, Shetan! Gǝ a gwak dǝrnǝ, nsa enɗye gǝgǝ a gǝkaa jepe Naan mou, ɗe a nung gurum dat." ²⁴ Lat mǝn Yesu laa gǝ jepgǝdǝr muup yen, "Mǝgwuo nɗemkop langǝdǝrnǝ, ɓǝ a tiit dat nnyang kaashik yi mǝn nmang shepɓeel gǝfe mǝn nlangǝɗǝrnǝ. ²⁵ Nsa mǝgwuo wu chinkǝn tooklang gǝfe ɓǝ gǝ kat mou, mǝgwuo wu tooklang gǝfe gapɗel nsa an hǝ, ɓǝ gǝ kat. ²⁶ Ɗe mǝgwuo nkat jepe gǝyil dip nkop nook muup, ɓǝ a me a kyen gǝfe yi? Gurum gǝ mang nook muup nbat a gǝme? ²⁷ Nsa laa gurun par gǝ wul nɗǝgǝn yoon Ndaa muup gǝ mǝwong afe. Nlat ɓǝ kwat kopgǝshii nchat gǝ bii wu gurum chin hǝ. ²⁸ A laa naduk gǝgun, pak gu ɗyamɗdok npeen wu gǝ mǝ cham muut mou, ɗe a ɓit wu gǝ mǝ naa Laa Gurum ntong wul gǝ yil-long anyi.