¹ Lat men pak Farisiyawa gǝ mǝbyiyil me jya der Yesu nUrishalima. Mǝ yong, ² A waa nme jepgeder ge me takbak shi was nung daskagam yi? Nsa bii mǝ vang sar she mǝ sǝsǝ mou." ³ Men lap yong, "A nah gun zak gu nyang tǝt byitǝt Naan ɗe gu chan a nung was gǝgu dat yi? ⁴ Nsa Naan yong, 'Gǝ pǝnmaa nNdaagǝ, gǝ nǝgǝngǝ,' mǝn bǝn yong 'Mǝgwuo wu laa wubis gǝkaa ndaamuup gǝ nǝgǝnmuup, ɓǝ gǝ muut a lengwaar.' ⁵ Mǝn gun gu yong, 'Mǝgwuo nlaa gǝ ndaamuup gǝ nǝgǝnmuup nyong "Bii wu gu tangkop dǝrnǝ, a pǝn gwe nNaan,'" ⁶ ɓǝ gwuo nanyi gǝ pǝnmaa n-ndaamuup zak mou. A kam mǝn gu takɓak shi ɓǝlǝp Naan npe was gǝgu. ⁷ Mweng muop! Kan hǝ Ishaya dok laa naduk kaagu shi wu yong, ⁸ 'Gurum muop nhǝ mǝ pǝnmaa n-an a shi gǝfu muop dat, bǝzung muop njong gǝ an. ⁹ Mǝ wap an a baan dat, nsa muop fu sheepee a byitǝt nung gurum.'" ¹⁰ Lat mǝn yong gurum wukǝrgǝi dǝrshik mǝn laa gǝmuop yen, "Gu lǝngkom ɗǝ gu mankang yi. ¹¹ A mǝbi wu gǝ rǝ nfu hǝ gǝ rap gurum mou. A bii wu gǝ tongpǝt nfu hǝ, a nyi gǝ rap gurum." ¹² Lat mǝn jepgǝdǝr jya mǝ laa dǝr Yesu mǝ yong, "Gǝ man nkwǝt Farisiyawa ɗyin mǝ kǝlǝng ɓǝlǝp nanyi mǝn logomm muop a?" ¹³ Yesu lap yong, "Tǝng wu a Ndaanǝ wu gǝbǝtǝng ɓyang mou ɓǝ gǝ mǝ shang nbaa gǝnyi. ¹⁴ Nyit muop nǝgǝn, muop a wuvagam wu mǝ lǝngɗok ntagam. Ɗǝ wuvugum nlangtagam wuvugum ɓǝ muop dau gǝ mǝ fulap ntugul." ¹⁵ Bitrus lap fu Yesu yong, "Yakshii ɓǝlǝp-kwoom nanyi nmǝn." ¹⁶ Yesu yong, "Gu kutnyi nǝ gu mankang a? ¹⁷ Gu man nkwǝt mǝbi wu rǝ nɗǝgǝn fu bii ɗel yaa nɓǝt mǝn npǝt nnafit mou a? ¹⁸ Bii wu gǝ tongpǝt nfu hǝ bii tong a nbǝzung kaa yi. A muop gǝ mǝ rap gurum. ¹⁹ Nsa enɗye wubis bii tong a bǝzung kaa yi, gǝ tǝ-gurum, teer-gǝ-mat (teer-gǝ-mis) mǝgwuo, gǝ ɓwaar, gǝ wat, gǝ twamshik wurum, gǝ dam sǝm. ²⁰ A muop gǝ mǝ rap gurum. Mǝgwuo nsǝsǝ nǝ nvang sar ɓǝ a nyi gǝ rap nyi mou." ²¹ Lat mǝn Yesu yagal npe nanyi mǝn mwaan ngan gǝfǝr Taya gǝ Sidon. ²² Me namat Kanan tong pǝt ngan pee nanyi, mǝn ep ɗǝgǝl yen, "Nachigir kaanǝ, Miskagam La Dauda! Me damwam fu ɓyak reepnǝ." ²³ Mǝn Yesu lap ɓǝlǝp fu muup mou. Jepgǝdǝr muup jya mǝ ɗuak nyi mǝ yen, "Chin nyi, nsa nyi aar ɗǝgǝl gǝdǝr mu." ²⁴ Mǝn Yesu lap yen, "Dok mǝ lep an a dǝr mǝgwo mou; a dǝr tǝm lǝ Izraila wu mǝ lǝn hǝ dat." ²⁵ Mǝn namat nanyi ji dugum ntagam muup, mǝn yen "Miskagam, tǝp an" ²⁶ Lap yen "Ɗong ɗyin mǝ mang sǝ jep nkon n-as mou." ²⁷ Mǝn yen, "A kam, Miskagam. Zak as bii mǝ ɗyigin ɗuk sǝ wu wakɗǝk ntagam jep." ²⁸ Lat mǝn Yesu lap yen "Namat, pǝn-naduk gǝ yi gagam; ɗagat nnyi kot yi kabi wu yi ɗǝmkop hǝ." Mǝn reep muup kagam shide. ²⁹ Yesu nyit pee nanyi mwaan dukduk gǝ Chip Galili. Kaa yaa gǝ lǝɓung mǝn tong nǝgǝn. ³⁰ Gurum wukǝrgǝi mǝ ya dǝr muup. Mǝ jya gǝ wukǝgǝl, gǝ wuvagam, gǝ wufuɓǝm, gǝ muop wu wukut hǝ, gǝ gogot gwet wu muop gǝ gok hǝ. Mǝ jya gǝ muop ntagam Yesu, mǝn ɗak muop. ³¹ Ɓǝlǝp rǝng gurum wukǝrgǝi shi wu mǝ naa wufuɓǝm laa lǝfu, wukut kagam, wukǝgǝl mwaan-mwaan, mǝn wuvagam mǝ naape. Mǝn mǝ pyap Naan Izraila. ³² Yesu yong jepgǝdǝr muup mǝ yen, "An fu naachigir gurum wukǝrgǝi nhǝ, nsa chin ɓit kùn gwe gǝpe gǝme gǝ an mǝn mǝ sǝ mǝbi mou. A tangkop nyit muop wak nǝ nsǝ mou nsa ya mǝ nɗǝmleet gǝwar wak." ³³ Jepgǝdǝr nanyi mǝ laa gǝnyi yen, 'Ɗe gǝmǝ kat nawe ane nzangpee nhǝ, wu gǝ yoon gurum wukǝrgǝi nhǝ yi?" ³⁴ Yesu nang fu muop yen, "Gun gǝ ɓiling nawe a ɗang eh?" Mǝ yen, "Pogovǝl gǝ cherep til." ³⁵ Mǝn Yesu shak ngurum mǝ tugat nyil. ³⁶ Kok nawe wu pogovǝl gǝ cherep nanyi, ndangkong lapyil, mǝn tarap nawe nanyi chin pǝn jepgǝdǝr; mǝn jepgǝdǝr mǝ pǝn gurum muop. ³⁷ Gurum dip mǝ sǝ mǝn mǝ agal. Mǝn mǝ wagar dǝɗuk gǝrang tukushi pogovǝl. ³⁸ Muop wu mǝ sǝ hǝ daas kam feer, ɗe surǝp gǝ jep yi. ³⁹ Lat mǝn Yesu sat ngurum mǝ wak, mǝn met nchii am mǝn waa yaa ngan Magadan.