¹ A shide mǝn Hirudus wu a long hǝ kǝlǝng ɓǝlǝp gǝkaa Yesu. ² Mǝn laa gǝ frang gǝfe muop yen, "Wudung a Yahaya Wukǝnpe; a nyi yagal gǝnaar mǝdiɗǝm. Jepe nhǝ fu chan a waa nnyi." ³ Hirudus dok yaa Yahaya, ɓugat nyi mǝn kul nyi nsa ɓǝlǝp Hirudiya, mat emnǝgǝn muup Filip. ⁴ Yahaya dok laa gǝ Hirudus yen "Ɗong ɗyin gǝ lap nyi nwaa mat gǝ mou." ⁵ A waa nyi Hirudus dok gǝwar tǝ Yahaya yi mǝn yagal lugut nsa gurum mǝ mang nyi a wulaa-ɓǝlǝpnaan. ⁶ Par ɓitlaa Hirudus mǝn reep Hirudiya met gya wu ɗongɓǝt Hirudus. ⁷ Lat mǝn Hiridus pǝsfu gǝtap lareep nanyi nnang a me shidat ɓǝ ji pǝn nyi. ⁸ Nǝgǝn lareep nanyi kar nyi mǝn mwaan gǝ yen, "Shen kaa Yahaya Wukǝnpe n-an nɗǝgǝn klang." ⁹ Bii nanyi dok ɓyak Hirudus badǝn, ɗe a nsa dok sǝgǝrfu gwe gǝkaa, gǝ gurum muop wu mǝ wul byisǝ hǝ, mǝn pǝnfu. ¹⁰ Langlep mǝn mwaan mǝ gap kaa Yahaya nlǝɓal. ¹¹ Mǝ wakjya gǝ kaa nanyi nɗǝgǝn klang, mǝ pǝn lareep nanyi mǝn lap mwaan gǝ pǝn nǝgǝndǝ. ¹² Lat mǝn jepgǝdǝr Yahaya jya mǝ mang kum muup mwaan mǝ wum. A dangkong nanyi mǝn mwaan mǝ laa gǝ Yesu. ¹³ Yesu kǝlǝng dat mǝn yagal nɗǝgǝn chii am mwaan gǝkǝnpe. Gurum mǝ kǝlǝng mǝn mǝ nyit gǝfǝr mǝn mǝ gǝng mwaan gǝdǝr muup nshii. ¹⁴ Yesu mwaan yaa dǝr muop mǝn kat gurum wukǝrgǝi. Naachigir kaamuop mǝn ɗak wugok wu gǝnaar muop. ¹⁵ Pee mang kansǝgǝn mǝn jepgǝdǝr Yesu jya mǝ laa gǝ nyi mǝ yen, "Pee nhǝ a gǝgǝr mǝn fuus waa gwe. Sat ngurum muop mǝ yok ɗǝwar mwaan mǝ sarap sǝ yi nfung wan." ¹⁶ Mǝn Yesu laa gǝ muop yen, "A tiit mǝ nmwaan nmǝpe yi mou. Gu pǝn mǝbi nmuop mǝ sǝ." ¹⁷ Mǝ laa gǝ nyi mǝ yen, "Mǝn gǝ ɓiling nawe a paat dat gǝ cherep vǝl npeen." ¹⁸ Yesu yen, "Gu jya gǝnyi n-an." ¹⁹ Lat mǝn Yesu laa gǝ gurum wukǝrgǝi mǝ tugat gǝ wung. Kok ɓiling nawe paat gǝ cherep vǝl nanyi. Ep kaa naa gǝbǝtǝng yi mǝn tarap mǝn pǝn jepgǝdǝr muup, mǝn jepǝdǝr muup mǝ pǝn gurum wukǝrgǝi. ²⁰ Muop dau mǝ sǝ, mǝ agal. Mǝ kok gogot wu ɗe gǝrang kambil sarkaavǝl. ²¹ Muop wu mǝ sǝsǝ nanyi dok daas a kam paat, ɗe surep gǝ jep wu mǝ nkun muop mou yi. ²² Gǝ laa mou mǝn Yesu sat njepgǝdǝr muup mǝ ruo nchii am yaa war nnyi ɗekkaa gǝɓǝtpe nde mǝn laa yi gurum muop mǝ yok. ²³ Gurum wukǝrgǝi mǝ yok dat mǝn kaa yaa gǝ npang nmeshik npe ɗangnaan yi. Pee mang kansǝgǝn lok, a nyi dat nnǝgǝn. ²⁴ Chii am nanyi dok kutnyi njong gǝ fulis, mǝn kogom yagal dung am nanyi mǝn tulang muop. ²⁵ Nkangǝɓit mǝn Yesu yagal lang gǝɓǝt am gǝ mwaan-mwaan yi ji dukduk gǝ muop. ²⁶ Jepgǝdǝr mǝ naa nyi fu mwaan gǝkaa am, mǝn mǝ yigil lugut, mǝ yen, "A mǝwong." Mǝn mǝ ɓwap wuwagar nsa lugut. ²⁷ Bǝr mǝn Yesu laa gǝ muop yen, "Gu weel mou! A an! Gu yigil lugut mou." ²⁸ Bitrus lap yen, "Miskagam, ɗǝ nkwǝt a gǝ ɓǝ gǝ pǝnfu n-an a waaji dǝr gǝ gǝkaa am nanyi." ²⁹ Yesu yen, "Waa gǝ ji." Men Bitrus pet nɗǝgǝn chii am nanyi mǝn yagal lang gǝ shiimuup kaa am gǝ mwaan yi dǝr Yesu. ³⁰ Lee dat mǝn Bitrus bat yit naa kogom wu fu ɓwap mǝn yagal lugut. Mǝn taa fu ɗyilang am, mǝn ep ɗǝgǝl yen "Miskagam, pǝt gǝ an." ³¹ Gǝ laa mou mǝn Yesu shen sar yaa Bitrus yi mǝn yen "Pǝn-naduk gǝgǝ kat; a na gǝ yagal lugut yi?" ³² Yesu muop gǝ Bitrus mǝ ruo dat nɗǝgǝn chii nanyi mǝn kogom nanyi ɗar. ³³ Mǝn jepgǝdǝr Yesu mǝ wap nyi mǝn mǝ yen "Gǝ wagap a Laa Naan." ³⁴ Mǝ ɗǝkkaa nkong nanyi mǝn mǝ mwaan gǝyil Janesarat. ³⁵ Daas wu nnǝgǝn mǝ naa Yesu man, mǝn mǝ lǝng lep dǝr gurum muop dau ngan pee nanyi, mǝ kok wugok muop dau jya gǝnyi. ³⁶ Mǝ ɗang nyi zok ɗyin mǝ nɓwam wa pǝkyep byaat gǝfe dat. Mǝn muop wu mǝ ɓwam hǝ mǝ kagam.