¹ Par ɓit nanyi mǝn Yesu pǝt nyit gǝpang mwaan gǝ tong fuchip. ² Gurum kǝrgǝi jya mǝ neer nyi, lat mǝn rǝ nɗǝgǝn chii am ɗe gurum muop mǝ ɗyam fukyep kong. ³ Lat mǝn Yesu shee muop gǝ jepe gwet nɓǝlǝp-kwoom. Laa gǝ muop yen, "Me wumar pǝt mwaan gǝ fuu ǝksǝ gǝnung mar. ⁴ Nyi shifu mǝn pak ǝksǝ nanyi wakɗǝk fukyep war, mǝn yer mǝ ɗyigin. ⁵ Pak ǝksǝ wakɗǝk gǝ laar, pee wu yil gwet nnǝgǝn mou. Bǝr dat mǝn pǝt nsa yil jonpe mou. ⁶ Fuus yaa muop dat mǝn mǝ fii nsa seen muop jongpe mou. ⁷ Pak ǝksǝ nanyi wakɗǝk gǝnaar nǝlǝk. Mǝ fat dat mǝn nǝlǝk ɓyang muop. ⁸ Pak ǝksǝ nanyi wakɗǝk gǝ nanyil wuret mǝn lǝ ǝk gwet; pak lǝ ǝk yagurum-paat, pak yagurum-kùn, pak yagurum-gǝfusar. ⁹ Mǝgwuo wu nyi gǝ kom ɓǝ kǝlǝng yi." ¹⁰ Jepgǝdǝr Yesu jya mǝ nang fumuup mǝ yen, "A na bii gǝ laa ɓǝlǝp-kwoom gǝ gurum muop yi?" ¹¹ Yesu lap yen, "Gun de mǝ nyit gun gǝ mankang byigǝsok nung yil-long gǝbǝtǝng, nǝ muop a kam mou. ¹² Mǝgwuo wu nyi gǝ mǝbi, ɓǝ gǝ mǝ pǝn nde nnyi, ɗǝ nkat yi gwet. Mǝgwuo wu mǝbi won nnyi ɗǝ nkwǝt gǝ mǝbi wa laanyi ɓǝ gǝ mǝ ɗwan. ¹³ A laa ɓǝlǝp-kwoom gǝ muop a nsa: Muop fu naape mǝn mǝ kat mou, muop fu kǝlǝng mǝn mǝ mankang mou. ¹⁴ Ɓǝlǝp Ishaya wudok laa hǝ waa naduk kaa muop. Dok yen, "Gun fu kǝlǝng mǝn guu mankang mou; gun fu naa mǝn guu kat mou. ¹⁵ Nsa gurum muop nhǝ a wu ɓakpe, gǝ mǝ kǝlǝng kom mou; mǝ vagam yit du ya baa du naa, mǝ dugar kom du ya baa du kǝlǝng mǝn du mankang shi bǝzung du, mǝn mǝ njya dernǝ ɗǝ a ɗak muop yi.' ¹⁶ Wuret lang-kaa yit gu nsa muop fu naape; wuret lamg-kaa kom gu nsa muop fu kǝlǝngpe. ¹⁷ A laa naduk yi gǝgun, mǝlaa-ɓǝlǝpnaan gǝ gurum wukǝr gwet dok mǝ chaa mang du naa bii wu gun fu naa, mǝn mǝ kat naa mou. Mǝ chaa mang du kǝlǝng bii wu gun fu kǝlǝng, mǝn mǝ kat kǝlǝng mou. ¹⁸ Gu lǝng kom gu gu kǝlǝng ɓǝlǝp-kwoom wu ɗyin a laa kaa wu mar, wu mwaan gǝ fuu ǝksǝ hǝ. ¹⁹ Mǝgwuo nkǝlǝng ɓǝlǝp yil-long mǝn nmankang mou ɓǝ Shetan ji ɗwan bii wu mǝ kop nbǝzung muup nanyi. A nyi a ǝksǝ wu pǝttaa fukyep war. ²⁰ Ǝksǝ wu pǝttaa gǝlaar hǝ a nyi a gurum wu kǝlǝng ɓǝlǝp nanyi mǝn lapɗem gǝ tookpya, ²¹ mankang lat mou mǝn seen ɓǝlǝp nanyi jonpe nbǝzung muup mou. Nkat weel gǝ twangpe nsa ɓǝlǝp nanyi ɓǝ ɓes pal. ²² Ǝksǝ wu pǝttaa gǝnaar nǝlǝk, a nyi gurum wu kǝlǝng ɓǝlǝp nanyi mǝn weel gǝyil gǝ tang byilong ma gǝkagam muup, mǝn pǝtkaa mou. ²³ Ǝksǝ wu pǝttaa gǝ yil wuret, a nyi gurum wu kǝlǝng ɓǝlǝp nanyi mǝn mangkang, mǝn pǝtkaa. Lǝ ǝk ma wudok mǝ kop hǝ: pak lǝ ǝk yagurum-paat, pak yagurum-kùn, pak yagurum-gǝfusar." ²⁴ Yesu chin laa nde ɓǝlǝp-kwoom gǝ muop yen, "Yil-long gǝbǝtǝng a kabi dagwuo wu mwaan gǝ kop cherem sǝ wuret nmar. ²⁵ Pee chip dat lat mǝn wukas muup mwaan gǝ kop kot gǝnaar mar nanyi. ²⁶ Cherem sǝ wuret gǝ tagatkaa dat mǝn kot nanyi tagatkaa zak. ²⁷ Frang dagwuo nanyi jya mǝ nang fu muup mǝ yen, 'Miskagam, dok gǝ kop a cherem sǝ wuret mou a? Ɗe kot ba tong ane?' ²⁸ Mǝn dagwuo lap yen, 'A mǝ wukasnǝ chin bii nanyi.' Mǝ yen 'Gǝ tangkop mwaan mǝ tagat mǝ vak gǝnyi a?' ²⁹ Dagwuo yen, "Hayǝu. Yong gu tagat gu lǝ gǝ wuret. Nyit muop mǝ fyar gǝshak. ³⁰ Par nwul shi ɗyip ɓǝ a laa gǝ mǝɗyippe mǝ ɗyip chaar nanyi ɗyan ɗǝk gǝshak mǝn mǝ nung. Nlat ɓǝ mǝ ɗyip wuret chinkǝn nmee gǝnǝ.'" ³¹ Yesu chin laa nde ɓǝlǝp-kwoomkaa gǝ muop, yen, "Yil-long gǝbǝtǝng a kabi wu ǝk mostaad wu mǝgwuo mwaan gǝ kop nmar afe. ³² Nyi a wu kǝkat dip gǝnaar ǝk jepe. Ɗyin nfyer ɓǝ byaan waa tǝng wuyoon, mǝn yer mǝ kat pee lǝng lǝ gǝdu." ³³ Yesu chin laa nde ɓǝlǝp-kwoomkaa gǝ muop, yen, "Yil-long gǝbǝtǝng a kabi yis wu namat lyaan lǝ gǝ aas gǝfe mudu kùn mǝn aas nanyi wup." ³⁴ Yesu laa jepe hǝ gǝ gurum wukǝrgǝi a nɓǝlǝp-kwoom; laa mǝbi gǝ muop nyang nkwǝt a nkwoom mou. ³⁵ Chin kam ɗewar bii wudok wulaa-ɓǝlǝpnaan laa hǝ waa naduk yi, "Gǝ a ep funǝ ɓǝh a laa ɓǝlǝp-kwoom. Gǝ a laa jepe wudok muop gǝsok ɗagat shi kugur gǝyil hǝ." ³⁶ Lat mǝn Yesu nyit gurum wukǝrgǝi mǝn mwaan shi lǝ. Jepgǝdǝr muup mǝ jya ji mǝ yen, "Yakshii ɓǝlǝp-kwoom nung kot wu gǝnung mar nanyi nmǝn." ³⁷ Yesu lap yen, "Dagwuo wu kop ǝksǝ wuret a Laa Gurum. ³⁸ Mar nanyi a gǝyil; ǝksǝ wuret nanyi a jep yil-long. Kot nanyi a jep gurum wubis, ³⁹ wukasnǝ wu kop kot nanyi a Shetan. Gǝshi ɗyip nanyi a shii wu gǝyil gǝ lat hǝ. Mǝ pyan ɗyip nanyi a mǝwong muop. ⁴⁰ Kabi wu mǝ wagar chaar mǝ nung shi wus hǝ, par gǝ kwǝt a kam par wu gǝyil gǝ lat hǝ. ⁴¹ Laa Gurum par gǝ lep gǝ mǝwong muop mwaan mǝ nwagar jepe wubyas nɗǝgǝn yil-long afe mǝ nfat gǝnyi, muop wu gǝ mǝ saa gurum chan wubyas hǝ. ⁴² Gǝ mǝ kon muop nwus sugum, a nnǝgǝn ɓǝ mǝ eer mǝn mǝ arap fu du. ⁴³ Nlat ɓǝ gurum wukǝr mǝ saanpe gǝbi fuus hǝ nɗǝgǝn yil-long Ndaamuop. Mǝgwuo wu gǝ kom mǝ kǝlǝng. ⁴⁴ Yil-long gǝbǝtǝng a kabi byilong wu nyi nsok gǝnaar mar hǝ. Mǝgwuo kat mǝn sok. Took muup pya. Mwaan gǝ seet gǝ lee afe dip mǝn seet mar nanyi. ⁴⁵ A kam shizak, yil-long gǝbǝtǝng a kabi wupin lǝtuk wu fu tang bii wuret. ⁴⁶ Kat mǝbi wu gǝ kyen gwet, mǝn waa gǝ seet gǝ byilong gǝfe dip seet bii nanyi. ⁴⁷ A kam shizak, yil-long gǝbǝtǝng a kabi jeng wu mǝ tak nkong mǝn wagar jepe dip fuchat. ⁴⁸ Jeng nanyi gam mǝn mǝ kwat cherep nanyi mǝ dǝl ɗakkaa gǝnyi fu lis. Mǝ tugat pǝn cherep ɗǝk nɗaa gǝdu mǝn mǝ vak gǝ wubaan. ⁴⁹ Gǝ kwǝt a kam par wu gǝyil gǝ lat hǝ. Mǝwong jya gǝ mǝ tagat gurum wu ɓǝtbis gǝ gurum wukǝr. ⁵⁰ Gǝ mǝ kon muop wu ɓǝtbis nwus kabi sugum, a nnǝgǝn ɓǝ mǝ eer mǝn mǝ arap fu du. ⁵¹ Gu mankang ɓǝlǝp hǝ dip a?" Jepgǝdǝr muup mǝ lap yen, "ǝǝ". ⁵² Lat mǝn Yesu laa gǝ muop yen, "Me wubyiyil wu waa lagǝdǝr yil-long gǝbǝtǝng hǝ, ɓǝ nyi a kabi wupinlǝ wu gǝ byilong wufuo gǝ wusǝgǝr nɗǝgǝn mee gǝfe hǝ." ⁵³ Yesu laa ɓǝlǝp-kwoom nanyi lat mǝn yagal nyit pee nanyi. ⁵⁴ Lat men Yesu rǝ ngan lǝmuup, mǝn shee gurum muop nɗǝgǝn lǝwap. Waa ɓǝlǝp wufuo dǝr muop mǝn mǝ yen, "Ɗe kat soon gǝfe ane gǝ ɗyeer wu nyi fu chan nhǝ yi? ⁵⁵ A nyi a laa kapinta mo? Jet gǝ mǝ yong a nǝgǝn muup shi Mariya mo? Mǝ jepnǝgǝn muup daas a Yakubu, gǝ Yusufu gǝ Simon gǝ Yahuza mo? ⁵⁶ Mǝ jepnǝgǝn muup jiraap muop shiɓǝt mu npeen mo? Ɗe ba kat bii nakam ane?" ⁵⁷ Mǝn ɓǝlǝp logom muop. Mǝn Yesu laa gǝ muop yen, "Bii wulaa-ɓǝlǝpnaan gǝ kat pǝnmaa ngan lǝmuup gǝ gǝpang gǝfe mou." ⁵⁸ Mǝn Yesu chin ɗyeer gwet nnǝgǝn mou nsa mǝ nyang pǝn naduk.